Fréttir

Milan og Juve unnu sína leiki

Juventus vann Sampdoria 1-0 í ítölsku úrvalsdeildinni í knattspyrnu í gærkvöldi. Pavel Nedved skoraði eina mark leiksins á 69. mínútu. AC Milan vann Empoli 3-0 þar sem Filippo Inzahgi skoraði tvö markanna og Andrei Schevshenko eitt. Juventus er á toppi deildarinnar og hefur 10 stiga forystu á AC Milan. Í kvöld mætast Roma og Inter en leikurinn verður sýndur á Sýn extra klukkan 19:30.

Sport 5.3.2006 14:01

Barcelona heldur 10 stiga forystu á Spáni

Barcelona og Real Madríd unnu bæði mótherja sína í spænsku knattspyrnunni í gærkvöldi. Barcelona lagði Deportivo La Coruña, 3-2 seint í gærkvöldi eftir að Real Madrid hafði lagt granna sína í Atletico, 2-1. Samuel Etoo skoraði sigurmark Börsunga á 61. mínútu.

Sport 5.3.2006 14:08

TF SIF vonandi í gagnið á morgun

Vonast er til þess að þyrla gæslunnar TF SIF komist í gagnið á morgun. Fjöldi ferðamanna er á ferð um helgina. Viðbragðstími Varnarliðsþyrlanna er einn og hálfur tími um helgar en hálftími hjá gæslunni - þegar þyrlurnar eru í lagi.

Innlent 5.3.2006 12:18

Lögreglan hyggst leita eftir samstarfi vegna grófra árása

Lögreglan hyggst leita eftir samstarfi við rekstraraðila veitingastaða í borginni til að reyna að sporna betur við vopnuðum árásum og öðru grófu ofbeldi á og við veitingastaði. Tveir menn urðu fyrir hnífsstungum um helgina og eru fimm í haldi vegna árásanna.

Innlent 5.3.2006 12:06

Svipaðar kjarabætur og aðrir og breyttur vinnutími

Slökkviliðs- og sjúkraflutningamenn fá svipaðar kjarabætur og aðrir starfsmenn sveitarfélaga hafa fengið samkvæmt nýjum kjarasamningi sem undirritaður var af fulltrúum þeirra og launanefndar sveitarfélaga í nótt. Þá eru ákvæði um breytingar á vinnutíma.

Innlent 5.3.2006 12:19

Jarðskjálfti upp á 4,3 á Richter norður af Grímsey

Jarðskjálfti upp á 4,3 á Richter varð um 40 kílómetra norður af Grímsey upp úr klukkan tíu í morgun. Íbúar eyjarinnar urðu sumir hverjir greinilega varir við skjálftann en engar skemmdir urðu á mannvirkjum.

Innlent 5.3.2006 12:14

Opið í Hlíðarfjalli og Tindastól í dag

Opið er í Hlíðarfjalli við Akureyri í dag frá kl. 10-17. Flestar lyftur eru opnar og skíðafærið er troðinn þurr snjór að sögn forstöðumanns. Klukkan 8 í morgun var sjö gráðu frost og logn. Þá er einnig opið á skíðasvæði Tindastóls við Sauðárkrók frá klukkan 11-17.

Innlent 5.3.2006 10:03

Óháðrar rannsóknar krafist

Danska stjórnarandstaðan krefst þess að fram fari óháð rannsókn á hvernig ríkisstjórnin tók á Múhameðsmyndamálinu svonefnda.

Erlent 5.3.2006 10:00

Guðmundur sigraði í Fjarðabyggð

Guðmundur Þorgrímsson, oddviti í Austurbyggð, sigraði í gær í prófkjöri Framsóknarflokksins í fjórum sveitarfélögum á Austurlandi sem sameinast undir nafni Fjarðarbyggðar eftir sveitarstjórnarkosningarnar í vor.

Innlent 5.3.2006 09:59

Á fimmta tug liggur í valnum

46 skæruliðar hafa fallið í átökum við pakistanska stjórnarherinn rétt við afgönsku landamærin undanfarna tvo daga.

Erlent 5.3.2006 09:54

Önnur hnífsstunga í miðborginni í nótt

Ungur maður var stunginn með hnífi fyrir framan skemmtistaðinn Glaumbar við Tryggvagötu um hálf sexleytið í morgun. Hann var fluttur á slysadeild Landspítalans og liggur nú á gæsludeild. Þetta er önnur hnífsstungan í miðborg Reykjavíkur um helgina en í fyrrinótt var ungur maður stunginn inni á skemmtistaðnum Gauki á Stöng.

