Hyggst stofna sjóð til að tryggja innistæður í Luxemborg

Fjármálaráðherra Belgíu mun leggja til á morgun að stofnaður verði sjóður sem tryggi innistæður á reikningum Kaupþings í Luxemborg. Samningaviðræður um sölu bankans hafa legið niðri undanfarnar vikur en munu nú að öllum líkindum hefjast aftur.

Reynders, fjármálaráðherra Belgíu, sendi frá sér tilkynningu þess efnis í dag. Áður höfðu stjórnvöld í Lúxemborg undirritað skilyrtan samning við Líbýska fjárfestingarsjóðinn sem hyggst taka bankann yfir. Meðal skilyrða var t.a.m. að samningar myndu nást við lánadrottna bankans og Belgísk stjórnvöld. Sjóðurinn sem fjármálaráðherra Belgíu leggur til að verði stofnaður myndi vera fjármagnaður með fé frá stjórnvöldum þar í landi og Lúxemborg.

Framlag Belgíu í þennan sjóð mun nema tæpum 17 milljörðum íslenskra króna og mun sjóðurinn tryggja innistæður sparifjáreigenda upp að allt að 20.000 evrum á hvern innistæðureikning til að byrja með. Sú trygging myndi síðar aukast þannig að innistæður yrðu tryggðar að fullu þegar kæmi fram í apríl. Líbýski fjárfestingarsjóðurinn mun að auki tryggja fjármögnun bankans.

Samningaviðræður milli fjárfesta og stjórnvalda í Lúxemborg og Belgíu hafa staðið yfir undanfarnar vikur. Viðræður komust í uppnám eftir afsögn forsætisráðherra Belgíu og hefur ekkert gerst í þessum málum frá því fyrir jól. Fjármálaráðherran mun leggja fram formlega tillögu um sjóðinn á ríkisstjórnarfundi á morgun og eftir það er líklegt að samningaviðræður muni fara aftur í gagn.