Birgir Leifur meðal efstu manna

Birgi Leifi Hafþórssyni gekk öllu betur á öðrum degi úrtökumóts fyrir evrópsku mótaröðina sem fram fór í gær og er meðal þeirra 30 efstu fyrir þriðja hring sem leikinn er í dag. Birgir þarf að vera meðal 35 efstu manna að keppni lokinni til að tryggja sér keppnisrétt í evrópsku mótaröðinni á næsta ári og ljóst að það takmark er ekki úr augsýn haldi kappinn áfram að spila eins og í gær. Leiknir verða alls sex hringir á tveimur mismunandi völlum en eftir fjórða hring verður skorið niður í 75 kylfinga sem keppa innbyrðis síðustu tvo dagana. Er því Birgir Leifur vel innan þeirra marka eins og staðan er og vonandi að gengi hans verði áfram gott.