Hungurverkfall í flugvél

Tæplega sextíu manna hópur Írana neitaði að yfirgefa flugvél á flugvelli í Brussel í gær og hótaði að fara í hungurverkfall inni í vélinni til að mótmæla stuðningi við stjórnvöld í Íran. Vandræðin byrjuðu um leið og vélin, sem kom frá Frankfurt í Þýskalandi, lenti á belgískri grundu um miðjan dag í gær. Talsmaður hópsins sagði að ef Bandaríkjamenn, Evrópusambandið og Rússland hættu ekki samstarfi sínu við Íran myndi hópurinn svelta sig til dauða inni í flugvélinni. Eftir sextán tíma dvöl inni í vélinni bárust loks fregnir af því í morgun að lögreglu hefði tekist að ná öllum út úr vélinni. Ekki er vitað hvort fólkið kom sjálfviljugt út en að sögn lögreglu kom ekki til ofbeldis.