Tveir kærðu strax til Hæstaréttar

Tveir af þeim þremur sem úrskurðaðir voru í gæsluvarðhald í gærkvöldi af Héraðsdómi Rekykjavíkur, í tengslum við rannsókn embættis sérstaks saksóknara á málefnum Glitnis, hafa kært úrskurðinn til Hæstaréttar, samkvæmt heimildum fréttastofu. Ekki er útilokað að þeir geri það allir, þar sem frestur til þess að kæra úrskurðinn er ekki liðinn. Frestur til þess að kæra í málum sem þessum er innan þriggja sólarhringa.

Þessir tveir lýstu því yfir þegar úrskurðurinn lá fyrir að hann yrði kærðu til Hæstaréttar. Embætti sérstaks saksóknara getur ekki kært þá niðurstöðu að hafna því að setja Elmar Svavarsson, miðlara, í varðahald og því er sú niðurstaða endanleg.

Eins og greint hefur verið frá, þá voru Jóhannes Baldursson, fyrrverandi framkvæmdastjóri markaðsviðskipta Glitnis, Lárus Welding, fyrrverandi forstjóri Glitnis, og Ingi Rafnar Júlíusson, fyrrverandi starfsmaður bankans, allir úrskurðaðir í varðhald í gær, á grundvelli rannsóknarhagsmuna. Ekki liggja fyrir upplýsingar um hverjir það voru sem kærðu niðurstöðuna strax til Hæstaréttar, en það eru sem sagt tveir af þessum þremur hér að ofan.

Í tilkynningu frá embætti sérstaks saksóknara frá því í gær kemur fram að rannsókn málsins tengdist einkum fjórum þáttum. Þeir eru:

1. Kaup eigin viðskipta Glitnis á hlutabréfum útgefnum af bankanum á verðbréfamarkaðinum. Einnig kaup bankans og ráðstöfun á hlutabréfum útgefnum af FL Group.

2. Lánveitingar til ýmissa félaga vegna kaupa á hlutabréfum útgefnum af bankanum í lok árs 2007 og á árinu 2008. Upphaflegur höfuðstóll nefndra lánveitinga er talinn nema samtals tæpum 37 milljörðum króna.

3. Viðskipti með framvirka samninga í hlutabréfum útgefnum af bankanum.

4. Sölutrygging Glitnis á 15 milljarða hlutafjárútboði FL Group áramótin 2007 og 2008.

Til rannsóknar er grunur um meint brot á auðgunarbrotakafla hegningarlaga í tengslum við ráðstafanir á fjármunum Glitnis, brot á lögum um verðbréfaviðskipti, lögum um fjármálafyrirtæki, lögum um ársreikninga og lögum um bókhald.

Upphaf rannsókna á málunum má m.a. rekja til kæra frá Fjármálaeftirlitinu og síðan rannsókna slitastjórnar Glitnis.