Lögreglan lýsir eftir Nubiu

Lögreglan á Hvolsvelli lýsir eftir Nubiu Silva, 15 ára, til heimilis á Hvolsvelli. Ekki er vitað um ferðir hennar síðan að kvöldi 5. ágúst síðastliðinn. Nubia Silva er er tæpir 160 sentimetrar á hæð, grannvaxin með dökkt sítt hár. Ekki vitað með vissu hvernig hún var klædd. Talið er að Nubia Silva sé á Höfuðborgarsvæðinu. Þeir sem hafa orðið varir eða vita um ferðir Nubiu Silva, eru vinsamlegast beðnir um að hafa samband við lögregluna á Hvolsvelli í síma 488 4110.

Eru strandaglópar í Skotlandi

Flugvél Iceland Express frá Kaupmannahöfn sem lenda átti á Keflavíkurflugvelli klukkan hálffimm í dag, varð að lenda af öryggisástæðum á flugvellinum í Innernes í Skotlandi. Engin hætta reyndist á ferðum, en viðvörunarljós virðist hafa bilað. Um borð voru 146 farþegar og áhöfn.

Miðbærinn ljómaði í gær

Miðbærinn ljómaði allur um miðjan dag í gær þegar Gay Pride gangan stóð sem hæst. Fjöldi fólks lét sjá sig og þar á meðal var sjálfur borgarstjórinn, Jón Gnarr, sem sýndi stuðning sinn við jafnréttisbaráttuna með því að taka þátt í göngunni. Bjarni kvikmyndatökumaður á fréttastofu Stöðvar 2 og Vísis fangaði stemninguna í miðbænum og Fannar Scheving Edwardsson klippti myndskeiðið.

Svissneskum hjónum bjargað úr Skyndidalsá

Svissneskum hjónum var bjargað af þaki bíls sem sat fastur í Skyndidalsá, sem rennur í Jökulsá í Lóni. Samkvæmt upplýsingum frá Slysavarnafélaginu Landsbjörg voru það félagar úr björgunarfélagi Hornafjarðar sem kom hjónunum til bjargar. Þau höfðu klifrað upp á þak bílsins um leið og hann festist.

Hálf milljón safnaðist í skákmaraþoni

Hálf milljón safnaðist á Skákmaraþoni íslenskra barna fyrir sveltandi börn í Sómalíu í gær en einnig verður teflt fyrir málstaðinn í dag. Alls hafa 30 milljónir safnast á styrktarreikning Rauða krossins frá upphafi söfnunar vegna hungursneyðar í Austur-Afríku.

Rútan enn á bólakafi

Ellefu tékkneskir ferðamenn sluppu naumlega þegar rúta með þeim innanborðs sökk í Blautulóni á Fjallabaksleið nyrðri í Vatnajökulsþjóðgarði síðdegis í gær. Þeir náðu að synda í land í átta gráðu köldu vatni en rútan er enn föst á margra metra dýpi.

Vill sérstakan skatt á útflutningsfyrirtækin

Setja ætti sérstakan skatt á vörur sem fluttar eru út frá landinu, segir Lilja Mósesdóttir, þingmaður utan flokka. Lilja sagði í þættinum Sprengisandi á Bylgjunni í morgun að með því að leggja um 10% skatt á útflutningsfyrirtæki væri hægt að ná inn 80 milljörðum í ríkissjóð án þess að útflutningsfyrirtæki, eins og sjávarútvegsfyrirtæki finndu mikið fyrir því.

Viðey verður hinsegin í dag

Viðey fagnar Hinsegin dögum í dag með skemmtilegri fjölskyldudagskrá og regnbogaveitingum í Viðeyjarstofu. Söngur, leikir og andlitsmálning verða í boði og jafnframt verður efnt til ljósmyndakeppni meðal gesta.

Veitingastað lokað vegna ölvunar starfsmanna

Veitingastaðnum Langa Manga á Ísafirði var lokað í nótt vegna þess að starfsmenn staðarins voru ölvaðir. Samkvæmt heimildum Vísis var ekki mjög fjölmennt á staðnum og því gekk ágætlega að rýma hann.

