KSÍ hefur grætt rúmar 6 milljónir

Knattspyrnusamband Íslands hefur verið gagnrýnt fyrir að hafa fjárfest í hlutabréfum í KB banka fyrir 100 milljónir á síðasta ári. Talað hefur verið um að áhættan sé of mikil og peningarnar ættu frekar að fara til félaganna í landinu sem sum hver berjast í bökkum. Eggert Magnússon, formaður KSÍ, sagði í samtali við Fréttablaðið að stjórn sambandsins liti á það sem skyldu sína að reyna að ávaxta fé sambandsins sem best og hún liti á þessa fjárfestingu í KB banka sem skammtímafjárfestingu. "Við munum innleysa þessi bréf á næstunni og miðað við gengi bréfanna í dag er ljóst að þessi fjárfesting skilar ágætis hagnaði," sagði Eggert. KSÍ keypti hlutabréf í KB banka fyrir um 100 milljónir í hlutabréfaútboði bankans í október á síðasta ári. Hver hlutur kostaði 480 kr þá en í gær stóð hluturinn í 512. Hann hefur hækkað um 6,25% á þessum rúmum fjórum mánuðum sem gefur KSÍ hagnað upp á rúmar sex milljónir ef sambandið myndi selja hlut sinn í dag. Samkvæmt heimildum Fréttablaðsins telst það vel viðunandi ávöxtun á ekki lengri tíma. "Þetta er ekki stór hluti af þeim peningum sem við erum að sýsla með og því lítum við ekki á þetta sem einhverja áhættu. Það var okkar mat að það væri betra að kaupa bréfin heldur en að geyma peningana inni á bók," sagði Eggert.