Forsendur kjarasamninga brostnar

Starfsgreinasambandið segir að forsendur kjarasamninga þess við ríkið og Samtök atvinnulífsins séu brostnar ef lægstu laun á hinum almenna launamarkaði verða ekki hækkuð til samræmis við þær hækkanir sem launanefnd sveitarfélaganna leggur til.

Vinstri grænir í Reykjavík vilja slíta samstarfi um rekstur strætó

Vinstri grænir í Reykjavík vilja slíta samstarfi við önnur sveitarfélög á höfuðborgarsvæðinu um rekstur Strætó, og að rekstur almenningsvagna eigi að verða hjá hverju sveitarfélagi fyrir sig.

Þorskurinn verðmætastur söluafurða hjá Þorbirni Fiskanesi

Þorbjörn Fiskanes hf. seldi fiskafurðir fyrir tæpa 3,8 milljarða króna á síðasta ári. Á fréttavef Víkurfrétta segir að frystiskip félagsins hafi framleitt fiskafurðir fyrir um 1,8 milljarð króna og í fiskvinnslum félagsins í landi voru framleiddar fiskafurðir fyrir tæpa 2 milljarða, en það er um 10% aukning frá árinu 2004. Mest var verðmæti þorskafurða af heildarsölunni eða rúmir tveir milljarðar króna.

Silvía Nótt keppir í úrslitum

Útvarpsráð styður ákvörðun útvarpsstjóra, Páls Magnússonar, um að lag Þorvaldar Bjarna Þorvaldssonar, sem skemmtikrafturinn Silvía Nótt flytur, haldi áfram í Söngvakeppni Sjónvarpsins.

Efling hestamennsku á landsbyggðinni

Efla á hestamennsku á landsbyggðinni með styrkjum til bæta aðstöðuna. Landbúnaðarráðherra vonast til að hægt verði að jafna aðstöðu hestamanna á landsbyggðinni til jafns við aðstöðu þeirra á höfuðborgarsvæðinu.

Tekist á um myndir af Múhameð

Þekktir blaðamenn tókust á um myndbirtingar af Múhammeð spámanni í fjölmiðlum á pressukvöldi Blaðamannafélagsins í kvöld en það er vettvangur félagsmanna til umræðna um málefni líðandi stundar.

Þýsk menningarmál endurskipulög hér á landi

Til stendur að hætta starfsemi í þýsku menningarstofnuninni Goethe Zentrum hér á landi. Ekki er þó ætlunin að slíta menningartengslin við Ísland heldur efla þau og gera skilvirkari að sögn nýs menningarfulltrúa Þjóðverja hér á landi.

Tekinn á 142 kílómetra hraða

Lögreglan í Keflavík stöðvaði tvo ökumenn eftir að þeir höfðu mælst á of miklum hraða í dag. Annar var stöðvaður á Reykjanesbraut þar sem hann ók á 112 kílómetra hraða en hinn síðari steig bensíngjöfina enn fastar því hann mældist á 142 kílómetra hraða á Grindavíkurvegi.

Stúlkur vantar í keppni þeirra fegurstu á Vestfjörðum

Óvíst er hvort hægt verði að halda Fegurðarsamkeppni Vestfjarða þar sem enn hefur ekki tekist að fá nógu margar stúlkur til þátttöku til að hægt sé að halda keppnina. Leit að stúlkum er því haldið áfram og óskað eftir tilnefningum.

Kaupverðið allt að 20 milljarðar

Bílanaust, ásamt nokkrum fjárfestum, hefur keypt Olíufélagið. Mögulegar bótagreiðslur vegna ólögmæts samráðs fylgja ekki með í kaupunum. Verðið er ekki gefið upp en er talið vera hátt í 20 milljarðar króna.

Ríkið krefur olíufélögin um bætur

Ríkisstjórnin ætlar að krefja stóru olíufélögin þrjú um bætur vegna þess skaða sem ríkissjóður beið af völdum ólögmæts samráðs þeirra. Samkeppnisráð taldi að ávinningur olíufélaganna af samráðinu hefði numið sex milljörðum króna.

Bankastjórar á háum launum

Halldór J. Kristjánsson, bankastjóri Landsbankans, hafði um 12,4 milljónir í laun á mánuði, hluti launanna tengist kaupréttarsamningum, - og Sigurjón Þ. Árnason, bankastjóri, hafði um 6,9 milljónir. Ársreikningur bankans sýnir að laun og hlunnindi helstu stjórnenda bankans nemi um 840 milljónum króna.

