Segir sig ekki úr stjórnarskrárnefnd

Þorsteinn Pálsson gerir ekki ráð fyrir að segja sig úr stjórnarskrárnefnd þrátt fyrir að taka við ritstjórn Fréttablaðsins síðar í mánuðinum. Þorsteinn Pálsson var tilnefndur í stjórnarskrárnefnd af hálfu Sjálfstæðisflokksins og skipaður varaformaður hennar þegar hún tók til starfa í janúar á síðasta ári.

Vökudeild Barnaspítala Hringsins 30 ára

Þrjátíu ár eru í dag liðins síðan vökudeild Barnaspítala Hringsins tók til starfa. Af því tilefni verður efnt til afmælishátíðar milli klukkan þrjú og fimm í dag og eru allir velkomnir. Ýmis fræðsluerindi verða flutt og boðið upp á veitingar í lokin.

Kostnaður vegna úrskurðarnefnda 340 milljónir

Kostnaður vegna úrskurðarnefnda ríkisins nam rúmlega 340 milljónum króna árið 2004. Þetta kemur fram í svari forsætisráðherra við fyrirspurn Sigurjóns Þórðarsonar, þingmanns Frjálslynda flokksins. Nefndirnar eru 58 talsins en enginn kostnaður var af starfsemi átján þeirra samkvæmt svari forsætisráðherra.

Loka fyrir merki arabískra sjónvarpsstöðva í Hollandi

Hollensk yfirvöld hafa slökkt á merki tveggja arabískra gervihnattarsjónvarpsstöðva sem þau segja bera út hatursboðskap og hvetja til hryðjuverka. Önnur stöðvanna, sem er líbönsk, er sögð tengd Hizbollah-skæruliðahreyfingunni en hún hefur þegar verið bönnuð í Frakklandi.

Vilja strætóferðir milli Reykjavíkur og Árborgar

Selfyssingar vilja strætóferðir á milli Reykjavíkur og Árborgar og myndu Hvergerðingar njóta góðs af ferðunum i leiðinni.

SAS flýgur á milli Oslóar og Keflavíkur

SAS-flugfélagið ætlar að hefja áætlunarflug á milli Oslóar og Keflavíkur í sumar og eins og greint hefur verið frá ætlar breski flugrisinn British Airways að hefja áætlunarflug á milli Keflavíkur og London í mars.

Íslendingar lítt hrifnir af hvalkjöti

Íslendingar eru lítt hrifnir af hvalkjöti samkvæmt niðurstöðum í skoðanakönnun Gallup sem gerð var að beiðni Alþjóðlegu dýraverndunarsamtakanna IFAW. Um 90% aðspurðra í könnuninni segjast ekki hafa keypt hvalkjöt í að minnsta kosti eitt ár.

Íslandsbanki og Landsbanki hækka vexti

Íslandsbanki og Landsbankinn hafa farið að fordæmi KB banka og hækkað vexti af óverðtryggðum inn- og útlánum. Hækkun allra bankanna nemur um það bil 0,25 prósentustigum og allir segjast þeir hafa hækkað vexti vegna þess að Seðlabankinn hækkaði stýrivexti nýverið.

Fundu fíkniefni við umferðareftirlit

Lögreglan í Kópavogi handtók mann í gærkvöldi eftir að talsvert af fíkniefnum fannst á honum við reglubundið eftirlit í umferðinni. Við yfirheyrslur í nótt viðurkenndi hann að hafa ætlað að selja efnin og var honum þá sleppt, en rannsókn málsins verður fram haldið.

Öskubuska á fjölunum í óperunni

Æfingum fer senn að ljúka á Öskubusku eftir Rossini og verður hún frumsýnd í Íslensku Óperunni á sunnudaginn kemur, 5. febrúar.

Undirbúningur að hátæknisjúkrahúsi kominn á skrið

Undirbúningur að hátæknisjúkrahúsi við Hringbraut komst á fullan skrið í dag þegar heilbrigðisráðherra undirritaði samninga við danska vinningshafa í samkeppni um skipulag spítalans.

Engar breytingar á vöruúvali í komufríhöfninni

Árni Matthiesen fjármálaráðherra segir að ekki standi til að gera neinar breytingar á vöruúrvali í komufríhöfninni í Flugstöð Leifs Eiríkssonar. Samtök verslunar og þjónustu hafa sótt fast að allar vörutegundir nema áfengi og tóbak verði fjarlægðar úr komufríhöfninni. Fjármálaráðherra svaraði því hins vegar á Alþingi í dag að engar áætlanir væru um að takmarka vöruframboðið.

