Dauf byrjun í Kauphöllinni

Lækkun einkennir byrjun dags í Kauphöllinni. Gengi Bakkavarar hefur lækkað um 0,82 prósent, Össurar um 0,51 prósent og Marel Food Systems um 0,13 prósent.

Spáir því að 200.000 Danir gætu misst vinnuna

Seðlabanki Danmerkur, Nationalbanken, spáir því að allt að 200.000 Danir gætu misst vinnuna á næstu tveimur árum. Bankinn segir að fari allt á versta veg verði kreppan í landinu í ár sú versta frá lokum seinni heimstryjaldarinnar.

Salan hjá Debenhams minnkaði um 3,3%

Salan hjá verslanakeðjunni Debenhams, sem er að hluta til í eigu Baugs, minnkaði um 3,3% á síðasta ársfjórðungi ársins 2008. Þá tilkynnti verslankeðjan Next að salan hjá þeim hefði minnkað um 7% á síðustu sex mánuðum.

Annað stærsta ár Flugfélagsins frá upphafi

Fjöldi farþega Flugfélags Íslands dróst saman um 2% á árinu 2008 miðað við árið 2007 en árið varð annað stærsta ár félagsins frá upphafi. Heildarfjöldi farþega í áætlunarflugi var um 420 þúsund þar af voru um 22 þúsund farþegar í millilandaflugi til Færeyja og Grænlands.

MP Banki hf. fær bankanúmerið 700

Fjármálaeftirlitið veitti MP Banka hf. viðskiptabankaleyfi þann 10. október sl. Leyfið var í fyrstu veitt til 31. desember 2008. Eftir frekari samskipti FME og MP Banka hf. hefur bankinn nú fengið staðfest viðskiptabankaleyfi.

Skortur á gasi í Evrópulöndum innan nokkurra tíma

Búið er að skrúfa fyrir gasleiðslur frá Rússlandi á landamærum Rúmeníu og þýðir það að gasskortur verður í Búlgaríu, Grikklandi, Tyrklandi og Makedóníu innan nokkura tíma.

Mikið verðfall á húsnæði í Bretlandi

Verð á húsnæði í Bretlandi lækkaði að meðaltali um 15,9 prósent á nýliðnu ári, samkvæmt upplýsingum breska fasteignalánaveitandans Nationwide.

Seðlabankinn velur þröngu viðskiptavogina

Ákveðið hefur verið að breyta grunni einnar af fjórum gengisvísitölum Seðlabankans þannig að 2. janúar 2009 taki hún sama gildi og gengis­skrán­ingarvísitalan.

Gjaldþrot Sterling með því stærsta í Danmörku

Gjaldþrot Sterling flugfélagsins í Danmörku stefnir í að verða eitt það stærsta í Danmörku á síðustu árum. Kröfur í þrotabúið nema nú 870 milljónum danskra kr. eða hátt í 20 milljörðum kr. og fer kröfunum enn fjölgandi.

Tæplega 83 milljarða kr. viðsnúningur á vöruskiptum

Fyrstu ellefu mánuðina 2008 voru fluttar út vörur fyrir 413,1 milljarð króna en inn fyrir 442,0 milljarða króna. Hallinn á vöruskiptunum við útlönd nam 28,9 milljörðum en á sama tíma árið áður voru þau óhagstæð um 111,6 milljarða á sama gengi. Vöruskiptajöfnuðurinn var því 82,7 milljörðum króna hagstæðari en á sama tíma árið áður.

Japönsk hátæknifyrirtæki rjúka upp

Um helmingur asískra hlutabréfavísitalna sýndi hækkun í morgun, þó ekki alltaf mikla. Japanska Nikkei-vísitalan hækkaði um tæplega hálft prósentustig en hátæknifyrirtæki eiga mestu hækkanir dagsins, til að mynda hækkuðu bréf Samsung-fyrirtækisins um tæplega 4,5 prósentustig.

