Hitnar í kolunum

Stjórnvöld í Kongó hafa stefnt 5.000 hermönnum til landamærahéraðanna í austurhluta landsins. Stjórnvöld segja þetta gert til að halda aftur af fyrrum uppreisnarmönnum sem eru farnir að láta á sér kræla á nýjan leik en í Rúanda óttast menn að liðsflutningarnir kunni að vera fyrirboði innrásar. "Við ógnum ekki öryggi nágranna okkar. Við treystum nágranna okkar og viljum að hann treysti okkur," sagði Jean-Pierre Ondekane, varnarmálaráðherra Kongó. "Kongó mun ekki ráðast á Rúanda," sagði Antoine Ghonda forsætisráðherra. Forystumenn í ríkjunum tveimur hafa skipst á ásökunum undanfarnar þrjár vikur eftir að uppreisnarmenn hertóku borg í austurhluta Kongó í byrjun mánaðarins og valdarán var reynt í höfuðborginni, Kinshasa. Rúanda var eitt þeirra ríkja sem sendu hersveitir inn í Kongó í stríði sem stóð yfir á árunum 1998 til 2002. Rúmar þrjár milljónir hið minnsta létu lífið af völdum þess. Því stríði lauk með því að mynduð var bráðabirgðastjórn stjórnvalda, uppreisnarmanna og stjórnarandstöðuflokka.