Fullkomið samspil hests og manns

Menn og hestar þreyttu svokallaða þolreið í heiðríkjunni og kuldanum í dag þegar um þrjátíu keppendur reyndu sig á reiðleiðinni frá Víðidal og upp í Laxnes í Mosfellsdal. Svona þolreið er keppnisíþrótt um allan heim og felst í því að ná hinu fullkomna samspili á milli hests og manns. Markmiðið er að koma sem fyrst í mark án þess þó að ofkeyra hestinn og er hesturinn púlsmældur fyrir og eftir keppni til að tryggja að hann hafi ekki verið keyrður um of. Í verðlaun voru farmiðar á heimsmeistarmótið í hestaíþróttum sem haldið verður í Svíþjóð í haust.