Olíverð hækkar áfram

Heimsmarkaðsverð á olíu heldur áfram að hækka og er nú komið upp í 48 dollara á tunnuna. Það er hækkun um hátt í tíu dollara á skömmum tíma. Ástæðan er meðal annars sögð óróinn í Mið-Austurlöndum og ótryggt ástand í Nígeríu, þar sem uppreisnarmenn sprengdu upp olíuleiðslu um helgina.

Ríkisstjórnin styður málshöfðanir gegn Bretum

Skilanefnd Kaupþings hefur afráðið að höfða mál gegn breskum stjórnvöldum og nýtur til þess fulls stuðnings ríkisstjórnarinnar, eftir því sem fram kemur í tilkynningu frá forsætisráðuneytinu.

Útlán nýju ríkisbankanna yfir leyfilegu hámarki

Útlán nýju bankanna til nokkurra einstaklinga og fyrirtækja eru yfir leyfilegu hámarki. Það þýðir að skuldir einstakra aðila geta numið 50 milljörðum eða meira. Forstjóri fjármálaeftirlitsins segir unnið að því að laga þetta.

Hyggst stofna sjóð til að tryggja innistæður í Luxemborg

Fjármálaráðherra Belgíu mun leggja til á morgun að stofnaður verði sjóður sem tryggi innistæður á reikningum Kaupþings í Luxemborg. Samningaviðræður um sölu bankans hafa legið niðri undanfarnar vikur en munu nú að öllum líkindum hefjast aftur.

Century Aluminum hækkaði mest í Kauphöllinni

Gengi hlutabréfa í Century Aluminum, móðurfélagi Norðuráls, hækkaði um 1,85 prósent í Kauphöllinni í dag. Gengi bréfa í Marel Food Systems fylgdi á eftir með 0,9 prósent hækkun. Þá hækkaði gengi bréfa í Eimskip um 0,81 prósent og í Færeyjabanka um 0,41 prósent.

Ætla að tryggja innistæður Kaupþings í Luxemborg

Didier Reynders fjármálaráðherra Belgíu mun leggja til á morgun að stofnaður verði sjóður sem tryggi innistæður á reikningum Kaupþings í Luxemborg.

Veltan á fasteignmarkaðinum minnkaði um 78% í desember

Fjöldi þinglýstra kaupsamninga um fasteignir við sýslumannsembættin á höfuðborgarsvæðinu í desember 2008 var 157. Þegar desember 2008 er borinn saman við desember 2007 fækkar kaupsamningum um 71% og velta minnkar um 77,8%.

Mrs Moneypenny vongóð um innstæðu sína hjá Kaupþingi

Mrs Moneypenny, ein af þekktari dálkahöfundum Financial Times er vongóð um að fá borgaða innistæðu sem hún brann inni með hjá Singer & Friedlander bankanum í London þegar Kaupþing varð gjaldþrota í haust.

Stjórnarformaður Tals vísar gagnrýni á bug

Meirihluti stjórnar tók ákvörðun um það að segja Hermanni upp störfum og ráða nýjan forstjóra og sú ákvörðun stendur, segir Þórdís J. Sigurðardóttir, stjórnarformaður Tals.

Kaupþingsmaður í stjórastöðu hjá Carlsberg

Bruggverksmiðjurnar Carlsberg í Danmörku hafa ráðið Peter Kondrup í stöðu forstjóra yfir samskiptasviði fjárfesta hjá verksmiðjunum. Kondrup er fyrrum yfirmaður í greiningardeild Kaupþings í Danmörku.

Gengisvísitala krónunnar heyrir sögunni til

Viðbúið er að sú mikla áhersla á gengisvísitölu krónu sem verið hefur í hérlendum gjaldeyrisviðskiptum síðustu ár heyri að verulegu leyti sögunni til. Slík viðskipti verði hér eftir fyrst og fremst með einstaka gjaldmiðla gagnvart krónunni.

Hrun bankanna hefur kostað 6.600 manns atvinnuna

Atvinnulausum á Íslandi hefur fjölgað um rúmlega 6.600 manns frá því að íslenska bankakerfið hrundi í haust.

Krefst forstjórastöðu Tals á ný

Hermann Jónasson sem nýverið var sagt upp störfum sem forstjóri Tals fundaði með starfsfólki fyrirtækisins í morgun.

