Allan er alltaf velkominn til FH

Framherjinn Allan Borgvardt, sem verið hefur einn besti leikmaður Landsbankadeildarinnar í sumar, fór til Noregs í gær og hefur undirritað samning við norska liðið Viking um að leika með því fram á vetur. Mikill sjónarsviptir verður af þessum frábæra leikmanni í úrvalsdeildinni hér heima, en hann hefur verið framúrskarandi á þeim tíma sem hann hefur spilað með Hafnfirðingum og á stóran þátt í að liðið hefur orðið Íslandsmeistari tvö ár í röð. "Þetta gekk nokkuð fljótt fyrir sig og nú er ljóst að Allan er orðinn leikmaður Viking," sagði Pétur Stephensen, framkvæmdastjóri knattspyrnudeildar FH í gær, þegar hann var spurður hvernig viðskiptin hefðu komið til. "Það hafa nokkur lið verið að skoða hann í sumar, en Viking var nú reyndar ekki eitt af þeim. Þeir hinsvegar hafa heyrt nóg um hann til að ákveða að gera við hann samning fram á haustið og eftir það verður bara að koma í ljós hvað verður með hann. Allan er bara 25 ára gamall og draumur hans er auðvitað að komast að hjá liði í fullri atvinnumennsku einhversstaðar. Við óskum honum alls hins besta í framtíðinni og vonum að rætist úr þessu hjá honum," sagði Pétur, en bætti við að ekki væri víst að við hefðum séð okkar síðasta af Dananum knáa. "Ef hlutirnir ganga ekki upp hjá honum þarna úti, getur meira en verið að hann komi bara og spili með FH aftur. Hann verður alltaf velkominn hingað og mun aldrei leika með öðru liði en FH hér á Íslandi," sagði Pétur og sagði að Hafnfirðingar myndu sakna Borgvardt mikið, þar sem hann sé ekki aðeins frábær knattspyrnumaður, heldur einnig drengur góður.