Aukin harka í prófkjöri Sjálfstæðisflokksins

Aukin harka virðist vera hlaupin í prófkjör Sjálfstæðisflokksins í Reykjavík. Stjórn flokksins og frambjóðendum barst fyrir helgina nafnlaust bréf þar sem Guðlaugur Þór Þórðarson, þingmaður Sjálfstæðisflokksins og frambjóðandi í prófkjöri Sjálfstæðisflokksins í Reykjavík, og kosningastjórn hans voru sökuð um að hafa misnotað aðstöðu sína.

Actavis með þrjú ný samheitalyf í Tyrklandi

Actavis hefur markaðssett þrjú ný lyf í Tyrklandi sem öll verða seld undir eigin merkjum. Fram kemur í tilkynningu frá fyrirtækinu að um sé að ræða þunglyndislyfið Xenator, blóðþrýstingslyfið Blockace og og ofnæmislyfið Vivafeks.

Hægt verður að greiða með kreditkortum fyrir bílastæði

Bjóða á upp á tímabundin kort og skafmiða til að greiða fyrir bílastæði í miðborginni, auk þess unnt verður að greiða fyrir notkun stæða með kreditkortum. Þetta var ákveðið á fundi Framkvæmdaráðs Reykjavíkurborgar í dag en finna á nýjar leiðir til að auðvelda viðskiptavinum að greiða fyrir bílastæði í miðborginni.

Skýrir sjónarmið Íslands í hvalveiðimálum fyrir starfsbræðrum

Jónína Bjartmarz umhverfisráðherra sat í morgun undirbúningsfund Norðurlandaráðherra fyrir umhverfisráðherrafund Evrópusambandsins sem haldinn er í Lúxemborg í dag. Þar kynnti hún sjónarmið og forsendur þeirrar ákvörðunar Íslands að hefja aftur hvalveiðar í atvinnuskyni.

Fjármálaráðherra opnar sundlaug

Á laugardaginn vígði Árni M. Mathiesen fjármálaráðherra, í fjarveru heilbrigðisráðherra, nýja 25 metra útisundlaug, ásamt sérhönnuðum nuddpottum á Heilsustofnun NLFÍ í Hveragerði. Bryndís Guðnadóttir, markaðsstjóri HNLFÍ segir á fréttavefnum Suðurland.is, að sund- og baðaðstaðan verði ein sú stærsta og fullkomnasta sem fyrirfinnst hjá fyrirtæki í heilbrigðisgeiranum hér á landi.

Gera prófanir til að hægt verði að vara við eldgosum í Kötlu

Almannavarnir framkvæma í dag prófanir á notkun hljóðbomba sem hægt verður að nota til að vara ferðamenn að Fjallabaki við eldgosum í Kötlu.

Liðsmenn sérsveitar Ríkislögreglustjóra kallaðir að Nordica hóteli

Liðsmenn sérsveitar Ríkislögreglustjóra voru kallaðir að Nordica hóteli klukkan nú klukkan eitt eftir að tilkynning barst um mann á hótelinu með byssu. Gerðar voru viðeigandi ráðstafanir hjá lögreglunni en við nánari athugun reyndist um leikfangabyssu að ræða.

Brotist inn í húsnæði Rauða krossins í Hveragerði

Brotist var inn í aðstöðu Rauða krossins í Hveragerði í nótt og þaðan meðal annars stolið fartölvu, skjávarpa og netsímatæki. Segir á vef lögreglunnar að hugsanlega hafi einhverju fleiru verið stolið en verið sé að fara yfir það.

Íbúðaverð hækkar og verðbólga með

Íbúðaverð heldur áfram að hækka á höfuðborgarsvæðinu sem aftur hækkar vísitölu neysluverðs þannig að verðbólgan eykst á ný.