Met sett í skipakomum á Grundartanga í fyrra

Nú liggur fyrir að skipakomur á Grundartanga árið 2008 voru fleiri en nokkru sinni fyrr. Flutningar um höfnina eru um 1.3 milljón tonn, en fjöldi skipa á árinu var 271, sem er nokkur aukning frá því sem best þekktist áður.

Marel eitt á uppleið

Gengi hlutabréfa í Marel Food Systems hefur hækkað um 0,51 prósent í Kauphöllinni í dag. Þetta er eina hækkunin það sem af er. Á móti hefur gengi bréfa í Straumi lækkað um 0,54 prósent.

Reikna með að olíuverðið fari í 70 dollara fyrir áramótin

Mikill meirihluti markaðssérfræðinga í olíusölu reiknar með að heimsmarkaðsverð á olíu fari í 70 dollara á tunnuna á síðasta ársfjórðungi þessa árs. Þetta kemur fram í umfjöllun um þróun olíuverð á Bloomberg-fréttaveitunni.

Hlutabréf í Carnegie hafa fimmfaldast í verði

Hlutabréf í sænska bankanum Carnegie fimmfölduðust í verði yfir áramótin. Við lok markaðarins á föstudag voru hlutirnir seldir á 1,25 kr. sænskar en fyrir áramót er HQ Direct hóf viðskipti með hlutina utanmarkaðar þann 29. desember var verð þeirra 25 aurar sænskir.

Verslunarkeðja í eigu Milestone á barmi gjaldþrots

Breska verslunarkeðjan Blooming Marvellous rambar nú á barmi gjaldþrots en keðjan er að stórum hluta í eigu Milestone í gegnum fjárfestignarsjóðinn Kcaj.

Rætt við Philip Green og Alchemy um kaup á Mosaic Fashion

Derek Lovelock forstjóri Mosaic Fashion hefur átt viðræður við bæði fjárfestingarfélagið Alchemy og breska auðjöfurinn sir Philip Green um sölu á Mosaic Fashion. Þetta kemur fram í frétt á Reuters í dag.

Asíubréf á uppleið áttunda daginn í röð

Hlutabréf á Asíumörkuðum hækkuðu í morgun, áttunda daginn í röð og er þar með um lengstu samfelldu hækkun bréfa þar í álfu að ræða síðan árið 2004.

Segja lausafé Mosaic vera að þurrkast upp

Mosaic sem meðal annars rekur verslanir Karen Millen, Oasis og Principles hefur hafið viðræður við lánadrottna félagsins. Það er The Sunday Times sem segir frá þessu í dag.

Iceland Express í viðræðum um meirihlutaeign í F.Í

Forstjóri Ferðaskrifstofu Íslands, móðurfélags Úrvals Útsýnar, Sumarferða og Plúsferða, fullyrðir að tekist hafi að bjarga fyrirtækinu í dag með aðkomu nýrra fjárfesta. Brottför flugvélar til Kanaríeyja hefur frestast frá því í morgun vegna greiðsluerfiðleika.

Ferðaskrifstofa Íslands á barmi gjaldþrots

Flugi sem átti að fara frá Íslandi til Tenerife klukkan 07:00 í morgun hefur verið frestað til klukkan 18:00. Farþegarnir eru á vegum Ferðaskrifstofu Íslands sem er á barmi gjaldþrots. Félagið hefur tilkynnt Samgönguráðuneytinu um erfiðleika sína en forstjórinn vill ekki meina að félagið sé gjaldþrota. Um hundrað störf eru í húfi. Heimildir Vísis herma að fjárfestir sé í viðræðum um kaup á félaginu.

Rafmagnsbíll Mitsubishi á íslenskum þjóðvegum

Japanski bílaframleiðandinn Mitsubishi ætlar að gera íslendingum kleift að keyra MiEV rafmagnsbílinn sinn fyrstir allra í komandi framtíð. Þannig ætlar bílaframleiðandinn að hjálpa íslendingum að ná takmarki sínu um að vera lausir við jarðefnaeldsneyti árið 2050.

