Skotin í eigin jarðarför

Það hlýtur að teljast til undantekninga að fólk sé skotið með byssu í eigin jarðarför. Hin fjörutíu og níu ára gamla barnfóstra, Clenilda da Silva, lenti þó í því á dögunum. Að sögn lögreglunnar í Rio de Janeiro í Brasilíu, þar sem da Silva var búsett, varð kista barnfóstrunnar fyrir skoti úr byssu glæpagengja sem áttu í átökum í næsta nágrenni við kirkjugarðinn. Kúlan fór í gegnum kistuna og lenti í mjaðmagrind da Silva en hún hafði látist úr hjartaáfalli daginn áður. Það fylgir sögunni að byssukúlan var ekki fjarlægð úr líki barnfóstrunnar áður en hún var jarðsett.