Þurrkar hamla gróðursetningu

Um 15 þúsund skógarplöntur bíða nú rigningar í Heiðmörk, svo hægt verði að setja þær niður, að sögn Ólafs Erlings Ólafssonar skógarvarðar á svæðinu. Eftir helgina koma rúmlega 100 þúsund plöntur til viðbótar. Þá kemur líka fyrsti vinnuhópurinn, 20 manns, á mánudag. Ætlunin var að fara að setja niður plöntur af fullum krafti, en útilokað er að hefja gróðursetningu nú því jarðvegurinn er orðinn svo þurr eftir langvarandi þurrkatíð, að sögn Ólafs. "Þrír hópar sjá um gróðursetninguna fyrir okkur í sumar, svo og göngustígagerð á svæðinu" sagði hann. "Það eru veraldarvinir, unglingavinna Landsvirkjunar og Vinnuskóli Reykjavíkur, samtals 160 manns þegar flest verður. Yfirstandandi þurrkatíð veldur því að það er ekki hægt að hefja gróðursetningu. Ef sett er niður planta, þá þornar hún um leið þótt hún hafi verið rennandi blaut. Jarðvegurinn er orðinn alveg skraufþurr niður á 10 - 15 sentímetra dýpt. Við verðum bara að vökva plönturnar og láta huga að göngustígagerð meðan tíðin er svona." Þær 15 þúsund plöntur sem bíða gróðursetningar nú eru birkiplöntur. Fyrirhugað er að setja einnig niður greni og furu í Heiðmörkinni í sumar. Ólafur sagði vel merkjanlegt hve slæm áhrif veðráttan hefði haft á gróðurinn í Heiðmörk í vor. Aspirnar væru "gular og ljótar," og gróðurinn væri almennt mun seinni til heldur en venjulega. "Í svona þurri norðanátt er lítill hiti í loftinu á daginn og nánast frost á nóttunni," sagði Ólafur. "Það sést mikill munur á birkinu niðri við Elliðavatn og uppi í Heiðmörkinni, hvað gróðurinn sem stendur lægra er kominn miklu betur áleiðis. Það gæti farið svo að smáplönturnar sem settar voru niður í Heiðmörkinni í fyrra drepist í svona þurrkum. Við gróðursettum um 115 þúsund plöntur á síðasta ári. Þær virðast sleppa enn sem komið er, en svona veðurfar þola þær ekki til lengdar."