Bresk stjórnvöld kynna aðgerðaráætlun á vinnumarkaði

Bresk stjórnvöld hyggjast nota 10 milljarða punda á þessu ári til að efla atvinnulífið í landinu. Þetta kom fram í máli Gordons Brown, forsætisráðherra Bretlands, í viðtali við breska ríkisútvarpið, BBC

Forbes segir eignir Björgólfs engar

Björgólfur Guðmundsson situr í fjórða sæti á lista Forbes viðskiptatímaritsins yfir þá sem tapað hafa mest á árinu. Eignir hans voru metnar á 1,1 milljarð badaríkjadala í mars á síðasta ári en eignir hans nú eru sagðar núll.

Þurfa að leita nýrra leiða til að bjarga fjármálamörkuðum

Bresk stjórnvöld verða væntanlega að grípa til nýrra aðgerða til að koma þarlendum fjármálamörkuðum til bjargar. Þrátt fyrir margra milljarða punda innspýtingu á síðasta ári hafa breskir bankar haldið áfram að draga úr útlánum.

Forstjóri Tals: Óþægilegt að láta öryggisvörð fylgja sér út

Hermanni Jónassyni forstjóra Tals var sagt upp störfum 30. desember sl. Ástæðan er sögð sú að hann hafi gert samning við Símann án þess að hafa samráð við stjórn fyrirtækisins en annar samningur var í gildi við Vodafone. Hermann segist eingöngu hafa haft hagsmuni viðskiptavina Tals að leiðarljósi og vísar því á bug að stjórnin hafi ekki vitað af samningnum. Öryggisvörður og lögfræðingur stóðu yfir honum þegar hann yfirgaf vinnustað sinn. „Óþægileg tilfinning," segir Hermann sem íhugar að leita réttar síns.

Krónan styrktist lítillega

Gengi krónunnar styrktist um 0,2% í dag og stendur gengisvísitalan nú í rétt tæpum 216 stigum. Bandaríkjadalur kostar nú tæpar 122 krónur, evran liðlega 168 krónur og sterlingspund 176.

Ný hlutabréfavísitala innleidd

Frá og með deginum í dag mun hefjast útreikningur á OMXI6 nýrri hlutabréfavísitölu á NASDAQ OMX Iceland sem tekur við hlutverki OMXI15. ,,Nýir tímar kalla á nýja vísitölu. OMXI6 Úrvalsvísitalan miðar að því að búa í haginn fyrir endurreisn hlutabréfamarkaðarins á Íslandi”, segir Þórður Friðjónsson, forstjóri NASDAQ OMX Iceland í tilkynningu.

Century Aluminum hækkaði um 24 prósent

Gengi hlutabréfa í Century Aluminum, móðurfélagi Norðuráls, hækkaði um 24,3 prósent í Kauphöllinni í dag. Þetta er langmesta hækkunin á þessum fyrsta viðskiptadegi ársins.

Kristján hættur hjá Kaupþingi

Kristján Arason hefur látið af störfum hjá Kaupþingi sem framkvæmdastjóri viðskiptabankasviðs bankans. Kristján tilkynnti samstarfsmönnum þetta í tölvupósti fyrir stundu.

Markaðir í Evrópu byrja vel á nýju ári

Evrópsk hlutabréf hækkuðu víðast hvar í verði á fyrsta viðskiptadegi ársins. FTSEurofirst 300 vísitalan sem nær yfir alla Evrópu hækkaði um 2,6 prósent í dag en hún hafði fallið um heil 44 prósent árið 2008. Helsta skýring þessa er hækkandi verð á fyrirtækjum í orkugeiranum og félög á borð við BP, Shell og Total fóru upp um 4,2 og 5,1.

400 gætu misst vinnuna hjá Bakkavör

Bakkavör hefur uppi áform um að endurskipuleggja rekstur sinn í Lincolnshire á Englandi þar sem félagið rekur þrjú matvælaframleiðslufyrirtæki. Um 400 manns gætu misst vinnuna að því er segir í frétt BBC um málið.