Lánar­drottnar slá af milljarð af vöxtum á ári

Í fréttatilkynningu þess efnis segir að ákvörðun lánveitendanna staðfesti frábæran árangur í rekstri Alvotech og aukna tiltrú á rekstur félagsins.

„Alvotech er í dag með flest hliðstæðulyf í þróun í heiminum samkvæmt opinberum upplýsingum. Síðastliðið ár hafa tekjur félagsins vaxið gríðarlega, félagið hefur skilað góðum rekstrarhagnaði og jákvæðri EBITDA-framlegð. Við gerum ráð fyrir að rekstur Alvotech skili jákvæðu sjóðstreymi á árinu 2025 og því er ekki þörf til að fjármagna rekstur félagsins frekar. Vaxtalækkunin sýnir traust þessara reyndu stofnanafjárfesta, sem hafa mikla þekkingu á lyfjaiðnaðinum, á árangri okkar í lyfjaþróun og framtíðaráætlunum félagsins,“ er haft eftir Joel Morales, framkvæmdastjóra fjármálasviðs Alvotech.

Lánasamningurinn sem um ræðir hafi verið undirritaður í júní 2024 og sé með lokagjalddaga í júlí 2029. Upprunalega hafi verið um að ræða lán í tveimur hlutum. Annar þeirra, að fjárhæð 900 milljóna bandaríkjadala, hafi borið 6,5 prósenta álag á SOFR-millibankavexti og hinn hlutinn, að fjárhæð 65 milljóna bandaríkjadala, hafi verið 10,5 prósenta álag á SOFR. Lánveitendurnir hafi nú ákveðið að fella hlutana saman í eitt lán sem muni bera 6,0 prósenta álag á SOFR. Lánið nemi nú um 1.081 milljón bandaríkjadala en félagið hafi átt 152 milljónir bandaríkjadala í lausafé þann 25. júní síðastliðinn.