Vilja að Hvalur eða Norðmenn greiði leiðina

Hvalur 9 er kominn út á miðin og hóf leit að hval upp úr klukkan tíu í morgun. Hrefnuveiðimenn ætla að hefja veiðar í vikunni en þeir búast ekki við að geta selt kjöt á Japansmarkað fyrr en í vor þegar annaðhvort fyrirtækið Hvalur eða Norðmenn hafa greitt leiðina á Japansmarkað.

Viðbrögð Breta ekki eins sterk og búist hafði verið við

Sænsk stjórnvöld eru ævareið hvalveiðum Íslendinga og skora á þá að þeim verði hætt hið fyrsta. Að mati sendiherra Íslands í Bretlandi eru viðbrögðin þar í landi við aflabrögðum helgarinnar ekki eins sterk og búist hafði verið við.

Breytinga þörf í umhverfismálum

Samkvæmt yfirmanni náttúruverndarsamtakanna WWF þarf heimsbyggðin að taka sig verulega á til þess að forðast loftslagsbreytingar til hins verra

Landbúnaðarnefnd fjallar um samkeppnismál í næsta mánuði

Landbúnaðarnefnd Alþingis mun í næsta mánuði fjalla um nýfallinn úrskurð Samkeppniseftirlitsins þar sem því var beint til landbúnaðarráðherra að beita sér fyrir lagabreytingum svo mjólkuriðnaðurinn yrði ekki undanþeginn samkeppnislögum eins og nú er.

Aflaverðmæti eykst um nærri tíu prósent

Aflaverðmæti íslenskra skipa jókst um tæplega fjóra milljarða króna á fyrstu sjö mánuðum þessa árs miðað við sama tíma í fyrra. Aflaverðmætið var um 46 milljarðar króna í lok júlí síðastliðins en aukningin milli ára nemur nærri tíu prósentum.

Varnarsamningurinn inn bakdyramegin

Össur Skarphéðinsson sagði í þætti Silfri Egils í dag Sjálfstæðismenn lauma varnarsamningnum inn bakdyramegin. Hann deildi hart á að kjörnir einstaklingar á þingi fái ekki að ræða innihald samningsins. Þá sagði Össur klofninginn innan Sjálfstæðisflokksins ótrúlegan í ljósi tímasetningar rétt fyrir prófkjör.

Meintur læknadópsali sýknaður

Héraðsdómur Reykjaness hefur sýknað mann af ákæru fyrir brot gegn lyfjalögum, en maðurinn var afhjúpaður af fréttaskýringaþættinum Kompási fyrir ólöglega sölu á svokölluðu læknadópi. Í þætti Kompáss sem sýndur var seint á síðasta ári voru tvær tálbeitur notaðar til þess að kaupa lyf hjá ákærða en þátturinn fjallaði um hversu auðvelt er að nálgast læknadóp á Íslandi.

Hrefnuveiðmenn í startholunum

Hvalur níu fór aftur út til veiða í dag. Hrefnuveiðimenn hyggja einnig á veiðar, Njörður strax um miðja vikuna og aðrir nokkurum dögum síðar.

SUS á móti ríkisrekstri og leyniþjónustu

Ekkert vandamál að selja hvalkjötið

Ögmundur Jónasson skammar Jón Baldvin vegna njósnamáls

Ögmundur Jónasson, þingmaður vinstri grænna, er harðorður í garð Jóns Baldvins Hannibalssonar, á heimasíðu sinni, vegna framkomu hans við Svavar Gestsson, meðan Jón Baldvin var utanríkisráðherra.

Lögreglan í Reykjavík vissi af hlerunum

Pétur Gunnarsson blaðamaður sem var lögreglumaður fyrir tuttugu árum, segir að á þeim tíma hafi lögreglan í Reykjavík vitað af hlerunum úr símstöð í húsi lögreglunnar. Þetta kom fram í þættinum Silfri Egils nú í hádeginu, en þar sagði Pétur: “Það vissu allir að það var símstöð í húsinu sem var í umsjá útlendingaeftirlitsins og fíkniefnalögreglunnar."

