Kosið milli Camerons og Davis

Breski Íhaldsflokkurinn fækkaði í gær keppinautunum um flokksleiðtogahlutverkið niður í tvo. Yngsti frambjóðandinn, David Cameron sem er 39 ára, hlaut afgerandi mestan stuðning í útsláttaratkvæðagreiðslu í þingflokknum. 90 þingmenn studdu hann og bar hann þar með afgerandi sigurorð af keppinautunum. Næstur honum kom David Davis með 57 atkvæði. Á næstu sex vikum munu hinir 300.000 skráðu meðlimir flokksins fá tækifæri til að gera upp á milli þeirra tveggja. Úrslitin verða kunn í byrjun desember. Í þessari umferð féll Liam Fox úr leik, en hann hlaut 51 atkvæði. Áður voru Malcolm Rifkind og Kenneth Clarke dottnir úr leik. „Ég vil vera málsvari breytinga, bjartsýni og vonar í þessu landi," sagði Cameron eftir að úrslitin voru ljós. Þrátt fyrir að hafa ekki átt sæti á þingi nema í eitt kjörtímabil hefur pólitískur stíll Camerons, kímnigáfa, vitsmunir og framtíðarsýn aflað honum breiðs stuðnings í flokknum – sumir bera hann jafnvel saman við Tony Blair þegar hann hófst til forystu í Verkamannaflokknum. Mikið er í húfi fyrir flokkinn að takast í þetta sinn að velja mann til forystu sem hefur það til að bera sem þarf til að geta skákað Blair og væntanlegum arftaka hans, Gordon Brown, í næstu kosningum, sem væntanlega fara fram árið 2009. Cameron er álitinn miðjusækinn en Davis er fulltrúi hægriarmsins. Davis hefur lagt áherslu á lágskattastefnu í efnahagsmálum og stranga „laga-og-reglu"-stefnu. Í von um stuðning miðju-manna hefur hann hins vegar heitið því að hann myndi sem flokksleiðtogi færa stefnumið sín nær miðjunni. Davis er úr verkalýðsfjölskyldu en Cameron var í elítuheimavistarskólanum Eton. Á meðan Cameron hefur verið að auka fylgi sitt hefur Davis verið í kröggum frá því að hann flutti ræðu á flokksþingi fyrr í mánuðinum sem þótti valda vonbrigðum.