Rice ræddi um eiturlyf

„Bandaríkjamenn munu ekki yfirgefa Afganistan og íbúa landsins aftur,“ sagði Condoleezza Rice, utanríkisráðherra Bandaríkjanna, í Kabúl í dag og bætti við að Bandaríkin hefðu lært af því að gera þau mistök. Osama bin Laden kom sér fyrir í landinu og hóf undirbúning heilags stríðs á hendur Vesturlöndum. Þó að enn sé leitað að bin Laden í landamærahéruðum Afganistans og Pakistans, og órói sé mikill í landinu, voru það ekki hryðjuverk sem voru efst á baugi á fundi Rice með Hamid Karzai, forseta Afganistans, í dag heldur eiturlyf. Rice sagði Bandaríkin hafa aukið verulega framlög til baráttunnar gegn eiturlyfjum og bresk stjórnvöld tvöfaldað þau. „Þetta er langtímavandamál og það er ekki bara á ábyrgð afgönsku þjóðarinnar að fást við það heldur einnig þeirra sem það bitnar á,“ sagði Rice og bætti við að Bandaríkin vinni með nágrönnum Afgana og öðrum í alþjóðasamfélaginu við að fást við þetta alvarlega vandamál Talið er að opíum sé um 60 prósent alls útflutnings frá Afganistan og valmúarækt er víða eini tekjumöguleikinn fyrir fátæka bændur.