Íslendingar sýna alþjóðasamfélaginu fingurinn

Með því að draga dauða langreyði á land í Hvalfirði sýna Íslendingar alþjóðasamfélaginu fingurinn. Þannig metur Ian Campbell, umhverfisráðherra Ástralíu stöðuna. Alþjóðleg náttúruverndarsamtök segja blóð flæða í íslensku sjávarmáli.

Aukin misskipting og möguleg gjaldtaka

Skert þjónusta til innflytjenda getur leitt til aukinnar misskiptingar í samfélaginu. Þetta segir Einar Skúlason framkvæmdastjóri Alþjóðahúss, en borgarstjórn ákvað í vikunni að skerða fjárframlög til hússins um rúmlega þriðjung. Alþjóðahús veitir bæði almenna og sérhæfða ráðgjöf til innflytjenda, en á vegum hússins er meðal annars lögfræðingur í fullu starfi.

Sex nýir áfangastaðir hjá Iceland Express

Flugfélagið Iceland Express hefur ákveðið að fjölga áfangastöðum sínum úr átta í fjórtán en næsta sumar munu þeir bjóða flug til París, Basel, Eindhoven, Billund, Bergen og Ósló. Áfram verður flogið til Kaupmannahafnar, Lundúna, Alicante, Berlínar, Frankfurt, Friedrichshafen, Gautaborgar og Stokkhólms.

Fimmtán gefa kost á sér í prófkjöri Samfylkingar í Rvk

Frestur til að tilkynna um framboð í prófkjöri Samfylkingarinnar í Reykjavík fyrir Alþingiskosningarnar næsta vor rann út fyrr í dag. Fimmtán gáfu kost á sér.

Hellisheiðavirkjun vígð

Hellisheiðarvirkjun var vígð í dag að viðstöddu fjölmenni. Framleiðsla á heitu vatni hefst árið 2009 og er virkjuninni ætlað að anna eftirspurn eftir heitu vatni fram til ársins 2025.

Rektor vill auka sjálfsaflafé HÍ

Háskóli Íslands brautskráði í dag 380 kandídata við hátíðlega athöfn í Háskólabíói. Kristín Ingólfsdóttir rektor segist vilja auka sjálfsaflafé skólans. Heildarfjöldi brautskráðra nemenda frá Háskóla Íslands er þá rúmlega 1,600 á þessu ári, þar af ríflega 100 úr mastersnámi og 13 sem ljúka doktorsprófi.

Ekki við Samfylkingu að sakast

Engin ástæða er til að óttast að skráningar hafi ekki borist kjörstjórn Samfylkingarinnar í Norðausturkjördæmi, að mati Helenar Karlsdóttur, formanns stjórnarinnar. Í fréttum NFS í gærkvöldi gagnrýndi Benedikt Sigurðarson kjörstjórnina harðlega og sagði klúður hafa orðið í rafrænni skráningu nýrra flokksmanna. Helena sagði, í samtali við fréttastofu í dag, að fullyrðingar Benedikts væru rangar. Búið væri að rannsaka málið gaumgæfilega og að klúðrið, sem Benedikt nefnir svo, megi rekja til einstaklinganna sjálfra en ekki til heimasíðu flokksins. Helena segir að frambjóðendum hafi verið boðið að skila inn athugasemdum og nú sé búið að taka tillit til þeirra ábendinga.

Segir andstæðinga Sjálfstæðisflokksins standa fyrir ógeðfelldri aðför að Birni

Geir H. Haarde forsætisráðherra segir pólitíska andstæðinga Sjálfstæðisflokksins hafa staðið fyrir ógeðfelldri aðför að Birni Bjarnasyni dómsmálaráðherra vegna hleranamálsins svokallaða. Hann segir að óprúttnir menn reyni að koma höggi á Björn meðan hann standi í erfiðri prófkjörsbaráttu. Geir H. Harde ræddi þessi mál meðal annars á fundi í Valhöll í morgun. Hann neitar því alfarið að ekki hafi ríkt fullur trúnaður milli hans og Björns Bjarnasonar og það sé einfaldlega valdabarátta í flokknum.

