Bláa lóninu úthúðað í The Times

Bláa lónið fær harkalega útreið í breska stórblaðinu The Times. Þar segir að í ótal auglýsingum sé því lýst sem sælustað fyrir líkama og sál en veruleikinn sé allur annar. Blaðamaður blaðsins byrjar á því að lýsa búningsklefunum. Þar hafi verið mikil þrengsli og táfýla og álíka viðkunnalegt og í líkamsræktarstöð. Ekki hafi lónið sjálft verið betra og öll vellíðan hafi horfið eins og dögg fyrir sólu um leið og stigið var ofan í það. Þá hafi fjöldi ungra karla verið í lóninu með tilheyrandi látum og var blaðamaður ekki frá því að einn þeirra, með fjarrænt augnaráð, hafi verið að pissa í lónið. Blaðamanni The Times var nóg boðið eftir fimm mínútna dvöl í lóninu.