Grunur um að hundi hafi verið stolið í innbroti

Brotist var inn í íbúð í fjölbýlishúsi í Norðurmýrinni í Reykjavík laust eftir miðnætti í nótt. Innbrotsþjófarnir fóru inn um svefnherbergisglugga og höfðu á brott með sér tvær fartölvur. Húsráðendur sakna einnig chihuahua-hunds, en ekki er ljóst hvort að hinir óprúttnu aðilar hafi tekið hann með sér eða hann hreinlega sloppið út. Málið er í rannsókn.

Reyna að planka sig upp í hæstu einkunn

Tveir Íslendingar og Breti planka við fræg kennileiti í Árósum til að hljóta hæstu einkunn fyrir skólaverkefni. Gjörningurinn hefur vakið athygli einnar af stærstu sjónvarpsstöðvum Danmerkur.

Of lítil nýliðun í matvælaiðnaðinum

Matvæla-og veitingafélag Íslands beitir sér nú fyrir því að hvetja ungt fólk til að læra þjóninn, kokkinn og bakarann og mennta sig í kjötiðnaði. Töluvert vantar af matreiðslumönnum til starfa, einkum yfir sumartímann, og skortur er á iðnmenntuðum í hinum greinunum. Níels Olgeirsson, formaður Matvís, hefur áhyggjur af þessari þróun.

Rúmlega 26 milljóna vinningur í lottó

Heppinn lottóspilari fékk allar tölur réttar í úrdrætti dagsins, og vann þar sem rúmar 26 milljón krónur. Miðinn var seldur í Happahúsinu, Kringlunni.

Hinsegin dagar ná hámarki í dag

Hátíðin Hinsegin Dagar í Reykjavík, sem hófst á fimmtudag, nær hámarki í dag með gleðigöngu og útiskemmtun. Búist er við fjölmenni í miðborginni en veðurspáin fyrir daginn er góð.

Tíu teknir fyrir vörslu fíkniefna

Tíu voru teknir fyrir vörslu fíkniefna á höfuðborgarsvæðinu í nótt, þar af voru tveir grunaðir um sölu og dreifingu. Þrír ökumenn voru teknir fyrir akstur undir áhrifum fíkniefna og tveir fyrir ölvunarakstur. Fimm gistu fangageymslur lögreglunnar.

Vill funda með seðlabankastjóra

Lilja Mósesdóttir þingmaður utan flokka óskar eftir fundi seðlabankastjóra með efnahags-og skattanefnd til að ræða nýleg útboð sem lið í losun hafa á fjármagnsviðskiptum, gagnrýni OEDC á peningastefnu bankans, kosti þjóðarinnar í gjaldmiðilsmálum í ljósi vandans á evrusvæðinu og leiðir til að draga úr vægi verðtryggingar.

Áfram í gæsluvarðhaldi vegna ásökunar um nauðgun

Héraðsdómur Suðurlands úrskurðaði í morgun mann sem setið hefur í gæsluvarðhaldi grunaður um nauðgun í Vestmanneyjum 31. júlí síðastliðinn í áframhaldandi gæsluvarðhald til annars september 2011 klukkan tvö. Áfram er unnið að rannsókn málsins og verða frekari upplýsingar um gang hennar ekki veittar að sinni.

Nær blindur maður ætlar í langhlaup með hvíta stafinn

Víða um borgina má sjá skokkara koma sér í form fyrir Reykjavíkurmaraþonið en blaðamenn Fréttablaðsins ráku þó upp stór augu í fyrrakvöld þegar þeir sáu Þórð Pétursson hlaupa meðfram Miklubrautinni en hann er nær blindur og notast því við blindrastaf á skokkinu.

