Góður gangur í byggingu nýrrar kerverksmiðju Fjarðaráls

Framkvæmdum miðar vel áfram við byggingu nýrrar kersmiðju Alcoa Fjarðaáls á Reyðarfirði og fögnuðu starfsmenn byggingaverktakanna nýlega 100 þúsund slysalausum vinnustundum við framkvæmdirnar. Tæplega hundrað manns vinna við bygginguna. Kostnaður vegna framkvæmdanna er áætlaður nálægt fjórum milljörðum króna.

Níu starfsmönnum Byrs á Akureyri sagt upp

Níu starfsmönnum Byrs á Akureyri var sagt upp störfum í síðustu viku. Flestir þeirra hafa valið að starfa áfram fram í lok janúar og fresta starfslokum þangað til. Starfsmennirnir störfuðu allir í bakvinnslu. Þetta kemur fram á vefnum Vikudagur.

Arion banki íhugar alþjóðlegt skuldabréfaútboð

Arion banki er að íhuga fyrsta skuldabréfaútboð sitt á alþjóðamörkuðum. Þetta kemur fram í frétt á Bloomberg fréttaveitunni.

Spáir óbreyttum stýrivöxtum

Greining Íslandsbanka spáir því að Peningastefnunefnd haldi stýrivöxtum Seðlabankans óbreyttum á næsta vaxtaákvörðunardegi bankans á miðvikudaginn kemur.

Fyrirtæki á Forbes 500 listanum hafa áhuga á netþjónabúum á Íslandi

Fjöldi fyrirtæki á Forbes 500 listanum, yfir stærstu fyrirtæki heimsins, hafa nú þegar sýnt áhuga á að koma sér upp netþjónbúum eða gagnverum á Íslandi.

Bjóða miða á starfsmannakjörum - 5000 krónur báðar leiðir auk skatta

Iceland Express hefur ákveðið að bjóða 4.576 flugmiða á svokölluðum starfsmannakjörum til almennings. Miðarnir fara í sölu á hádegi á morgun en um er að ræða ferðir nú í desember. Í tilkynningu frá félaginu segir að með tilkomu nýrra Airbus A320 flugvéla hafi sætaframboð félagsins aukist miðað við fyrri flugflota um tæplega fimm þúsund sæti í desembermánuði.

Pálmi Haralds: Ærleg jólahreingerning hjá Iceland Express

Iceland Express er vel í stakk búið til að mæta þörfum viðskiptavina sinna með nýjum flugvélakosti auk þess sem eigandi félagsins hefur lagt því til 1,3 milljarða króna í reiðufé á síðustu mánuðum til að mæta taprekstri þessa árs. Þetta kemur fram í tilkynningu frá félaginu sem í dag tilkynnti um sölu á tæplega fimm þúsund sætum sem almenningur getur keypt á starfsmannakjörum. „Félagið ber engar vaxtaberandi skuldir hjá bönkum og lánastofnunum og mætir endurnýjað aukinni samkeppni og verkefnum sínum á komandi árum með metnaðarfull markmið í farteskinu," segir ennfremur.

Eva Joly kallar eftir ákærum

Eva Joly, sem á sínum tíma var ráðgjafi sérstaks saksóknara í rannsóknum tengdum bankahruninu, segir að nú ættu ákærur að hafa litið dagsins ljós, og þær fleiri en ein. Rætt var við Joly í Silfri Egils á RÚV í dag og þar sagðist hún sýna því skilning að langan tíma taki að rannsaka mál af þessu tagi en bendir á að nú séu liðin þrjú ár og enn hafi engin ákæra verið gefin út á hendur helstu gerendum í hruninu.

Róbert Wessman gaf skýrslu hjá sérstökum saksóknara

Yfirheyrslur hafa staðið yfir í allan dag hjá sérstökum saksóknara vegna rannsóknar á málefnum Glitnis. Á meðal þeirra sem gáfu skýrslu í dag var Róbert Wessman svo og núverandi og fyrrverandi starfsmenn Íslandsbanka.

Yfirheyrslur í fullum gangi

Yfirheyrslur hófust í morgun í Glitnismálinu svokallaða. Ólafur Þór Hauksson sérstakur saksóknari segir að það skýrist í dag hvort yfirheyrslum verði fram haldið á morgun einnig. Að hans sögn er ekkert gefið upp um hvort einhverjir nýir hafi verið kallaðir til yfirheyrslu en þrír eru í gæsluvarðhaldi vegna málsins.

