Nældu í lykilfólk hjá Nóa Siríus og Bauhaus

Fram kemur í tilkynningu frá Dröngum að Sigríður Hrefna Hrafnkelsdóttir, sem hætti störfum sem forstjóri Nóa Siríus, hefur verið ráðin framkvæmdastjóri Samkaupa, móðurfélags verslunarkeðjanna Nettó, SPAR, Prís, Kjörbúðarinnar, Krambúðarinnar, Heimkaupa og 10-11. Hún gegndi starfi forstjóra Nóa Síríus frá árinu 2023. Áður starfaði hún hjá Íslandsbanka sem framkvæmdastjóri einstaklingssviðs frá árinu 2017.

Sigríður Hrefna er með embættispróf í lögfræði frá Háskóla Íslands og með MBA-gráðu frá Copenhagen Business School. Hún hefur víðtæka leiðtogareynslu í ýmsum atvinnugreinum bæði hérlendis og erlendis.

„Mikil uppbygging hefur átt sér stað í rekstri félaga Samkaupa. Þar má meðal annars nefna nýja ásýnd Nettó sem mælist vel hjá viðskiptavinum. Prís fagnaði nýlega tveggja ára afmæli sínu og hefur frá opnun mælst ódýrasta verslunin samkvæmt athugunum ASÍ,“ segir í tilkynningu frá Dröngum.

„Jafnframt hefur fimm Krambúðum hefur verið breytt í SPAR-verslanir með tilkomu nýs viðskiptasamnings við alþjóðlegu verslunarkeðjuna. Með samningnum hefur SPAR getað lækkað verð í verslunum ásamt því að styrkja bæði vöruúrval og verslunarupplifun viðskiptavina.“

Hörður framkvæmdastjóri Orkunnar

Hörður Ingi Þórbjörnsson hefur verið ráðinn framkvæmdastjóri Orkunnar. Hann hefur starfað hjá Orkunni frá árinu 2021 sem mannauðsstjóri og tók sæti í framkvæmdastjórn 2025 sem forstöðumaður rekstrar og mannauðs. Hörður stundaði nám í alþjóðlegri markaðsfræði í Kaupmannahöfn.

„Orkan er leiðandi fyrirtæki á eldsneytis- og hraðhleðslumarkaði sem rekur 75 stöðvar um allt land þar sem markmiðið er að bjóða lægsta verðið í öllum landshlutum. Áhersla Orkunnar er á gott aðgengi viðskiptavina að hreinum og snyrtilegum stöðvum þar sem búnaðurinn virkar vel,“ segir í tilkynningunni.

Ásgeir framkvæmdastjóri Lyfjavals

Ásgeir Bachmann hefur verið ráðinn framkvæmdastjóri Lyfjavals. Hann var áður framkvæmdastjóri Bauhaus þar sem hann starfaði frá árinu 2014. Ásgeir er viðskiptafræðimenntaður frá Háskólanum á Bifröst og hefur víðtæka þekkingu og reynslu af smásölumarkaði.

„Lyfjaval er vaxandi fyrirtæki í smásölu lyfja sem leggur áherslu á fjölbreytta og aðgengilega þjónustu við viðskiptavini, m.a. í bílalúgum og með sólarhringsopnun,“ segir í tilkynningunni.

Auður Daníelsdóttir, forstjóri Dranga, segir frábært að fá öfluga stjórnendur með víðtæka reynslu og þekkingu úr viðskiptalífinu til að leiða áframhaldandi þróun og uppbyggingu rekstrarfélaganna.

„Samkaup er á spennandi tímamótum og er það okkur mikið gleðiefni að fá Sigríði Hrefnu til að stýra félaginu í áframhaldandi sókn á dagvörumarkaði. Hörður þekkir rekstur Orkunnar vel og nýtur trausts okkar til að leiða áframhaldandi vöxt félagsins. Þá er Ásgeir sömuleiðis mikilvægur liðsauki fyrir Lyfjaval til að leiða uppbyggingu og þróun þeirrar þjónustu sem í boði er.

Drangar er eitt stærsta verslunar- og þjónustufyrirtæki landsins. Sameiginlegt markmið okkar og rekstrarfélaganna er að þróa heildstæðar lausnir sem mæta þörfum viðskiptavina. Það verður ánægjulegt að vinna með nýju og öflugu stjórnendateymi að því að efla reksturinn og þróa þjónustuna enn frekar. Við erum rétt að byrja.“

Drangar er móðurfélag rekstrarfélaga sem starfa á smásölumarkaði um allt land. Félagið sameinar nokkur vörumerki undir einn hatt. Þar má nefna Nettó, Prís, Spar, 10-11, handverksbakaríið Brauð & Co., Orkuna, Löður og lyfjaverslanir Lyfjavals. Þjónustustöðvar Dranga eru yfir 150 um allt land og starfsmannafjöldinn um 1600 manns að því er segir í tilkynningunni.