Stjórnarformaður Tals vísar gagnrýni á bug

,,Meirihluti stjórnar tók ákvörðun um það að segja Hermanni upp störfum og ráða nýjan forstjóra og sú ákvörðun stendur," segir Þórdís J. Sigurðardóttir, stjórnarformaður Tals.

Hermann Jónasson sem nýverið var sagt upp störfum sem forstjóri Tals krefst þess að fá á ný að gegna forstjórastarfinu. „Þeir reyna að búa til nýtt "scenario" á hverjum degi til þess að reyna að láta okkur líta illa út,“ segir Þórdís um álitsgerð sem henni var nýverið afhent.

Stefán Geir Þórisson, lögmaður Hermanns, kemst að þeirri niðurstöðu uppsögn Hermanns og ráðning nýs forstjóra hafi verið ólögmæt. Þórdís segir að svo virðist sem að Hermann átti sig ekki á því hvernig samskipti eigi að vera á milli framkvæmdastjóra og stjórna fyrirtækja.

Hermanni var vikið frá störfum 30. desember auk þess sem samningi sem Tal hafði skömmu áður gert við Símann var rift. Jóhann Óli Guðmundsson sem situr í stjórn Tals er afar ósáttur við vinnubrögð meirihlutans og hefur jafnframt sagt að ákvörðunin sé ólögmæt. ,,Menn geta verið ósáttir en það kom upp trúnaðarbrestur og þeir verða að virða ákvarðanir meirihlutans," segir Þórdís.

Þórdís segir að Hermann og Jóhann Óli séu með yfirlýsingum sínum að eyðileggja fyrirtækið og grafa undan starfsemi þess.

Ekki hefur verið farið fram á að stjórn Tals komi saman. Stjórnarfundir eru að jafnaði haldnir á þriggja mánaða fresti.