Orka til stóriðju lítt arðbær

Lægri arðsemi heildarfjármagns er af virkjunum fyrir stóriðju hérlendis en þekkist í sambærilegri starfsemi erlendis. Þetta kemur fram í skýrslu um arðsemi orkusölu sem Ásgeir Jónsson og Sigurður Jóhannesson unnu fyrir fjármálaráðuneytið. Arðsemin á Íslandi nam fimm prósentum á árunum 1966 til 2010.

Ríkisskattstjóri skilað tillögum vegna uppgjörs á virðisaukaskatti

Ríkisskattstjóri hefur skilað tillögum til fjármálaráðuneytisins vegna uppgjörs á virðisaukaskatti vegna ólöglegra fjármögnunarleigusamninga. Skattgreiðslurnar, sem nema milljörðum króna, koma út á núlli fyrir ríkissjóð og því ekki talin ástæða til bakfærslu.

Sæstrengurinn verður sá hraðvirkasti

Sæstrengurinn sem Emerald Networks ætlar að leggja frá Írlandi til Bandaríkjanna, með tengingu við Ísland mun hjálpa Íslendingum við að byggja upp skapandi störf og fleiri stoðir í atvinnulífinu sem eru umhverfisvænar. Þetta segir Þorvaldur Sigurðsson, starfsmaður fyrirtækisins á Íslandi. Reuters fréttastofan greindi frá því fyrstur miðla í morgun að til stæði að leggja strenginn á næsta ári. Fjárfestingin nemur 36 milljörðum króna.

Mælaborð frá Datamarket aðgengilegt á Vísi

Ýmsar hagtölur eru nú aðgengilegar á Vísir.is í samstarfi við Datamarket. Mælaborði með upplýsingum er skipt upp í fimm undirflokka; verðlagsþróun, framleiðslu og eftirspurn, utanríkisviðskipti, vinnumarkað og opinber fjármál. Ítarlegar upplýsingar er síðan hægt að nálgast með því að smella á hnapp sem merktur er "Opna á Datamarket“, þar sem færa má upplýsingarnar í víðara samhengi og bera saman hinar ýmsu stærðir sem aðgengilegar eru.

Um 30 yfirheyrðir

Um þrjátíu manns hafa verið yfirheyrðir af embætti sérstaks saksóknara í tengslum við rannsókn á málefnum Glitnis. Hæstiréttur staðfesti í dag gæsluvarðhaldsúrskurði yfir þremur fyrrverandi starfsmönnum bankans.

Rússar vilja líka leggja sæstreng

Össur Skarphéðinsson utanríkisráðherra fékk í dag skriflegt svar frá rússneskum stjórnvöldum um að Rússar vilja láta kanna hvort unnt sé að leggja sæstreng frá Murmansk til Íslands. Fyrr í morgun var greint frá því að til stendur að leggja sæstreng frá Bandaríkjunum til Írlands, í gegnum Ísland, á næsta ári. Sú fjárfesting nemur 36 milljörðum króna.

Salt fagnar rannsókn á viðskiptum með Glitnisbréf

Salt Investment, sem er að mestu leyti í eigu Róberts Wessman, fagnar skoðun sérstaks saksóknara á viðskiptum með bréf Glitnis Talsmenn Salts saka stjórnendur Glitnis um að hafa beitt blekkingum.

Afkoma Strætó jákvæð um 219 milljónir

Afkoma Strætó bs. á fyrstu níu mánuðum þessa árs var jákvæð um tæpar 219 milljónir króna.

Kauphöllin samþykkir viðskipti með hluti í Högum

Kauphöllin hefur samþykkt umsókn stjórnar Haga hf. um töku hlutabréfa félagsins til viðskipa á Aðalmarkaði Kauphallarinnar.

FT: Ísland á leið að verða alþjóðleg miðstöð fyrir netþjónabú

Viðskiptablaðið Financial Times segir að með nýjum sæstreng frá Bandaríkjunum um Ísland og til Írlands hafa vonir Íslands um að verða alþjóðleg miðstöð fyrir netþjónbú færst skrefinu nær raunveruleikanum.

Spáir hægfara styrkingu á krónunni á næstunni

Greining Íslandsbanka spáir því að gengi krónunnar muni styrkjast hægt eftir að árstíðabundin niðursveifla þess í vetur er yfirstaðin.

Gistinóttum fjölgaði um 11% í október

Gistinóttum á hótelum í október síðastliðnum fjölgaði um 11% frá sama mánuði í fyrra. Þær voru 117 þúsund í október síðastliðnum en 105 þúsund í október í fyrra. Erlendir gestir gistu langflestar nætur, 74% af öllum gistinóttum, og fjölgaði um 13% frá október í fyrra. Gistinóttum Íslendinga fjölgaði um 6%.

