Ölfusárbrúin tekin út

Hópur sérfræðinga frá Vegagerðinni og verkfræðistofu hafa í nótt og í fyrrinótt verið að kanna ástand Ölfusárbrúar á Selfossi og ganga úr skugga um að hún beri enn alla þá þungaflutninga, sem um hana fara.

Vinnuskúr varð eldi að bráð

Vinnuskúr á hjólum brann til kaldra kola á Hólmsheiði, í grennd við hitaveitugeymana þar, um ellefu leytið í gærkvöldi. Hann var alelda og að hruni kominn þegar slökkviliðið kom á vettvang og slökkti í glæðum. Eldsupptök eru ókunn, en ekkert rafmagn var tengt við skúrinn.

Ástþór andvaka yfir framboði í uppnámi

Jóhannes Tómasson, upplýsingafulltrúi hjá innanríkisráðuneytinu, segir Ástþór Magnússon ekki hafa gert athugasemdir við tiltekna lista annarra frambjóðenda til embættis forseta. Hann hafi ekki tilgreint athugasemd sína nánar en að hann sæi á meðmælendalistum annarra frambjóðenda sömu rithönd.

Fær loks afhent Nóbelsverðlaun

Aung San Suu Kyi, leiðtogi stjórnarandstöðunnar í Búrma, er lögð af stað í heimsreisu. Hún hefur verið í stofufangelsi meira og minna í tvo áratugi. Í næsta mánuði fer hún meðal annars til Noregs þar sem hún tekur loks formlega á móti friðar-verðlaunum Nóbels sem henni voru veitt árið 1991.

Þingmenn vilja afturkalla aðildarumsókn

Atli Gíslason og Jón Bjarnason lögðu í dag fram þingsályktunartillögum um að afturkalla umsókn Íslands að Evrópusambandinu (ESB). Þeir leggja til að ekki verði haldið áfram með aðildarviðræðurnar fyrr en fram hafi farið þjóðaratkvæðagreiðsla sem staðfestir vilja þjóðarinnar til aðildar. Tvímenningarnir telja umboð ríkisstjórnarinnar til að halda áfram aðlögunar- og aðildarvinnu ekki lengur fyrir hendi.

Obama veitti Bob Dylan Frelsisverðlaunin

Barack Obama veitti 13 einstaklingum Frelsisverðlaunin (e. Medal of Freedom) í Hvíta Húsinu um helgina. Meðal þeirra var tónlistarmaðurinn Bob Dylan. Frelsisverðlaunin þykja meðal virðingarverðustu verðlauna sem almennir borgarar geta hlotið í Bandaríkjunum. Dæmi um eldri verðlaunahafa eru Móðir Teresa, Margaret Thatcher, Stephen Hawking og Walt Disney.

Nýjar fartölvur frá Google

Google hefur boðað nýja gerð af tölvum sem keyra á Chrome stýrikerfinu. Þær verða búnar öflugum örgjörva, en fyrri gerðin þótti of kraftlítil. Chrome stýrikerfið keyrir öll forrit sín af vefsvæði fyrirtækisins og vistar öll gögn notenda á internetinu. Google hefur lagt áherslu á að tölvurnar þurfi lítið viðhald, enda sé stýrikerfið keyrt af netinu og því sjái fyrirtækið um allt viðhald auk þess sem vírusvörn sé innbyggð í kerfið.

Fyrsta utanlandsför Suu Kyi í tvo áratugi

Þjóðarhetjan og friðarsinninn Aung San Suu Kyi hélt í fyrstu ferð sína út fyrir landamæri Búrma síðustu tvo áratugi og er nú stödd í Tælandi. Hún fékk vegabréf í byrjun maí. Suu Kyi mun eyða nokkrum dögum í Tælandi þar sem hún hyggst meðal annars heimsækja flóttamannabúðir og halda erindi á ráðstefnu næsta föstudag. Eftir það mun hún halda aftur til Búrma, stoppa þar stutt við og fljúga svo til Evrópu um miðjan júní.

Tuttugu björgunarsveitarmenn leituðu ferðalangs

Blásið var til leitar eftir að tilkynnt var um erlendan ferðamann sem orðið hafði viðskila við hópinn sinn við Jökulsárlón í dag. Maðurinn fannst stuttu eftir að leitin hófst. Tuttugu björgunarsveitarmenn frá Björgunarfélagi Hornafjarðar tóku þátt í leitinni auk 5 starfsmanna Jökulsárlóns. Maðurinn varð viðskila við hóp sinn um klukkan sex. Björgunarsveit var kölluð út milli klukkan átta og níu, en þá hafði starfsfólk Jökulsárlóns leitað í um klukkutíma. Maðurinn var kominn í leitirnar fyrir klukkan níu. Hann er heill heilsu. Friðrik Jóns Friðriksson, formaður Björgunarfélags Hornafjarðar, telur ólíklegt að maðurinn hafi upplifað sig týndan. "Það er náttúrlega sól og blíða og blankalogn. Hann bara fór og fékk sér labbitúr."

Sakar ríkisstjórnina um yfirgang

Framganga ríkisstjórnarinnar í stjórnarskrármálinu ber vott um yfirgang hennar gagnvart löggjafarvaldinu, sagði Ólöf Nordal, varaformaður Sjálfstæðisflokksins, við upphaf eldhúsdagsumræðna á Alþingi í kvöld.