Innlent 5.3.2006 10:01

Zawahri hvetur enn til hryðjuverka

Í hljóðupptöku sem birt var á internetinu í gær hvetur Ayman al-Zawahri, næstráðandi al-Kaída hryðjuverkanetsins, múslíma til fremja hryðjuverk á Vesturlöndum sem aldrei fyrr.

Erlent 5.3.2006 09:47

Slökkviliðsmenn og launanefnd semja

Skrifað var undir samninga í kjaradeilu Landssambands slökkviliðs- og sjúkraflutningamanna og launanefndar sveitarfélaganna klukkan fimm í nótt eftir um sextán tíma samningafund. Samningurinn er til þriggja ára og er sambærilegur þeim samningum sem launanefnd sveitarfélaganna hefur gert við aðra hópa.

Innlent 5.3.2006 09:53

Real Madrid vann nágrannaslaginn

Real Madrid vann 2-1 sigur á Atletico Madrid í nágrannaslagnum í spænska fótboltanum í kvöld. Liðið er nú í 2. sæti deildarinnar, átta stigum á eftir toppliði Barcelona sem mætir Deportivo kl 21 í kvöld. Antonio Cassano og Julio Baptista skoruðu mörk Real Madrid. Tveimur öðrum leikjum er lokið í spænsku úrvalsdeildinni í kvöld. Cadiz lagði Espanyol 2-0 og Villareal vann 3-2 sigur á Alaves.

Sport 4.3.2006 21:05

Andorra mun vígja Wembley

Það verður knattspyrnulandslið smáríkisins Andorra sem mun leika fyrsta landsleikinn í fótbolta við England hinum nýja Wmbley, þjóðarleikvangi Englendinga sem verið er að leggja lokahönd á. Andorra er í E-riðli með Englendingum í undankeppni EM2008 og mætast þjóðirnar þann 2. september n.k. á Wembley.

Sport 4.3.2006 20:39

Óli Stef með 4 mörk og Ciudad í undanúrslitin

Ólafur Stefánsson og félagar í Ciudad Real tryggðu sér í kvöld farseðilinn í undanúrslit Meistaradeildar Evrópu í handbolta þegar þeir lögðu Celja frá Slóveníu í 8 liða úrslitum, 33-28 á útivelli. Þetta var síðari viðureign liðanna í 8 liða úrslitunum en Ciudad vann fyrri leikinn með 7 marka mun, 34-27. Ólafur skoraði 4 mörk fyrir Ciudad í kvöld.

Sport 4.3.2006 20:54

Fyrsta tap Federer í 56 leikjum

19 ára Spánverji, Rafael Nadal afrekaði það í dag að leggja að velli stigahæsta tenniskappa í heimi, hinn svissneska Roger Federer. Með sigrinum tryggði Spánverjinn sér sigur á opna meistaramótinu í Dubai en hann lagði Federer í tveimur settum gegn einu, 2-6, 6-4 og 6-4.

Sport 4.3.2006 20:14

Liverpool og Charlton skildu jöfn

Liverpool og Charlton gerðu markalaust jafntefli í ensku úrvalsdeildinni í fótbolta nú í kvöld en leikið var á Anfield. Hermann Hreiðarsson lék að venju allan leikinn með liði Charlton. Liverpool skaust upp í 2. sæti deildarinnar með stiginu sem fékkst fyrir jafnteflið í kvöld og er nú með 45 stig, einu stigi ofar en Man Utd sem reyndar á tvo leiki til góða. Charlton er í 13. sæti með 36 stig.

Sport 4.3.2006 19:20

Alfreð formlega tekinn við landsliðinu

Alfreð Gíslason tók í dag formlega við þjálfun íslenska karlalandsliðsins í handbolta en hann skrifaði undir samning þess efnis á fréttamannafundi hjá HSÍ í dag. Upphaflega átti að skrifa undir í gær en vegna frestunar á flugi frá Þýskalandi var því seinkað þangað til í dag.

Sport 4.3.2006 19:14

Geimstöðvar á tunglinu í bígerð

Bandaríska geimferðastofnunin áformar að reisa geimstöð á tunglinu þar sem geimfarar geta dvalið vikum og jafnvel mánuðum saman. Vísindamenn vonast til að ný jarðvegssýni frá tunglinu geti varpað ljósi á hvernig jörðin varð til.