Ófært um Ólafsfjarðarmúla

Ófært er um Ólafsfjarðarmúla vegna óveðurs, samkvæmt upplýsingum frá Vegagerðinni. Víða um land er hálka, snjóþekja eða hálkublettir.

Allt að fjögurra ára fangelsi fyrir amfetamínsmygl

Enn hefur enginn verið handtekinn til viðbótar við ungt par, sem gripið var með fjögur kíló af amfetamíni við komuna frá París á föstudag. Eins og þessi mynd ber með sér er um mikið magn að ræða og er málið eitt það stærsta sem upp hefur komið í Leifsstöð til þessa.

Tryggingafélög virðast brjóta lög

Tryggingafélögin virðast brjóta lög með því að neita fólki um sjúkratryggingar gegn ákveðnum sjúkdómum á grundvelli upplýsinga um arfgenga sjúkdóma foreldra og systkina. Persónuvernd segir að friðhelgi einkalífsins sé ekki virt og Fjármálaeftirlitið skoðar framkvæmd þessara mála.

Íslenskur friðargæsluliði í stórhættu

Íslenskur friðargæsluliði í Afganistan var í stórhættu þegar ævareiðir múslímar réðust á búðir sem hann var staddur í og brenndu bifreið hans. Utanríkisráðuneytið varar Íslendinga við að ferðast til Mið-Austurlanda vegna ólgunnar sem þar er út af myndbirtingum af spámanninum Múhameð.

Viðræðum um varnarmál vonandi að ljúka

Geir H. Haarde, utanríkisráðherra, segist stefna að því að viðræðum Íslendinga og Bandaríkjamanna um framtíð varnarsamstarfsins, ljúki á næstu vikum. Viðræður Íslendinga og Bandaríkjamanna voru teknar upp á nýjan leik í Washington um síðustu helgi.

Löggan og Vegagerðin deila

Lögreglan á Akureyri og starfsmenn Vegagerðinnar deila um það í tölvupóstum manna á milli hvort rétt hafi verið af lögreglunni að tilkynna um hálku á Öxnadalsheiðinni í gær.

Víða hálka og hálkublettir

Hálka og hálkublettir eru víða á landinu samkvæmt upplýsingum frá Vegagerðinni. Snjóþekja eða hálka er í uppsveitum Árnessýslu og hálka er á Hellisheiði og í Þrengslum.

Vilja slíta samstarfinu um Strætó

Vinstri-grænir í Reykjavík vilja slíta samstarfinu um rekstur Strætós b.s. og að hvert sveitarfélag um sig sjái um strætisvagnasamgöngur á sínum stað. Vinstri-grænir segja að hugmyndin að baki Strætó hafi verið að efla strætisvagnakerfið en að reynslan af samstarfinu hafi valdið miklum vonbrigðum.

Fleiri framfaraspor stigin

Framfaraspor verða áfram stigin í þjónustu og rekstri Reykjavíkurborgar næstu árin, sögðu borgarfulltrúar R-listans í bókun við umræður í borgarstjórn um áætlun borgarinnar næstu þrjú árin.

Ríki og fyrirtæki hækki lægstu laun

Formannafundur Starfsgreinasambandsins sem haldinn var í dag, krefst þess að bæði ríkið og Samtök atvinnulífsins, beiti sér nú þegar fyrir hækkun lægstu launa til samræmis við þá launaviðbót sem Launanefnd sveitarfélaga leggur til.

Vilja fá að taka afstöðu til sölunnar

Fulltrúar allra flokka í borgarstjórn samþykktu á borgarstjórnarfundi í dag að skora á stjórn Landsvirkjunar að bera söluna á Laxárstöð undir eigendur Landsvirkjunar; ríki, borg og Akureyrarbæ.

Varað við ferðum til Sýrlands og Líbanons

Utanríkisráðuneytið ráðleggur íslenskum ríkisborgurum frá því að ferðast til Sýrlands og Líbanons eins og sakir standa. Ástæðan fyrir þessu eru atburðir síðustu daga og ótryggt ástand í löndunum vegna deilna um skopmyndir af spámanninum Múhameð sem birtust í danska blaðinu Jótlandspóstinum.

