Stóreflis skúta í Reykjavíkurhöfn

Stóreflis þrímastra seglskúta liggur nú í Reykjavíkurhöfn og hefur vakið mikla athygli vegfarenda. Um er að ræða úkraínskt skólaskip. Hundrað og fimmtán manns eru um borð, þar af sjötíu og þrír siglinganemar. En þótt skipið komi frá Sebastopol á Krímskaga þá eru fimmtíu af nemunum þýskir. Það er tekjuöflun fyrir stofnunina sem á skipið. Síðasti hópur kom um borð í Hamborg og sigldi hingað en hér verður skipt um hóp og siglir sá til Englands. Andrei Poddubny, yfirmaður um borð, segir nóg að gera, nemarnir skrúbba auðvitað dekkið og halda skipinu hreinu og fínu en aðallega eru þeir auðvitað að læra að sigla, bæði eftir kortum og GPS-hnitum. Möstrin eru fjörutíu og tveggja metra há og það er víst daglegt brauð fyrir þessa fimmtán 16 ára krakka að klifra þar upp í topp. Þess á milli má líka reyna að renna fyrir fisk og hafa nokkrir verið veiddir upp úr íslenskum sjó. Hópurinn fær líka tækifæri til að sjá örlítið af Íslandi í dagsferð um Suðurland en látið verður úr höfn á mánudagsmorgun.