Yfir hundrað þúsund fyrir rauðvín

Karlmaður á fertugsaldri, sem pantaði sér rauðvínsflösku á Kaffi Reykjavík í janúar á þessu ári, hefur verið dæmdur fyrir að borga ekki flöskuna. Maðurinn hélt því fram fyrir dómi að hann hefði greitt fyrir flöskuna með vöruskiptum og hefði afgreiðslustúlka fallist á að fá ljóðabók í sínar hendur sem greiðslu fyrir flöskuna. Héraðsdómur Reykjavíkur féllst ekki á rök mannsins og var hann dæmdur í gær til að greiða fyrir flöskuna um fimm þúsund krónur, 25 þúsund króna sekt í ríkissjóð og 90 þúsund króna málsvarnarlaun skipaðs verjanda síns.