Samningur um uppbyggingu Rýmisins

Tryggingamiðstöðin og Leikfélag Akureyrar hafa gert samning um uppbyggingu nýjasta sýningarsviðs LA sem nefnt er Rýmið. Margir þekkja Rýmið betur undir nafninu Dynheimar eða Lón en það stendur við Hafnarstræti 73 á Akureyri. Síðast var húsnæðið notað undir menningarstöð ungs fólks eða þegar hún fluttist í Brekkuskóla fékk Leikfélag Akureyrar afnot af húsnæðinu.

Rann eina 50 metra niður fjallið

Tólf ára drengur datt og rann eina fimmtíu metra niður hlíðar Esjunnar. Drengurinn slasaðist á fæti og er töluvert kvalinn en slökkviliðs- og björgunarsveitarmenn eru á leið til hans sem og bráðatæknir slökkviliðsins og er gert ráð fyrir að þeir komi á slysstað innan skamms. Slysið varð utan í Þverfellshorni, í töluverðri hæð, á almennri gönguleið.

Fyrsti vetrardagur í dag

Í dag er fyrsti vetrardagur og þótt lítið sé um snjó á suð-vestur horni landsins þá er ekki svo um allt land. Á vef Bæjarins besta er skemmtileg mynd af börnum að leik í snjó og á myndinni má sjá myndarlegan snjókarl en fyrsti snjórinn féll á Ísafirði fyrir rúmri viku.

Nýtt fjarskiptafyrirtæki mun reka öryggis- og neyðarþjónustu

Gengið hefur verið rá samkomulagi við 112 hf um stofnun nýs fjarskiptafyrirtækis. Öryggisfjarskipti ehf. sem mun byggja upp og reka fullkomið Tetra fjarskiptakerfi fyrir öryggis- og neyðarþjónustu um allt land.Uppsetning kerfisins á að vera lokið næsta vor og munu allir helstu viðbragðsaðilar lýst yfir vilja til að nota kerfið. Öryggisfjarskipti ehf. er að mestu í eigu ríkissjóðs en 112 hf á einnig hlut í því og annast rekstur þess.

Sækja slasað barn á Esjuna

Tólf ára barn datt á Esjunni og meiddi sig á fæti og er neyðarsveit slökkviliðsins á leið á staðinn til aðstoðar barninu. Ekki er vitað hve alvarlegt slysið er en búið er að kalla út björgunarsveitir. Slysið átti sér stað utan í Þverfellshorni en þar er almenn gönguleið. Barnið er í talsverðri hæð og gerir slökkviliðið ráð fyrir því að það muni taka nokkurn tíma að koma því til hjálpar. Ekki er vitað að svo stöddu hvort barnið var í fylgd fullorðinna.

Grundvöllur að sókn skólans í fremstu röð

Kristín Ingólfsdóttir, rektor Háskóla Íslands, sagði við útskrift 380 kandídata í dag að vísindasamstarf kennara og vísindamanna í öllum deildum og stofnunum skólans við erlenda skóla og vísindamenn í fremstu röð væri fjársjóður sem skólinn myndi grundvalla á sókn sína á næstu árum. Innan Háskólans eru vísindamenn í samstarfi um á annað hundrað alþjóðleg verkefni með mörgum af fremstu háskóla- og vísindastofnunum í heiminum.

Uppreisnarinnar í Ungverjalandi 1956 minnst

Ólafur Ragnar Grímsson, forseti Íslands er nú á leið til Búdapest þar sem hann mun taka þátt í viðburðum til minngar um uppreisnina í Ungverjalandi fyrir fimmtíu árum. Dagskráin hefst á morgun og mun standa fram á mánudag og munu margir helstu þjóðarleiðtogar heims taka þátt.