Eigendum verði gert að sækja námskeið

Innflutningsbann á hunda af varðhundategundum leysir engan vanda. Þetta segir Halldór Runólfsson yfirdýralæknir, sem vill miklu fremur sjá að eigendum og kaupendum slíkra hunda verði gert skylt að sækja þar til gert námskeið með þá, ella fái þeir ekki leyfi til að halda þá.

Það verður að fækka verkefnum ríkisins

Árni Páll Árnason segir að lengra verði ekki komist í niðurskurði eða skattahækkunum. Skera verði niður þá þjónustu sem ríkið bjóði upp á. Hann gagnrýnir aðila vinnumarkaðarins fyrir að spenna bogann of hátt í kjarasamningum.

Ný starfsgrein varð til með næturopnun

Á bilinu sextíu til sjötíu manns vinna hjá Securitas við öryggisgæslu og afgreiðslustörf samtímis. Í raun má segja að um nýja starfsgrein sé að ræða hér á landi sem á tilurð sína að þakka næturopnunum verslana, en yfir fjörutíu verslanir á höfuðborgarsvæðinu eru nú opnar allan sólarhringinn.

Frjókorn mældust vel yfir meðallagi

Frjókorn í Reykjavík mældust vel yfir meðallagi í júlímánuði og mældust um 2.000. Er mánuðurinn í hópi þriggja júlímánaða þegar fjöldi frjókorna hefur mælst svo mikill, en í fyrra urðu þau tæplega 4.000 og sumarið árið 1991 fóru frjókorn í um 2.500. Þetta kemur fram í tilkynningu frá Náttúrustofnun Íslands.

Staðan verst þar sem mannfjöldi er mestur

„Það er auðvitað rík krafa á þjónustu kirkjunnar. Þess vegna þarf að fara yfir það hvað er hægt að ganga langt í niðurskurði,“ segir Ingibjörg Pálmadóttir, sem stýrir hópi á vegum innanríkisráðuneytis sem skoðar fjármál Kirkjunnar. Hópurinn á að skoða hvaða áhrif niðurskurður á framlögum til Kirkjunnar hefur haft og hve langt er hægt að ganga í þeim efnum.

Karlmaður lést við köfun

Íslenskur maður á fertugsaldri lést þegar að hann var við köfun við brúna yfir Eyrasund ásamt tveimur félögum sínum í gær. Mannsins var leitað úr þyrlu eftir að hann varð viðskila við félaga sína og fannst látinn eftir nokkra leit. Maðurinn var búsettur í Svíþjóð.

Íslenskir verkfræðinemar slá í gegn

Íslenskir verkfræðinemendur hlutu verðlaun frá Airbus á alþjóðlegri hönnunarkeppni sem haldin var í Bretlandi á dögunum - fyrir rafknúinn kappakstursbíl sem hópurinn hannaði.

Geðlæknar anna ekki eftirspurn

Geðlæknar anna ekki eftirspurn og veikir einstaklingar geta þurft að bíða í allt að þrjá mánuði eins og fréttastofa komst að í dag. Formaður geðlæknafélags Íslands segir þetta óþolandi langan tíma en geðlækna vanti einfaldlega hér á landi.

Hátt í áttahundruð stúdentar í húsnæðisvanda

Hátt í átta hundruð háskólastúdentar eru á biðlista eftir íbúðum hjá Félagsstofnun stúdenta. Framkvæmdastjóri stofnunarinnar segir ófremdarástand ríkja í húsnæðismálum námsmanna og almennur leigumarkaður sé of dýr fyrir þennan hóp. Dæmi séu um að fólk hringi grátandi til þeirra vegna húsnæðisvandræða.

Níu nauðgunarmál eftir verslunarmannahelgi

Alls hafa níu nauðgunarmál komið upp eftir verslunarmannahelgina. Þrjár nauðganir hafa verið kærðar til lögreglu.