Ríkið sýknað af bótakröfu

Íslenska ríkið var í dag sýknað af kröfu Óla Bjarna Ólasonar útgerðarmanns sem krafðist skaðabóta úr ríkissjóði vegna lagasetningar þar sem sóknardagakerfið var aflagt og kvóti settur á krókabáta.

Dorrit erlendis í fríi

Dorrit Moussaieff, forsetafrú, er nú stödd erlendis í fríi. Eins og kunnugt er fékk hún aðsvif við upphaf afhendingar Íslensku bókmenntaverðlaunna í síðustu viku. Dorrit fór í rannsóknir í síðustu viku vegna aðsvifsins en enn hefur ekkert komið út úr þeim rannsóknum.

Marklaus þriggja ára áætlun

Borgarfulltrúar Sjálfstæðisflokksins segja þriggja ára áætlun meirihlutans í borgarstjórn fyrir árin 2007 til 2009 marklausa og hvetja til þess að hún sé dregin til baka. Fyrri umræða um áætlunina hófst á borgarstjórnarfundi klukkan tvö og hafa Sjálfstæðismenn bókað að hún sýni meiri óskhyggju en raunhæfar áætlanir.

VSB átti lægsta boð

VSB verkfræðistofa í Hafnarfirði átti lægsta tilboðið í eftirlit með framkvæmdum við tvöföldun Reykjanesbrautar milli Fífuhvammsvegar og Kaplakrika.

Vöxtur fram úr björtustu vonum

Vöxtur þorsks í kvíum Brims fiskeldis í Eyjafirði er framar björtustu vonum segir Sigþór Eiðsson stöðvarstjóri og telur hitastig sjávar hafa greinileg áhrif á vöxtinn. Alls eru um 470 tonn af þorski í kvíum Brims fiskeldis en það eru um 363 þúsund fiskar.

Silvía Nótt áfram með

Útvarpsráð hefur ákveðið að vísa ekki laginu "Til hamingju Ísland", sem Silvía Nótt flytur, úr Söngvakeppni Sjónvarpsins, þótt lagið hafi lekið út á netið. Þetta kom fram í fréttum Útvarpsins í dag.

Lögreglan á Ísafirði óskar eftir upplýsingum frá almenningi

Lögregluyfirvöld á Ísafirði hvetja almenning að hafa samband við lögreglu ef grunur leikur á að einhvers konar fíkniefnamisferli eigi sér stað, og heitir uppljóstrurum nafnleynd. Lögfræðingur hjá persónuvernd segir að erfitt gæti reynst að halda nöfnum vitna leyndum, leiði upplýsingar þeirra til ákæru og málaferla.

Endanlegur framboðslisti ekki ákveðinn

Endanlegur framboðslisti Framsóknarflokksins í borgarstjórnarkosningunum í vor hefur ekki verið ákveðinn. Ef allir á listanum verða færðir upp um eitt sæti, er hugsanlegt að Gestur Kr. Gestsson, sem lenti í áttunda sæti í prófkjörinu, verði tilnefndur í fimmta sætið.

150 kosið utankjörstaðar í prófkjöri Samfylkingarinnar í Reykjavík

Um 150 manns hafa kosið utankjörstaðar í prófkjöri Samfylkingarinnar í Reykjavík, sem fram fer dagana 11. og 12. febrúar næstkomandi. Utankjörstaðaratkvæðagreiðsla hófst á þriðjudag í síðustu viku.

Gestur tilnefndur í 5. sæti á lista Framsóknar?

Endanlegur framboðslisti Framsóknarflokksins í borgarstjórnarkosningunum í vor hefur ekki verið ákveðinn. Ef allir á listanum verða færðir upp um eitt sæti, er hugsanlegt að Gestur Kr. Gestsson, sem lenti í áttunda sæti í prófkjörinu, verði tilnefndur í fimmta sætið.

Ríkið í mál við olíufélögin

Ríkisstjórnin ákvað í morgun að fara í mál við olíufélögin vegna verðsamráðs þeirra. Stjórnvöld senda stóru olíufélögunum kröfugerð vegna þess tjóns sem ríkið varð fyrir.

Lögreglumenn lifa þrettán árum skemur en aðrir landsmenn

Lögreglumenn lifa að meðaltali þrettán árum skemur en aðrir landsmenn, en þetta kemur fram í úttekt sem Landssamband lögreglumanna gerði.

