Actavis undir spám

Actavis Group skilaði 11,1 milljónum evra í hagnað á fyrsta ársfjórðungi sem gerir 900 milljónir króna. Er það verri afkoma en spáð hafði verið. Rekstrartekjur voru um 101 milljónir evra en greiningaraðilar spáðu því að þær yrðu um 110 milljónir evra. Afkoman er einnig slakari en á sama tímabili í fyrra þegar félagið hagnaðist um 21,8 milljón evra. Þess ber þó að geta að fyrsti ársfjórðungurinn í fyrra var óvenju góður þegar lyfið Ramipril var sett á markað. Gengi hlutabréfa í Actavis lækkaði um 4,5 prósent eftir birtingu uppgjörsins. Gerðist það á síðustu tuttugu mínútunum fyrir lokun markaðarins. Félagið hefur lækkað um níu prósent í vikunni eftir að hafa hækkað mikið í kjölfar kaupanna á bandaríska lyfjafyrirtækinu Amide í síðustu viku. "Uppgjörið er í takt við okkar væntingar, sem er jákvætt, en klárlega undir væntingum markaðarins," segir Róbert Wessman, forstjóri Actavis. "Árið hefur farið vel af stað. Við erum að sjá gríðarlegan vöxt í okkar vörumerkjum og innri vöxtur er um fjórtán prósent. Við höfum sett okkur markmið að vera með 26 prósent framlegð og ég er nokkuð klár og sannfærður um að það náist," segir Róbert. Hann segir að fyrsti árshlutinn verði lakastur, strax á þessum ársfjórðungi verði reksturinn betri og styrkist frekar þegar á árið líður. Stærsta viðskiptalandið er Tyrkland þar sem fimmtungur sölunnar á sér stað. Þýskaland kemur svo næst en vægi þess hefur farið nokkuð minnkandi. Actavis stefnir á að setja 60 lyf á markað á þessu ári en um 140 lyf eru í þróunar- og skráningarferli.