Útskrifuð af sjúkrahúsi eftir líkamsárás

Sextán ára stúlka sem var barin í höfuðið með hamri af jafnöldru sinni í Kópavogi í nótt hefur verið útskrifuð af slysadeild. Stúlkan sem réðst á hana verður kærð fyrir grófa líkamsárás en samkvæmt heimildum fréttastofu hefur hún áður komist í kast við lögin, m.a. vegna ofbeldisbrota. Sauma þurfti tuttugu og þrjú spor í höfuð stúlkunnar en hún reyndist ekki höfuðkúpubrotin. Ofbeldisstúlkan var handtekinn skömmu eftir árásina ásamt kærasta sínum en þeim var sleppt að loknum yfirheyrslum. Stúlkurnar þekktust lítillega en greindi á um eitthvað sem leiddi til árásarinnar.

Alvarlegt umferðarslys við Jökulsá á Dal

Alvarlegt umferðarslys var við Jökulsá á Dal um fjögurleytið í dag. Fjórir slösuðust, þar af einn alvarlega, en enginn mun vera í lífshættu. Verið er að sækja fólkið og koma því til byggða. Sá sem mest slasaðist verður fluttur með sjúkraflugi til Reykjavíkur en hinum verður veitt aðhlynning á sjúkrahúsi á Egilsstöðum.

Kosið milli Sigrúnar og Kristjáns Vals

Kosið verður milli sr. Sigrúnar Óskarsdóttur og sr. Kristjáns Vals Ingólfssonar í síðari umferð í vígslubiskupskjöri í Skálholti. Kosningu til embættisins lauk fimmtudaginn 28. júlí og atkvæði voru talin föstudaginn 5. ágúst. Á kjörskrá eru 149 menn og greidd voru 146 atkvæði. Kjörsókn var 98%, samkvæmt tilkynningu frá Kirkjunni.

Skoða niðurskurð á framlögum til kirkjunnar

Ögmundur Jónasson innanríkisráðherra hefur skipað nefnd til að meta hvaða áhrif niðurskurður fjárveitinga hafi haft á starfsemi þjóðkirkjunnar og hverjar yrðu afleiðingarnar ef haldið yrði áfram á þeirri braut. Nefndin kom saman til síns fyrsta fundar á miðvikudaginn og mun skila áliti til ráðherra fyrir 1. maí á næsta ári.

Örtröð í Leifsstöð

Aldrei í sögu Flugstöðvar Leifs Eiríkssonar hafa fleiri farþegar farið um flugstöðina í júlímánuði en í þeim mánuði sem nú er nýliðinn. Samtals fóru 332.501 farþegar um flugstöðina. Þar til nú í ár var júlímánuður 2007 sá stærsti í sögu flugstöðvarinnar en þá fóru samtals 309.004 farþegar um stöðina.

Samningafundi leikskólakennara lauk án niðurstöðu

„Það komu engar nýjar lausnir á fundinum. Hann var samt ekki til einskis,“ segir Haraldur Freyr Gíslason, formaður Félags leikskólakennara. Forystumenn félagsins fundaði í allan dag með viðsemjendum sínum um kjaramál. Haraldur segir að fundurinn í dag hafi verið mikilvægur varðandi framhald umræðna. Næsti fundur er á mánudaginn.

Rannsókn lokið á máli fyrrverandi fangelsisstjóra á Kvíabryggju

Lögreglan hefur lokið rannsókn á máli Geirmundar Vilhjálmsson, fyrrverandi fangelsisstjóra á Kvíabryggju. Málið verður sent til ríkissaksóknara á næstu dögum sem tekur ákvörðun um hvort ákæra verður gefin út. Geirmundur var handtekinn og húsleit gerð á heimili hans í mars vegna gruns um stórfelldan fjárdrátt á meðan hann gegndi starfi sínum á Kvíabryggju. Honum var vikið frá störfum á síðasta ári eftir að Fangelsismálastofnun beindi því til ráðuneytis dómsmála að rannsaka fjármál fangelsisins á Kvíabryggju. Þá hefur Ríkisendurskoðun gert alvarlegar athugasemdir við fjárreiður fangelsisins. Talið er að Geirmundur hafi notað fé og eigur fangelsins til einkanota. Meðal annars er hann grunaður um að hafa notað greiðslukort fangelsisins í eigin þágu, og að hafa selt vörubíl í eigu ríkisins, sem fangelsið hafði til afnota, hirt sjálfur ágóðann en tilkynnt fangelsismálayfirvöldum að bíllinn hafi verið ónýtur.

