Styðja flugfreyjur Iceland Express

Starfsgreinasamband Íslands segir fyrirætlun Iceland Express um að segja upp flugfreyjum félagsins til þess að endurráða þær hjá erlendu félagi tilraun til félagslegra undirboða. Fyrirætlunin verði ekki túlkuð öðruvísi en sem aðför að skipulagðri verkalýðshreyfingu hér á landi og umsömdum lágmarkskjörum launafólks. Framkvæmdastjórn Starfsgreinasambandsins segir svipaðar tilraunir atvinnurekenda þekktar á alþjóðlegum markaði. Í tilkynningu frá sambandinu segir að það muni beita sér gegn áformum Iceland Express, óski Flugfreyjufélag Íslands eftir þeirri aðstoð í kjaradeilu sinni við flugfélagið.