Olíumiðlun fékk fyrstu olíuna

Íslensk olíumiðlun ehf. fékk afhenta sína fyrstu olíu í Neskaupstað í gær, 3.300 tonn. Fyrirtækið var stofnað í fyrra um olíusölu til skipa. "Við erum komin með einn 4.000 rúmmetra tank sem við fyllum núna," segir Ólafur Þ. Kjartansson, framkvæmdastjóri Olíumiðlunar, og kvað dælingu hafa gengið vel. "Við höfðum búið okkur undir að vera hér í nótt, en klárum þetta á 5 til 6 tímum." Hann segir olíusölu þegar geta hafist, en fyrirtækið ætlar að selja íslenskum skipum og erlendum. Þá hefur verið gerður samningur við Ríkiskaup um sölu til Landhelgisgæslu og Hafrannsóknastofnunarinnar. Ólafur segist ætla að keppa í verði, en það muni sveiflast eftir heimsmarkaðsverði á hverjum tíma. "Við vinnum þetta í nánu samstarfi við Malik [Supply Ltd.], " segir Ólafur, en það er danskt olíufélag sem á meirihluta í Olíumiðlun. "Það aðstoðar við markaðssetningu gagnvart erlendum skipum, enda með 15 ára reynslu," bætti hann við og kvað alla aðstöðu mjög nútímalega. Til dæmis væri verið að koma upp mælum til að fylgjast með birgðastöðu á hverjum tíma. Viðstaddur þessi tímamót í sögu Olíumiðlunar var Sten Möller, framkvæmdastjóri Malik Supply.