Reykjavík orðin Bókmenntaborg UNESCO

Reykjavíkurborg hefur verið útnefnd ein af Bókmenntaborgum UNESCO. Reykjavík er fimmta borgin í heiminum til að hljóta þennan titil, en fyrir í samtökum Bókmenntaborga UNESCO eru Edinborg í Skotlandi, Iowa City í Bandaríkjunum, Melbourne í Ástralíu og Dublin á Írlandi. Reykjavík er því fyrsta borgin utan enska tungumálasvæðisins til að hljóta titilinn, sem er varanlegur að því tilskyldu að borgirnar standi undir skuldbindingum sínum. Í útnefningunni segir meðal annars að Reykjavík státi af framúrskarandi bókmenntahefð í formi ómetanlegra miðaldabókmennta sem varðveittar eru í borginni og eru Íslendingasögurnar, Eddukvæði og Íslendingabók nefnd sérstaklega. Þá segir að þessi rótgróna hefð sýni sig í varðveislu, miðlun, bókmenntakennslu og kynningu bókmennta í dag. Einnig er tekið til þess að svo fámenn borg sinni bókmenntum af svo miklum krafti sem raun ber vitni, með þátttöku og samvinnu ólíkra aðila sem koma að bókmenningu og miðlun bókmennta, svo sem útgefenda, bókasafna og rithöfunda. "Ég fagna því innilega að Reykjavík skuli hafa verið valin bókmenntaborg UNESCO. Þetta er mikill heiður fyrir Reykjavík. Íslendingar eru þekktir fyrir listir og menningu út um allan heim og þetta er staðfesting á því hvað menning okkar er verðmæt. Af öllum okkar auðæfum er menningin dýrmætust," segir Jón Gnarr borgarstjóri, sem fékk tilkynningu um útnefninguna í gær. Ali Bowden, framkvæmdastjóri Bókmenntaborgarinnar Edinborgar segir: "Við erum himinlifandi yfir því að Reykjavík hafi sé komin í hóp Bókmenntaborga UNESCO. Útnefningin mun eiga þátt í að vekja athygli á bókmenntum og bókmenntalífi borgarinnar út um allan heim. Hún mun stuðla að menningarlegum vexti borgarinnar líkt og gerst hefur í Edinborg og Reykjavík verður mikilvægur samstarfaðili í okkar alþjóðlega samstarfsneti."

Formaður Félags leikskólakennara: Menn eru að tala saman

Búist er við að samningafundur fulltrúa leikskólakennara og samninganefndar sveitarfélaga standi fram eftir degi. Fundurinn hófst klukkan hálf ellefu í morgu en engir fundir hafa verið haldnir á síðustu vikum. Leikskólakennarar hafa boðað til verkfalls þann 22.ágúst næstkomandi ef kjarasamningar nást ekki fyrir þann tíma. "Menn eru að tala saman," segir formaður Félags leikskólakennara, Haraldur F. Gíslason, í samtali við fréttastofu en gefur annars lítið upp um gang mála.

Dómarinn tók sér frest - farið fram á 4 vikna gæsluvarðhald

Gæsluvarðhald yfir manni sem grunaður er um nauðgun við salernisaðstöðu á Þjóðhátíð í Vestmannaeyjum rann út klukkan ellefu í morgun.

Ætla að uppræta svarta atvinnustarfsemi

Farið hefur verið í rúmlega tólf hundruð fyrirtæki og vinnustaði um allt land í átaki ríkisskattstjóra, Samtaka atvinnulífsins og ASÍ gegn svartri atvinnustarfssemi frá því í byrjun sumars og eru nú hundruð mála til skoðunar sem lúta að virðisauka-skattsskilum og tekjuskatti einstaklinga.