Kaupskipaútgerð að leggjast af

Bæði stjórnarþingmenn og stjórnarandstæðingar reyndu í dag að sannfæra fjármálaráðherra um að kaupskipaútgerð á Íslandi væri að leggjast af vegna aðgerðarleysis stjórnvalda. Árni Matthiesen hummaði það nánast framaf sér.

Yoko Ono á leið til landsins

Yoko Ono, ekkja bítilsins John Lennon, er væntaleg hingað til lands þann 25. febrúar til að vera viðstödd Vetrarhátíð í Reykjavík. Þar mun hún ræða listaverk sem hún hefur gefið borginni, svokallaða Friðarsúlu, en um er að ræða 10 til 15 metra háa upplýsta glersúlu.

Ekkert lát á flóðunum

Ekkert lát er á flóðunum í Nyrðri-Þrændalögum í Noregi. Í dag bárust yfirvöldum yfir 150 tilkynningar um tjón á byggingum og nokkur til viðbótar á bifreiðum en dæmi eru um að heilu húsin hafi skolast á haf út í vatnselgnum.

Varnarviðræður hefjast á morgun

Viðræður um varnarmál milli Íslands og Bandaríkjanna hefjast á nýjan leik í Washington á morgun. Ekkert fæst uppgefið um efni þeirra en líkur eru þó taldar á að Íslendingar muni taka við rekstri björgunarþyrlusveitarinnar.

Silvía Nótt verður með í forkeppninni

Lagið "Til hamingju Ísland" eftir Þorvald Bjarna í flutningi Silvíu Nætur fær að taka þátt í forkeppni söngvakeppninnar þrátt fyrir að lagið hafi birst á netinu.

Harma að lagið hafi farið á netið

Höfundar lagsins ,,Til hamingju Ísland" sem flytja á í undankeppni Eurovision hér á landi harma að lagið hafi komist í dreifingu á netinu. Þetta segir í yfirlýsingu sem höfundar lagsins sendu frá sér en Silvía Nótt á að flytja lagið. Í yfirlýsingunni segir að þetta hafi verið algjörlega gegn vilja höfunda og gerst án þeirrar vitundar.

Aukið eftirlit með olíuflutningum

Eftirlit verður aukið með skipaflutningum í íslenskri landhelgi í framtíðinni, og þá sérstaklega olíuflutningum. Björn Bjarnason dómsmálaráðherra greindi frá þessu í utandagskrárumræðu á Alþingi í dag.

Myndir af ráninu

Lögreglan leitar enn að ungum manni sem rændi Happdrætti Háskóla Íslands við Tjarnargötu á mánudaginn. Lögreglan hefur nú birt myndir úr eftirlitsmyndavél sem teknar voru klukkan 11:54 á mánudaginn.

Ræddu stjórnarmyndun löngu fyrir kosningar

Þorsteinn Pálsson og Jón Baldvin Hannibalsson höfðu lagt grunninn að stjórnarsamstarfi Sjálfstæðisflokks og Alþýðuflokks eftir þingkosningarnar 1991, meðan Alþýðuflokkurinn var enn í vinstristjórn og áður en Davíð Oddsson felldi Þorstein í formannskosningu í Sjálfstæðisflokknum.

Aldraðir búa aðskildir vegna skorts á hjúkrunarrými

Þrjátíu og átta hjón eða sambúðarfólk á eftirlaunum hér á landi búa hvort í sínu lagi vegna plássleysis á hjúkrunarheimilum. Þetta kom fram í svari Jóns Kristjánssonar heilbrigðisráðherra við fyrirspurn Ástu Ragnheiðar Jóhannesdóttur Samfylkingu í fyrirspurnartíma á Alþingi sem nú stendur yfir.

Málefni Gusts að skýrast

Málefni hestamannafélagsins Gusts í Kópavogi hafa verið í talsverðum ólestri síðustu mánuði en Gunnar I. Birgisson, bæjarstjóri Kópavogs, segir málefni Gustara munu skýrast á næstu dögum.