Þorskseiði sjöfalda þyngd sína á rúmum 10 mánuðum

Þorskseiði, sem fiskeldi Brims hf. í Eyjafirði er að ala, stækka og þyngjast með meiri hraða en bjöttustu vonir stóðu til. Á heimasíðu Brims er greint frá því að seiði, sem voru 90 grömm um miðjan mars í fyrra, séu nú orðin 740 grömm og hafi þar með rúmlega sjöfaldað þyngd sína á tíu og hálfum mánuði.

Bæjarráð Hveragerðis nýtir heimild

Bæjarráð Hveragerðis hefur samykkt samhljóða að nýta heimild Launanefndar sveitafélaga til tímabundinnar launahækkunar. Laun leikskólakennara og starfsmanna félaga sem samið hafa um starfsmat við launanefndina, verða hækkuð. Þeim starfsmönnum sem fá launahækkunm verður kynnt það sérstaklega.

Ragnheiður leiðir lista Samfylkingar í Árborg

Ragnheiður Hergeirsdóttir, bæjarfulltrúi, og framkvæmdastjóri mun leiða lista Samfylkingarinnar í Árborg í komandi sveitastjórnakosningum. Uppstilling listans var kynnt og samþykkt á flokksfundi í gærkveldi.

Bílanaust kaupir Olíufélagið

Núverandi hluthafar og stjórnendur Bílanausts, ásamt öðrum fjárfestum, hafa keypt allt hlutafé í Olíufélaginu fyrir hátt í 20 milljarða króna. Með í kaupunum er eignarhluti Olíufélagsins í Olíudreifingu sem og þjónustustöðvar og flestar aðrar fasteignir í rekstri Olíufélagsins. Olíufélagið og Bilanaust verða í eigu nýs eignarhaldsfélags og verður velta þess á árinu 2006 um 26 milljarðar króna. Íslandsbanki hafði umsjón með söluferlinu. Hinir nýju eigendur skilja fjárfestingarfélagið Ker eftir með hugsanlegar sektargreiðslur vegna samráðs olíufélaganna um verðlagningu.

Verið að hreinsa snjó af vegum í flestum landshlutum

Nokkur hálka, hálkublettir eða snjóþekja er á vegum landsins. Verið er að hreinsa snjó af vegum í flestum landshlutum, einkum á heiðum. Smá éljagangur hefur verið víða um land.

Flytji réttleysið ekki milli landa

Forystumenn allra launþegasamtaka á Norðurlöndum hafa skorað á norræna þingmenn á Evrópuþinginu að styðja breytingartillögu við þjónustutilskipun Evrópusambandsins. Þannig megi koma í veg fyrir að réttindaleysi launþega í sumum aðildarríkjum sé í raun flutt með þeim landa á milli segir formaður BSRB.

Kosið um sameiningu á laugardag

Utankjörfundaratkvæðagreiðsla er hafin vegna kosninga um sameiningu þriggja sveitarfélaga austur í Flóa í Árnessýslu, en kosningarnar verða á laugardag. Þá ganga íbúar Hraungerðis- Gaulverjabæjar- og Villingaholtshreppa að kjörborðinu, en þessir hreppar eru austan við Árborg, sem er sameinað sveitarfélag Selfoss, Eyrarbakka, Stokkseyrar og Sandvíkurhrepps.

Fundur Útvarpsráðs varðandi lag Silvíu Nóttar í dag

Afdrif lagsins, Til hamingju Ísland, í flutningi Silvíu Nóttar, í undankeppni Eurovision keppninnar, ráðast væntanlega á fundi Útvarpsráðs í dag. Kristján Hreinsson, sem samdi texta við þrjú önnur lög í keppninni, kærði að umrætt lag skyldi fá að taka þátt í undankeppninni, eftir að það lak út á netið. Um nýliðna helgi komst lagið svo áfram í úrslit undankepninnar sem fram fer næstkomandi laugardag.

Karlarnir hvattir til að mæta í karlaþrek

Karlar á Þingeyri og í Ísafjarðarbæ eru nú hvattir til að taka upp heilbrigt líferni og skella sér í svokallað karlaþrek, sem Íþróttafélagið Höfrungur og íþróttamiðstöðin á Þingeyri bjóða upp á.