Kynna umferðaröryggismál

Í dag býður umferðarstofa upp á frítt mat á aksturshæfni ökumanna undir leiðsögn prófdómara. Hjá Frumherja á Hesthálsi er búið að koma upp tækjum og þrautum fyrir alla fjölskylduna og þar verða kynnt ýmis mál er tengjast öryggi í umferðinni.

Fyrsti hvalurinn veiddur

Áhöfnin á Hval níu hefur fangað væna langreyði úti fyrir Snæfellsnesi og hefur sett stefnuna á Hvalfjörð. Birtuskilyrði hafa gert hvalföngurum erfitt fyrir og einnig hefur orðið vart við bilarnir í Hval níu. Að sögn Kristjáns Loftssonar, forsjóra Hvals, er búist við að skipið komi að bryggju í Hvalfirði í fyrramálið gangi allt að óskum.

Lítið sem ekkert samræmi

Ekki virðist vera samræmi milli þess hve margir stúdentar útskrifast á landsbyggðinni og hve margir þeirra stunda háskólanám. Að þessari niðurstöðu kemst Þóroddur Bjarnason prófessonr við Háskólann á Akureyri en hann hefur borið saman skiptingu fjárveitinga þessa fjárlagaárs á háskólastigi til heilsársnema.

Raflögnum og rafbúnaði víða ábótavant

Úttekt Neytendastofu á tæplega fimm hundruð verkstæðum, víðs vegar um landið, leiðir í ljós að raflögnum og rafbúnaði er víða ábótavant. Athugasemdir voru gerðar við merkingu búnaðar í rafmagnstöflum í yfir níutíu og eitt prósent tilvika.

Ávinningur olíusamráðsins lítill sem enginn

Dómkvaddir matsmenn í máli Kers gegn Samkeppnisyfirvöldum telja hugsanlegt að ávinningur olíufélaganna af ólöglegu samráði hafi verið lítill eða enginn. Samkeppnisyfirvöld hafi gefið sér rangar forsendur við útreikninga sína.

Hafa enn ekki veitt hval

Áhöfninni á Hval níu hefur enn ekki tekist að fanga hval á þeim þremur dögum sem liðnir eru frá því skipið lét úr höfn. Birtuskilyrði gera hvalföngurum erfitt fyrir. Þeir segjast finna hval, keyra á eftir honum en missa þá birtuna. Þeir hafi þó séð allar hugsanlegar tegundir úti fyrir Vestfjörðum í gær, en nú eru þeir út af Snæfellsjökli. Einnig hefur orðið vart við bilarnir í Hval níu en það segja hvalfangarar að sé ósköp eðlilegt eftir að hann hafi staðið í sautján ár. Ferðin hafi í raun gengið furðuvel.

Vændi er þjóðarskömm segir biskup

Karl Sigurbjörnsson biskup Íslands segir hnattvæddan klámiðnað staðreynd á Íslandi og að mansal teygi anga sína hingað til lands. Vitnast hafi að menn kaupi ungar stúlkur frá fátækum löndum og haldi þeim hér eins og þrælum. Það sé þjóðarskömm. Þetta var meðal þess sem biskup gerði að umtalsefni við setningu Kirkjuþings í morgun.

Lenti á hvolfi inn í garði

Rétt eftir miðnætti varð harður tveggja bíla árekstur í íbúðarhverfi í vesturbæ Kópavogs, með þeim afleiðingum að annar bíllinn valt og lenti á þakinu inni í garði. Engan sakaði og ekki leikur grunur á ölvun, en báðir bílarnir eru mikið skemmdir og voru fluttir af staðnum með kranabíl.

Nóbelsverðlaunahafi hlýtur heiðursdoktorsnafnbót

Nóbelsverðlaunahafi í hagfræði er meðal þeirra sem hljóta heiðurdoktorsnafnbót við útskrift Háskóla Íslands í dag. Sá heitir Robert A. Mundell og er prófessor við Colubia-háskóla í Bandaríkjunum. Hann fékk Nóbelsverðlaun í hagfræði árið 1999. Hann hlýtur nafnbótina við viðskipta- og hagfræðideild HÍ.