Fimm taka þátt í hugmyndasamkeppni

Búið er að velja fimm hópa sem taka þátt í hugmyndasamkeppni um hönnun Háskólans í Reykjavík. Auglýst var í desember forval um þátttöku í hugmyndasamkeppni um skipulag og hönnun á háskólabyggingum á nýju svæði Háskólans í Reykjavík í Vatnsmýrinni.

Göngudeild fyrir átröskunarsjúklinga

Göngudeild fyrir átröskunarsjúklinga opnaði í dag á Landspítalanum við Hringbraut. Þúsundir Íslendinga þjást af átröskun og nokkur fjöldi þeirra deyr af völdum sjúkdómsins á ári hverju.

Staða kaupskipaútgerðar skýrist fljótt

Fjármálaráðherra segir að fljótt komi í ljós hvort og þá hvernig skuli bregðast við skráningu kaupskipa og farmanna erlendis. Þingmenn lýstu miklum áhyggjum af því á þingi í dag að innan skamms yrðu ekki lengur neinir farmenn skráðir á Íslandi.

Hvetja ráðherra til þess að falla frá styttingu náms

Þingflokkur Samfylkingarinnar skorar á menntamálaráðherra að falla frá tillögum sínum um styttingu náms í framhaldsskóla til stúdentsprófs. Í ályktun frá þingflokknum segir að komi tillögurnar til framkvæmda skerðist nám í framhaldsskóla um 20 prósent og verulega dragi úr fjölbreytni og sjálfstæði framhaldsskólanna.

Silvía Nótt ekki með í Evróvisjón?

Eins og staðan er núna fær Silvía Nótt ekki að flytja lag Þorvaldar Bjarna "Til hamingju Ísland" í forkeppni Evróvision á laugardag eins og til stóð en lagið lak út á netið í gær. Ómögulegt hefur verið að ná í keppnishaldara í morgun enda hafa þeir verið á stífum fundi þar sem reynt er að taka ákvörðum um hvort gefa eigi laginu undanþágu frá reglum keppninnar. Forsvarsmenn Basecamp, sem fer með framkvæmd keppninnar, sögðu í samtali við fréttastofu að reglurnar væru mjög skýrar og samkvæmt þeim ætti að vísa laginu úr keppni.

Nærri 900 hugmyndir bárust í Hallveigarbrunn

Minni strætisvagnar, upphitaðir göngustígar, yfirbyggt Austurstræti og sérstakur dagur faðmlagsins er með þeirra 900 umhverfishugmynda sem bárust í svokallaðan Hallveigarbrunn sem umhverfissvið borgarinnar opnaði á heimasíðu sinni í tvær vikur í síðasta mánuði.

Samið á einkareknum skólum

Samtök sjálfstæðra skóla hafa undirritað fyrsta kjarasamning sinn við Eflingu fyrir hönd um 170 Eflingarfélaga sem vinna í einkareknum leik- og grunnskólum í Reykjavík.

Ræningi enn ófundinn

Lögregla hefur ekki enn fundið manninn sem rændi höfuðstöðvar Happdrættis Háskólans við Tjarnargötu laust fyrir hádegi á mánudag. Maðurinn ruddist inn og veifaði byssu í útbúinu og hafði á brott með sér tæplega hundrað þúsund krónur.

Icelandic Group segir upp öllum starfsmönnum í Hamborg

Icelandic Group, sem áður hét Sölumiðstöð hraðfrystihúsanna, hefur sagt upp öllum 22 starfsmönnum söluskrifstofunnar í Hamborg, vegna endurskipulagningar og í sparnaðarskyni, segir í tilkynningu frá félaginu.

Andvaraleysi stjórnvalda geti gert út af við íslenska farmenn

Guðmundur Hallvarðsson, formaður samgöngunefndar Alþingis, segir andvaraleysi ríkisstjórnarinnar geta gert íslenska skipstjórnarmenn að útlendingum. Hann er upphafsmaður utandagskrárumræðu sem hófst á þingi í hádeginu.

Áform á Suðvesturhorni hafi ekki áhrif á álver á Norðurlandi

Valgerður Sverrisdóttir iðnaðarráðherra sagði á fjölmennum borgarafundi á Akureyri í gærkvöldi, að áform um frekari uppbyggingu álvera á Suðvesturlandi, myndu ekki hafa áhrif á mögulegt álver á Norðurlandi.

Sex starfsmannaleigur skráðar hjá Vinnumálastofnun

Fjórar starfsmannaleigur hafa skráð sig hjá Vinnumálastofnun í morgun og hafa því alls sex leigur skráð sig þar eins og ný lög um starfsmannaleigur gera ráð fyrir.

