Á sex ára fangelsi yfir höfði sér

Fyrrverandi afleysingamaður íslenska kirkjusafnaðarins í Noregi á yfir höfði sér allt að sex ára fangelsisdóm samkvæmt norskum refsilögum. Maðurinn viðurkenndi við yfirheyrslur lögreglu að hafa dregið sér sex milljónir króna úr sjóðum safnaðarins. Peningana segist hann hafa notað til að greiða skuldir, til að spila í spilakössum, ferðast með leigubílum og borða á veitingahúsum. Einnig segist hann hafa látið hluta af þýfinu renna í söfnunarkassa Hjálpræðishersins. Maðurinn sagðist við yfirheyrslur sjá eftir því að hafa svikið fé út úr safnaðarsjóðunum en taldi brot sitt þó ekki eins alvarlegt og ef hefði hann stolið frá einstaklingi en ekki kirkju. Maðurinn er sonur fyrrverandi formanns safnaðarins sem sagði af sér embætti um leið og upp komst um málið. Gjaldkeri safnaðarins hefur líka sagt af sér.