Actavis kaupir hollenskt fyrirtæki

Actavis, hefur eignast allt hlutafé í hollenska fyrirtækinu PharmaPack International B.V. Kaupverðið er trúnaðarmál. PharmaPack hefur aðsetur í Zoetermeer í Hollandi og sérhæfir sig í pökkun á hefðbundnum lyfjum og líftæknilyfjum.

Nýr sæstrengur lagður milli Íslands og Írlands

Ísland og Írland ætla í sameiningu að standa á bakvið lagningu á nýjum sæstreng milli landanna. Sæstrengur þessi mun kosta um 36 milljarða króna og á hann að komast í gagnið árið 2013.

Staða þjóðarbúsins neikvæð um 833 milljarða

Að frátöldum innlánsstofnunum í slitameðferð námu eignir þjóðarbúsins á þriðja ársfjórðungi ársins 2.529 milljörðum kr. og skuldir 3.361 milljarði kr. Var hrein staða þjóðarbúsins því neikvæð um 833 milljarða kr. eða sem nemur rúmum helmingi af landsframleiðslunni.

Spáir óbreyttum stýrivöxtum

Greining Arion banka spáir því að stýrivöxtum Seðlabankans verði haldið óbreyttum en næsta vaxtaákvörðun bankans er á miðvikudag í næstu viku.

Fokheldar Skuggablokkir eftirsóttar

Mikill áhugi er fyrir kaupum á fasteignum í Skuggahverfinu eftir söluauglýsingu 101 Skuggahverfis og Landeyjar, fasteignafélags Arion banka, sem birt var í vikunni. Um er að ræða tvær íbúðablokkir, Lindargötu 37 og Vatnsstíg 16 til 18. Engin tilboð hafa enn borist í eignirnar, en heimilt er að gera tilboð í aðra þeirra eða báðar saman.

Frestað að skipta OR upp í tvö fyrirtæki

Katrín Júlíusdóttir iðnaðarráðherra mælti í gær fyrir raforkulögum á Alþingi, en í þeim felst heimild til Orkuveitu Reykjavíkur (OR) um að fresta því í tvö ár að skipta fyrirtækinu upp í samkeppnisstarfsemi annars vegar og sérleyfisstarfsemi hins vegar. Frestunin er að beiðni eigendanefndar OR.

Rannsaka lán til Salts og Rákungs

Rannsókn embættis sérstaks saksóknara á Glitni beinist að meintri kerfisbundinni markaðsmisnotkun bankans yfir margra ára tímabil fyrir bankahrun. Hin meintu brot ná allt aftur til ársins 2004 og viðskiptin sem eru rannsökuð nema á annað hundrað milljörðum.

Tveir kærðu strax til Hæstaréttar

Tveir af þeim þremur sem úrskurðaðir voru í gæsluvarðhald í gærkvöldi af Héraðsdómi Rekykjavíkur, í tengslum við rannsókn embættis sérstaks saksóknara á málefnum Glitnis, hafa kært úrskurðinn til Hæstaréttar, samkvæmt heimildum fréttastofu. Ekki er útilokað að þeir geri það allir, þar sem frestur til þess að kæra úrskurðinn er ekki liðinn.

Par með barn í tíu ár að safna fyrir fyrstu íbúðinni

Sé mið tekið af upplýsingum frá Hagstofunni og velferðarráðuneytinu tekur það ungt par með eitt barn um tíu ár að safna fyrir útborgun vegna kaupa á 20 milljóna króna íbúð.

Talið að markaðsmisnotkunin hafi byrjað 2004

Grunur um kerfisbundna markaðsmisnotkun yfir margra ára tímabil, frá 2004 og fram árið 2008, er meðal ástæðna fyrir því að embætti sérstaks saksóknara krafðist gæsluvarðhalds yfir fjórum fyrrverandi starfsmönnum Glitnis.

Lýsing gefi ekki út greiðsluseðla

Lýsing ætti að stöðva útgáfu greiðsluseðla til viðskiptavina sinna þar til endanleg niðurstaða fæst í mál Smákrana gegn Lýsingu fyrir Hæstarétti. Þetta segir Einar Hugi Bjarnason, lögmaður Smákrana ehf., í samtali við Vísi.

Lýsing áfrýjar dómnum

Lýsing hefur ákveðið ða áfrýja niðurstöðu Héraðsdóms Reykjavíkur í máli Smákrana ehf gegn félaginu til Hæstaréttar. Í tilkynningu á vef Lýsingar segir að þetta hafi verið ákveðið eftir að forsvarsmenn fyrirtækisins hafi skoðað forsendur dómsins í samráði við lögmenn félagsins.

