Munar allt að 400 þúsundum á ári

"Það eru ansi margir í mínu félagi sem hrista hausinn yfir þessu og skilja hvorki upp né niður," segir Björg Bjarnadóttir, formaður Félags leikskóla­kennara. Nýafstaðnir samningar Reykja­­víkurborgar við Eflingu og Starfs­mannafélag borgarinnar þýða að ófaglærðir deildarstjórar á leikskólum hafa mun hærri mánaðarlaun en faglært fólk innan Félags leikskólakennara.

Þannig er launamunur upp á tæpar fjögur hundruð þúsund krónur á ársgrundvelli milli þeirra sem eru í Starfsmannafélaginu annars vegar og í Félagi leikskólakennara hins vegar. Björg segir þennan mun ótrúlegan og hefur fyrir hönd félagsmanna sinna þegar óskað eftir fundi með launanefnd sveitarfélaganna þar sem krafa verður gerð um leiðréttingu á þessari stöðu mála.

"Það er ákveðin bjartsýni í okkur því þetta gefur okkur góð vopn upp í hendurnar. Launanefndin getur vart litið fram hjá þessum mikla mun sem nú er orðinn milli faglærðra og ófaglærðra því með því gera þeir lítið úr menntun fólks í Félagi leikskólakennara."