Allt púður í 10 ríki

Forsetaframbjóðendurnir í Bandaríkjunum beina nú allri athygli sinni að tíu ríkjum, þar sem fylgi þeirra er hnífjafnt. John Kerry hlaut í gær stuðning úr óvæntri átt. Dálkahöfundur tímaritsins Congressional Quarterly, þar sem fylgst er með stjórnmálunum í Washington, baðst í gær undan því að færa rök fyrir spám um gengi frambjóðendanna á þriðjudaginn kemur. Hann sagði að það væri eins og að biðja um nákvæða spá um hvert hvirfilbylur stefndi, það er að segja hreinlega ekki hægt. Ritstjórar hins hægrisinnaða fréttatímarits Economist færa hins vegar ítarlega rök fyrir vali sínu á rétta frambjóðandanun. Fyrir fjórum árum studdu þeir George Bush, en nú segjast þeir verða að mæla með John Kerry, með depurð í hjarta. Ástæða þessara meðmæla er þó ekki frammúrskarandi hæfni Kerrys, heldur gallar og mistök Bush. Þeir hrósa honum fyrir framgönguna í kjölfar árásanna 11. september, en segja meðferð stríðsfanga vera arfleifð sem Bandaríkjamenn muni súpa seiðið af næstu ár og áratugi. Meðferð fanganna í Guantanamo-fangelsinu á Kúbu sem dæmi um hræsnina í Bandaríkjamönnum. Stjórn Bush þykist berjast fyrir réttlæti og frelsi, en haldi á sama tíma hundruðum í haldi án dóms og laga. Skilaboð Johns Kerrys þessa síðustu daga baráttunnar eru afskaplega einföld: Bandaríkin þurfa hreint borð og nýtt upphaf. Stjórnmálaskýrendur hafa nú kveikt á perunni og telja þennan ofureinfalda boðskap afrakstur mikillar vinnu með úrtakshópum, og þeir eru á því að hugsanlega geti þetta einmitt verið frasinn sem sannfærir kjósendur. Kannanir sýni að almenningi líki vel við Bush sem persónu en sé ekki endilega spenntur fyrir öðru kjörtímabili. Því sé óráðlegt að ráðast of harkalega á persónu Bush, heldur lofa því sem almenningur vill, nefninlega nýtt upphaf, hreint borð. Bush forseti beitir allt öðrum aðferðum og gagnrýnir Kerry harðlega. Á kosningafundi í Michigan í gær sagði hann að Kerry væri of veikgeðja og óákveðinn til að geta stýrt þjóðarskútunni á stríðstímum. Fjórða daginn í röð var það sprengiefnið í Írak sem var efst á málefnaskrá beggja frambjóðenda, og það er greinilegt að báðir telja stríði í Írak vera það málefni sem úrslit kosninganna velta á. Kerry var á því að Bush forseti kæmi sífellt upp með nýjar afsakanir og útskýringar á því, hvernig tæplega fjögur hundruð tonn af sprengiefni gátu horfið, Bush svaraði með því að segja málflutning Kerrys þversagnakenndan. John Kerry er að sögn Bush rangur maður í rangt embætti á röngum tíma. Á landsvísu er Bush áfram með um tveggja prósentustiga forskot, en athygli frambjóðendanna sem og annarra beinist nú eingöngu að tíu ríkjum þar sem óvissan er mikil: Wisconsin, Minnesota, Iowa, Ohio, Pennsilvanía, Samkvæmt könnun Reuters og Zogby í gær er Bush með forskot í fimm ríkjanna og Kerry í fjórum, en í flestum tilvikum er forskotið innan skekkjumarka kannannarinnar og því ómarktækt.