Óánægja með fuck og shit

Höfundar nýjustu útgáfu dönsku orðabókarinnar hafa vakið nokkurt umtal þar í landi, ekki síst meðal málverndunarsinna. Ensku blótsyrðin fuck og shit hafa nefnilega verið tekin inn í bókina í fyrsta sinn og sýnist sitt hverjum. Ritstjóri orðabókarinnar segir í samtali við danska blaðið Nordjyske Stiftstidende að orðabókin eigi að lýsa tungumálinu og þess vegna séu orðin tvö tekin með en ákvörðunin hefur mætt harðri andstöðu hjá Móðurmálsfélagi Danmerkur sem segir að ensk orð eins og fuck og shit verði ekki dönsk þótt margir Danir noti þau. Þess má geta að bæði orðin er að finna í nýjustu útgáfu íslenskrar orðabókar.