Umfangsmikil kannabisræktun stöðvuð á Suðurnesjum

Fíkniefnadeild lögreglunnar á Suðurnesjum stöðvaði umfangsmikla kannabisræktun í heimahúsi á fimmtudag. Við húsleitina var lagt hald á um 200 kannabisplöntur á ýmsum ræktunarstigum. Einnig var lagt hald á búnað til ræktunar. Húsráðandinn var handtekinn á staðnum og við yfirheyrslu viðurkenndi hann ræktunina og telst málið upplýst. Lögreglan á Suðurnesjum minnir á fíkniefnasímsvarann, sem er 800-5005. En þangað er hægt að hringda nafnlaust með ábendingar um fíkniefnamisferli.

Buðu farþegum í Bláa lónið vegna seinkunar

Iceland express hefur vegna seinkunar á flugi í morgun boðið farþegum í Bláa lónið þar sem einnig verður matur á boðstólnum. Um er að ræða seinkun á flugi félagsins til Almeria á Spáni vegna bilunar í vél. Upphaflega var fluginu seinkað til ellefu en nú hefur verið gefið út að næstu upplýsingar fáist klukkan eitt eftir hádegið. Flugvélin sem átti að fara til Almeria er nú á Egilsstöðum þar sem hún lenti á leið sinni frá London. Unnið er að viðgerðum á vélinni. Einhverjir farþegar eru á leið í Bláa lónið en ósáttur farþegi sem hafði samband við fréttastofu segir konurnar margar hafa áhyggjur af því að allt snyrtidót þeirra sé í farangrinum og þær geti því ekki málað sig eftir ferð í Bláa lónið. Þá segist hann óttast að ástæður þess að farþegum sé boðið í mat og í Bláa lónið vera þá að búist sé við frekari seinkunum.

Breytingar vegna Gay Pride

Talsverðar breytingar verða á akstri Strætó á morgun vegna gleðigöngu Hinsegin daga og hátíðahalda í miðborginni.

Dregur úr líkum á hlaupi í Skaftá

Verulega hefur dregið úr líkum úr hlaup úr eystri Skaftárkatli. Mæligildi aurs og leiðni eru ennþá há, en rennsli árinnar hefur ekki aukist. Sérfræðingur hjá Veðurstofunni segir þessar veiflur skýrast fyrst og fremst af dægursveiflu jökulleysingar og því að vestari ketilinn er að tæmast.

Formaður Þjóðhátíðarnefndar: Niðurlægjandi að sitja undir froðusnakki

"Að halda því fram Eyjamenn velji til að stjórna hátíðinni, menn sem stjórnist af gróðasjónarmiðum, styðji nauðgunarmenningu og eru skjól fyrir kynferðisbrotamenn, er óráðshjal. Það er niðurlægjandi fyrir Vestmannaeyinga að sitja undir jafn ömurlegu froðusnakki."

Fiskidagurinn mikli settur í dag

Fjölskylduhátíðin Fiskidagurinn mikli hefst á Dalvík hefst í dag. Þetta er í ellefta sinn sem hátíðin er haldin en hún verður sett í Dalvíkurkirkju klukkan sex með Vináttukeðjunni svokölluðu, þar sem fram koma meðal annars Friðrik Ómar og Matti Matt. Um fimm þúsund friðardúfublöðrum verður sleppt og flugeldum skotið á lofti. Fiskverkendur og aðrir framtakssamir í byggðarlaginu bjóða gestum og gangandi upp á ljúffenga fiskrétti milli klukkan 11.00 og 17.00 á laugardag. Matseðillinn breytist ár frá ári þó vinsælir réttir fyrir ára fái iðulega að halda sé, svo sem fiskborgararnir. Þeir eru grillaðir á lengsta grilli landsins en grillið er færiband og á því steikjast borgararnir um átta metra leið. Frekari upplýsingar um hátíðina má finna með því að smella hér.