Allt flug Iceland Express á áætlun

Iceland Express vill koma því á framfæri að aðgerðir flugmanna tékkneska flugfélagsins CSA, sem er móðurfélag CSA Holidays sem flýgur fyrir Iceland Express, hafa engin áhrif á starfsemi félagsins. Samtök flugmanna hjá félaginu segja að flugmenn verði hvattir til að taka veikindadaga á næstu dögum til að mótmæla fyrirhuguðum breytingum á stjórnunarstöðum í fyrirtækinu.

Fóru fram á varðhald vegna gruns um kerfisbundna markaðsmisnotkun

Dómari í Héraðsdómi Reykjavíkur féllst ekki á gæsluvarðhaldskröfu embættis sérstaks saksóknara, er beindist að Elmari Svavarssyni, fyrrum miðlara hjá Glitni, þar sem dómari taldi ekki sannanir liggja fyrir um að hann hefði átt þátt í kerfisbundinni markaðsmisnotkun, eins og honum var gefið að sök í kröfugerðinni.

Enn lækkar Icelandair

Gengi bréfa í Icelandair hefur haldið áfram að lækka í dag eftir snarpa lækkun í gær. Gengi bréfa í gær lækkaði um 2,75% og það sem af er degi hefur gengi bréfa í félaginu lækkað um 2,63%.

Lýsing tapaði í héraðsdómi

Héraðsdómur Reykjavíkur komst að þeirri niðurstöðu í morgun að fjármögnunarleigusamningar sem Lýsing gerði við viðskiptavini sína hafi í raun verið gengistryggð íslensk lán. Slíkir samningar hafi því verið ólöglegir. Dómurinn var kveðinn upp í máli sem fyrirtækið Smákranar ehf höfðuðu gegn Lýsingu.

Hagnaður Arion nam 3,5 milljörðum

Hagnaður Arion banka á þriðja ársfjórðungi ársins nam 3,5 milljörðum króna eftir skatta en árshlutareikningurinn inniheldur reikninga bankans og dótturfélaga. Á sama tímabili í fyrra var hagnaður bankans 1 milljarður króna. Hagnaður Arion banka á fyrstu níu mánuðum ársins var 13,6 milljarðar króna, samanborið við 8,9 milljarða króna á sama tímabili í fyrra.

Nýr aðstoðarforstjóri hjá Icelandic Water

Icelandic Water, sem er í eigu Jóns Ólafssonar, hefur ráðið Roger Barry sem aðstoðarforstjóra á alþjóðdeild fyrirtækisins. Í tilkynningu segir að þetta sé gert til að styrkja stöðu fyrirtækisins á mörkuðum utan Norður Ameríku.

Brottförum seinkaði mikið frá Keflavík

Nærri níu af hverjum tíu flugvélum sem tóku á loft frá Kaupmannahöfn, Ósló og Stokkhólmi í sumar fóru á réttum tíma. Hinsvegar seinkaði brottförum í meira en helmingi tilvika á Keflavíkurflugvelli í júní, eftir því sem fram kemur á vefnum Túristi.is. Ástandið á Keflavíkurflugvelli batnaði þegar leið á sumarið og í ágúst fóru 71,6 prósent véla í loftið á auglýstum tíma. Á sama tímabili stóðust tímasetningar í 93 prósentum tilvika í Ósló og Stokkhólmi.

Verð á ótryggðri raforku hækkar um 80-100%

Ljóst er orðið að gífurlegar hækkanir hafa orðið á ótryggðri raforku frá orkusölum. Hækkunin nemur 80-100% að því er segir á vefsíðu Orkuvaktarinnar.

Ekki ljóst hvort Glitnismenn hafi kært gæsluvarðhald

Ekki liggur enn fyrir hvort þrír fyrrverandi stjórnendur Glitnis, sem voru úrskurðaðir í allt að viku gæsluvarðhald í gærkvöldi, hafa kært úrskurðina til Hæstaréttar.

Hefur yfirtekið 2.000 íbúðir

Íbúðalánasjóður hefur yfirtekið rúmlega 2.000 íbúðir frá árinu 2006. Flestar þessara íbúða eða um fjórðungur er á Suðurnesjum. Bókfært verð þeirra eru rúmir 19 milljarðar króna.

Skuldatryggingaálag Íslands hefur hækkað töluvert

Skuldatryggingaálag Íslands hefur hækkað nokkuð á síðustu vikum og náði sínu hæsta gildi á árinu í síðustu viku þegar álagið stóð í 358 punktum. Álagið hefur síðan lækkað að nýju í þessari viku og stóð í 349 punktum í gærdag samkvæmt gögnum úr Bloomberg gagnaveitunni.