Met sett í skipakomum á Grundartanga í fyrra

Nú liggur fyrir að skipakomur á Grundartanga árið 2008 voru fleiri en nokkru sinni fyrr. Flutningar um höfnina eru um 1.3 milljón tonn, en fjöldi skipa á árinu var 271, sem er nokkur aukning frá því sem best þekktist áður.

Fjallað er um málið á heimasíðu Faxaflóahafna. Þar segir um ástæður aukningarinnar að Elkem hefur m.a. verið að breyta framleiðslu sinni sem kallar á meiri umsvif en einnig hefur framleiðsla Norðuráls aukist á síðustu árum.

Þá er í auglýsingu nýtt deiliskipulag fyrir Klafastaðahluta Grundartangans þar sem til verða yfir 100 iðnaðarlóðir sem Faxaflóahafnir telja vafalaust verða spennandi kostur fyrir alls kyns atvinnustarfsemi.

„Nokkrir áhugasamir aðilar hafa verið að spyrjast fyrir um lóðir og er þar m.a. fyrirspurn Elkem Solar um lóð undir afar spennandi framleiðslu," segir á heimasíðunni.