Engin opinber rannsókn í Beslan

Engin opinber rannsókn fer fram á því hvernig hryðjuverkamenn gátu falið vopn í skólanum í Beslan og hertekið hann. Vladímír Pútín, forseti Rússlands, er mótfallinn slíkri rannsókn og viðræðum við aðskilnaðarsinna í Tsjetsjeníu. Hann segir eins hægt að bjóða Ósama bin Laden til fundar í Hvíta húsið. Pútín hefur sætt töluverðri gagnrýni undanfarna daga. Annars vegar er honum legið á hálsi fyrir að hafa ekki leyst deiluna í Tsjetsjeníu, eins og hann hét að gera áður en hann var kjörinn forseti, og hins vegar þykir hann ekki hafa séð til þess að hryðjuverkavarnir og öryggismál væru í lagi. Jafnt stjórnmálaskýrendur sem stjórnarandstæðingar og almenningur velta því fyrir sér hvernig hryðjuverkamenn gátu laumað sér inn í barnaskóla og falið þar heilt vopnabúr, síðan hertekið skólann og haldið þar tólf hundruð gíslum. Loks sæta öryggissveitir gagnrýni fyrir framgöngu sína á föstudaginn þegar 335 hið minnsta týndu lífi. Pútín ræddi við erlenda blaðamenn í gærkvöldi og var þá alls ekki á því að hefja opinbera rannsókn á atburðunum og svara þannig gagnrýninni. Hann sagði slíka rannsókn ekki skila neinu. Þvert á móti væri hætta á að rannsókn yrði að pólitískum farsa með neikvæðum afleiðingum. Hann sagðist þó ekki myndu leggjast gegn því að rússneska þingið fyrirskipaði opinbera rannsókn. Sjálfur vill Pútín að rannsakað verði hvað gerðist, hver beri ábyrgð og hverjum beri að refsa. Það telur hann hins vegar rétt að gera á bak við luktar dyr. Pútín vill ekki heldur ræða við tsjetsjenska aðskilnaðarsinna. Hann sagði í viðtali við dagblaðið Guardian að þeir sem vildu viðræður við uppreisnarleiðtoga í Tsjetsjeníu væru samviskulausir og spurði hvort ekki væri þá rétt að bjóða Ósama bin Laden til Brüssel eða í Hvíta húsið í Washington til að ræða kröfur hans. Enginn hefði rétt til að skipa Rússum að setjast að samningaborði með barnamorðingjum. Í dag er búist við í minnsta lagi hundrað þúsund manns við minningarathöfn við Kreml í Moskvu til að minnast þeirra sem féllu í bardögum sérsveitanna og hryðjuverkamannanna í Beslan. Stjórnvöld standa fyrir samkomunni eins og öðrum minningarathöfnum í helstu borgum Rússlands í dag og gær. Stjórnarandstaðan gagnrýnir þann hátt og segir að athöfnunum sé snúið upp í stuðningssamkomur við Pútín til að drepa gagnrýninni á dreif. Fjölmiðlar í Rússlandi finna einnig fyrir þrýstingi frá stjórnvöldum. Til að mynda var ritstjóri dagblaðsins Izvestia rekinn í gær en blaðið vakti athygli á laugardaginn þegar enginn texti var á forsíðu þess eins og venjulega, heldur einungis mynd af barni sem reynt var að bjarga úr klóm hryðjuverkamannanna. Á Vesturlöndum heyrast einnig gagnrýnisraddir. Framkvæmdastjóri NATO hefur boðað til fundar með fulltrúum aðildarríkja sambandsins og Rússlands til að ræða stöðu mála í Tsjetsjeníu.