Erlent 4.3.2006 17:47

Engin aðstaða fyrir hreyfihamlaða í húsakynnum Skáksambandsins

Hreyfihamlaðir eru afar óánægðir með aðgengi í húsakynnum Skáksambandsins og hafa af þeim sökum ekki tekið þátt í skákmótum þar í fjölda ára. Formaður sambandsins segist líta á þetta sem forgangsmál.

Innlent 4.3.2006 18:32

Guðjón Valur með 13 mörk fyrir Gummersbach

Guðjón Valur Sigurðsson fór á kostum og skoraði 13 mörk fyrir Gummersbach í dag þegar liðið tryggði sig í undanúrslit Evrópukeppni félagsliða (EHF keppninni) í handbolta þrátt fyrir tap gegn spænska liðinu Bidasoa, 30-26. Róbert Gunnarsson lék einnig með Gummersbach í dag og skoraði tvö mörk.

Sport 4.3.2006 18:25

Ísraelskir arabar mótmæla

Mikill kurr er á meðal araba sem búsettir eru í Ísrael eftir að flugeldar voru sprengdir í Boðunarkirkjunni í Nasaret, einum helgasta stað kristinna manna.

Erlent 4.3.2006 18:23

Fram á toppinn í handboltanum

Fram tyllti sér á topp DHL-deildar karla í handbolta í dag með tveggja marka sigri á ÍBV á erfiðum útivelli í Eyjum, 32-34. Tveir leikir fóru fram hjá körlunum í efstu deild en Stjarnan lagði Hauka í Ásgarði með 5 marka mun, 33-28.

Sport 4.3.2006 18:07

Maður sem stunginn var kominn úr lífshættu

Maðurinn, sem var stunginn tvívegis í bakið á veitingastaðnum Gauki á Stöng í nótt, er úr lífshættu en hann hlaut mjög hættulega áverka á brjótsholi að sögn vakthafandi læknis. Líðan hans er eftir atvikum en hann er nú kominn af gjörgæsludeild á legudeild.

Innlent 4.3.2006 18:02

Loks tapaði Bayern Munchen á heimavelli

Bayern Munchen tapaði sínum fyrsta heimaleik á tímabilinu í þýska Bundesligunni í fótbolta í dag þegar Hamburger SV kom í heimsókn til Munchen og vann 1-2 útisigur. Hollendingurinn Nigel de Jong skoraði sigurmarkið á 89. mínútu eftir að Memeth Scholl hafði jafnað metin fyrir heimamenn, 6 mínútum áður.

Sport 4.3.2006 19:44

Talabani styður ekki al-Jaafari

Stjórnarmyndunarviðræðurnar í Írak flæktust enn í dag þegar Jalal Talabani forseti lýsti því yfir að hann styddi ekki lengur Ibrahim al-Jaafari forsætisráðherra til áframhaldandi setu.

Erlent 4.3.2006 17:07

Toppliðin unnu sína leiki

Tveir leikir fóru fram í DHL-deild kvenna í handbolta í dag þar sem toppliðin tvö unnu bæði leiki sína. Topplið Hauka vann Gróttu örugglega á útivelli, 22-32 og ÍBV lagði Valsstúlkur í Eyjum, 22-18. Haukatúlkur eru efstar með 24 stig en ÍBV í 2. sæti með 23 stig. Valsstúlkur eru í 3. sæti með 22 stig í harðri toppbaráttu hjá stúlkunum.

Sport 4.3.2006 17:45

Jóhannes Karl skoraði tvö fyrir Leicester

Jóhannes Karl Guðjónsson var hetja sinna manna í Leicester og skoraði tvö mörk þegar liðið sigraði Hull, 3-2 í ensku 1. deildinni í fótbolta í dag. Mörk Jóa Kalla komu bæði í seinni hálfleik en hið síðara reyndist sigurmarkið og kom 7 mínútum fyrir leikslok. Jóhannes lék allan leikinn í liði Leicester.

Sport 4.3.2006 17:37

Fuglaflensa í sjötta ríkinu í Þýskalandi

Fuglaflensa hefur nú greinst í Neðra-Saxlandi í Þýskalandi, en þetta er sjötta ríkið í Þýskalandi þar sem hin banvæna veira greinist. Reuters-fréttastofan hefur eftir talsmanni neytendamála í ríkinu að staðfest hafi verið að grágæs sem fannst á sunnudag hafi verið með H5N1-stofn fuglaflensunnar, en hvergi er að finna meira af alifuglum í Þýskalandi en í Neðra-Saxlandi.

Erlent 4.3.2006 17:34