Spennandi verkefni

Þorsteinn Pálsson, nýráðinn ritstjóri Fréttablaðsins, segist vona að hann hafi verið ráðinn á eigin verðleikum en ekki sem tilraun til friðþægingar við forystu Sjálfstæðisflokksins. Hann segir ekki von á stórbreytingum á blaðinu fyrst í kjölfar ráðningar sinnar.

Segir íslenska banka viðkvæma fyrir sveiflum

Það er veikur blettur á íslenskum bönkum hve mjög þeir reiða sig á erlent lánsfé og hversu óvenjulega náin og óheilbrigð eignatengsl fjárfesta og fyrirtækja eru hér á landi, segir meðal annars í nýjum skýrslum greiningarfyrirtækjanna Barclays og Capital og Credit Sight.

Nærri þúsund tillögur að nýju nafni á VR

Hátt þúsund tillögu bárust í samkeppni Verzlunarmannafélags Reykjavíkur um nýtt nafn á félagið sem lauk nýverið. Þetta kemur fram á vef félagsins. Efnt var til samkeppninniar þar sem nafnið þótti ekki lengur endurspegla starfsemi félagsins.

86 prósent hafa ekki keypt hvalkjöt í ár

Áttatíu og sex prósent Íslendinga hafa ekki keypt hvalkjöt í að minnsta kosti ár samkvæmt nýrri skoðannakönnun sem Gallup gerði fyrir Alþjóðlegu dýraverndunarsamtökin, IFAW. Þá leiðir könnunin einnig í ljós að 64 prósent þjóðarinnar telja að eftirspurn eftir hvalkjöti innanlands sé lítil á meðan rúm 22 prósemt telja hana mikla.

Búnaðarsambönd á Norðvesturlandi ræða um sameiningu

Stjórnir Búnaðarsambands Austur-Húnvetninga, Búnaðarsambands Vestur-Húnvetninga og Búnaðarsambands Strandamanna hafa hafið viðræður um hugsanlega sameiningu sambandanna eftir því sem fram kemur á vef Bæjarins besta.

Atvinnuleysi að jafnaði 2,1 prósent í fyrra

Atvinnuleysi var að jafnaði 2,1 prósent í fyrra samanborið við 3,1 prósent á árinu 2004. Þetta kemur fram í tölum Vinnumálastofnunar. Atvinnuleysi á höfuðborgarsvæðinu reyndist eilítið meira en úti á landi, það var 2,2 prósent á höfuðborgarsvæðinu í fyrra á móti 1,8 prósentum á landsbyggðinni.

Aflvana báti bjargað út af Sauðanesi

Björgunarsveitir á norðanverðum Vestfjörðum voru kallaðar út í gærkvöldi eftir að neyðarblys sást á lofti út af Sauðanesi á milli Önundarfjarðar og Súgandafjarðar. Rétt í sama mund tilkynnti skipstjóri á vélarvana báti á svæðinu að hann hefði skotið blysinu á loft til að leiðbeina öðrum báti að sér og að engin hætta væri á ferðum.

Verða að hafa æft akstur við erfiðar aðstæður

Samgönguráðuneytið ráðgerir að gera nám í svokölluðu ökugerði, þar sem æfður er akstur við erfiðar aðstæður, að skilyrði fyrir veitingu ökuskírteinis. Gert er ráð fyrir að einkaaðilar komi upp aðstöðu og veiti þjónustuna en að gjaldið verði ákveðið í verðskrá sem samgönguráðherra gefur út.

Ákvörðun um álver á Norðurlandi í þessum mánuði

Það ræðst í þessum mánuði hvort Alcoa kýs að reisa nýtt álver á Dysnesi í Eyjafilrði, Bakka við Húsavík eða á Brimnesi í Skagafirði, að því er framkvæmdastjóri þróunarsviðs félagsins upplýsti á fjölmennum borgarafundi í Ketilhúsinu á Akureyri í gærkvöldi.

Mikill árangur af hverfavöktun

Ekkert innbrot hefur verið tilkynnt til lögreglu eftir að hverfavöktun hófst á Seltjarnarnesi í október á síðasta ári í samstarfi bæjaryfirvalda og Securitas. Næstu níu mánuði á undan hafði verið tilkynnt um frá einu og upp í átta innbrot á mánuði.