Kreppa og reiði í stað friðar

Líbanski herinn er í viðbragðsstöðu eftir morðið á Rafik Hariri, fyrrverandi forsætisráðherra í gær. Þar sem áður ríkti friður og uppbygging var áberandi, er í dag stjórnmálakreppa og reiði. Hariri var ráðinn af dögum með bílsprengju í gær og lýsti áður óþekktur íslamskur öfgahópur tilræðinu á hendur sér. Borið var við tengslum Hariris við Sádi-Arabíu, en hann auðgaðist þar sem verktaki áður en hann hóf afskipti af stjórnmálum. Í morgun var hins vegar birt önnur yfirlýsing á síðu sem tengist al-Qaida þar sem því var vísað á bug að al-Qaida hefði nokkuð með morðið að gera. Þar er því haldið fram að sprengjutilræðið sé verk leyniþjónustu annaðhvort í Sýrlandi, Líbanon eða Ísrael. Öryggissérfræðingur sem Reuters vitnaði til í gær taldi einnig mestar líkur á að leyniþjónusta hefði skipulagt tilræðið þar sem enginn hryðjuverkahópur gæti skipulagt jafn nákvæmt sprengjutilræði með þrjú hundruð kílóum af sprengiefni. Böndin berast að Sýrlandi, en Hariri sagði af sér forsætisráðherraembætti til að mótmæla því að stjórnvöld í Sýrlandi þrýstu á um að forseti Líbanons, sem þau studdu, yrði lengur í embætti. Hariri var meðal þeirra sem krafðist þess að sýrlenskir hermenn í Líbanon hyrfu á braut hið fyrsta. Stjórnvöld í Líbanon óttast frekari árásir og ætla að beita öllum tiltækum ráðum til þess að koma í veg fyrir að borgarastyrjöld hefjist í landinu á nýjan leik. Tilræðið hefur á ný vakið tortryggni og illsku sem var áberandi í borgarastríðinu sem stóð frá 1975 til 1990. Leiðtogar stjórnarandstöðunnar í Líbanon segja yfirvöld í Sýrlandi og Líbanon bera ábyrgð á árásinni. Þeir hafa farið fram á afsögn ríkisstjórnarinnar og boða þriggja daga allsherjarverkfall í landinu. Þriggja daga þjóðarsorg hefur verið lýst yfir og verða skólar, verslanir sem og allar stofnanir, bæði ríkis- og einkareknar, lokaðar næstu þrjá dagana. Leiðtogar heimsins hafa hver af öðrum fordæmt árásina. George Bush, Kofi Annan og Jacques Chirac hafa allir lagt áherslu á mikilvægi þess að komið verði í veg fyrir að allt fari í bál og brand á nýjan leik í Líbanon.