Kraftaverk að sleppa lifandi eftir 40 metra fall

Það er kraftaverk að við séum á lífi, segja hjónin sem lifðu af allt að fjörutíu metra fall með skriðu stórgrýtis við Dyrhóley fyrir helgi. "Ég hélt að mín hinsta stund væri upprunnin," segir Jeorden Graaf, vélarverkfræðingur. "Fyrst móður náttúru tókst ekki að slíta okkur í sundur í þessum hamförum, er okkur ekki skapað að skilja," segir Irmgard Fraune, leikskólakennari.

Sigmundur: Álag á opinbera starfsmenn aukist gríðarlega

Álag á opinbera starfsmenn á borð við kennara og heilbrigðisstarfsfólk hefur aukist gríðarlega, sagði Sigmundur Davíð Gunnlaugsson. Hann sagði mikilvægt að búa starsfólki í þessum mikilvægu greinum betri starfskjör og vinnuumhverfi. Annars muni það leita að vinnu annars staðar.

Birgitta: Fulltrúalýðræðið hefur mistekist

Fulltrúalýðræðið er tilraun sem hefur mistekist, sagði Birgitta Jónsdóttir, þingmaður Hreyfingarinnar, við eldhúsdagsumræður á Alþingi í dag. Hún hvatti fólk til þess að taka virkan þátt í umræðunni um nýja stjórnarskrá.

Var óheimilt að stöðva flutning 150 bifhjóla til landsins

Umferðarstofa var í dag sýknuð af skaðabótakröfu fyrir héraðsdómi Reykjavíkur. Krafan var sprottin af því að tollafgreiðslu yfir 150 bifhjóla, sem stefnandi hugðist flytja til landsins, var hafnað vegna afstöðu Umferðarstofu árið 2004. Í kjölfarið var hjólunum komið fyrir í geymslu fram til ársins 2006 sem innflytjandinn mátti greiða fyrir. Hann fór fram á skaðabætur vegna þess.

Magnús Orri segir rústabjörgun hrunsins vera lokið

Stjórnarmeirihlutinn hefur reynt að verja hina tekjulægri við afleiðingum hrunsins, sagði Magnús Orri Schram, þingmaður Samfylkingarinnar, við eldhúsdagsumræður á Alþingi í dag.

Túnfiskur geislavirkur eftir slysið í Fukushima

Geislun frá kjarnorkuverinu í Fukushima fannst nýlega í túnfiski við strendur Kaliforníu. Þetta kom fram í rannsókn sem birt var í gær í blaði the Proceedings of the National Academy of Sciences. Þó magn geislavirkra efna í fiskinum sé undir þeim mörkum sem almennt eru talin hættuleg er það þó tíu sinnum hærra en venjulegt er á þessum slóðum.

Virkjanir langstærstu tækifæri Skaftárhrepps

Ein virkjun gæti aukið tekjur Skaftárhrepps af fasteignasköttum um 40 prósent. Sveitarstjórinn segir fyrirhugaðar virkjanir langstærstu tækifærin sem sveitarfélagið hafi til atvinnusköpunar. Tvær stórar virkjanir í Skaftártungu eru nú á teikniborðinu. Landsvirkjun vill virkja Hólmsá ofan Hrífuness og Suðurorka vill virkja Skaftá með Búlandsvirkjun. Báðar virkjanir eru umdeildar, í rammaáætlun ríkisstjórnar eru þær settar í biðflokk.

Erlendu drengirnir láta reyna á flóttamannasamning SÞ

Aðeins einu sinni hefur reynt á grein í flóttamannasamningi Sameinuðu þjóðanna sem kveður á um að ekki skuli refsa þeim sem koma ólöglega inn í land ef lífi þeirra var ógnað. Ragnar Aðalsteinsson hæstaréttarlögmaður furðar sig á þessu. Í 31. grein flóttamannasamnings Sameinuðu þjóðanna segir meðal annars að aðildarríkin skulu ekki beita refsingum gagnvart flóttamönnum vegna ólöglegrar komu þeirra til landsins ef þeir koma beint frá landi, þar sem lífi þeirra eða frelsi var ógnað gefi þeir sig tafarlaust fram við stjórnvöld. Á þessa grein æltar Ragnar Aðalsteinsson hæstaréttarlögmaður að láta reyna í máli drengjanna frá Marakkó og Alsír sem dæmdir voru í 30 daga fangelsi í lok apríl fyrir að framvísa fölsuðum vegabréfum en hann hefur áfrýjað dómi yfir þeim til Hæstaréttar.

Íslendingar greiddu um 68 þúsund atkvæði

Íslendingar greiddu hátt í 68 þúsund atkvæði í söngvakeppni evrópskra sjónvarpsstöðva á laugardaginn. Flest atkvæðin fóru til Svíþjóðar, sem sigraði í keppninni, og næstflest til Eistlands sem fékk 10 stig frá Íslendingum.

Þurfti allt að fjórðung blóðeininga Blóðbankans

"Þetta er mjög mikið,“ svarar Þorbjörn Jónsson læknir hjá Blóðbankanum spurður út í blóðmissi Skúla Eggerts Sigurz, framkvæmdastjóri Lagastoða. Guðgeir Guðmundsson hefur verið ákærður fyrir tilraun til manndráps þegar hann stakk Skúla fimm sinnum, fjórar hnífstungur voru lífshættulegar. Í árásinni missti Skúli 50 lítra af blóði samkvæmt ákæruskjali.

Bandaríski herinn sýnir kúnstir í Íslandi í dag

Bandaríski flugherinn hefur sinnt loftrýmisgæslu NATO á Íslandi frá 8. maí og verður hér til 7. júní. Í Íslandi í dag í kvöld verður farið á æfingu með bandaríska flughernum. Þátturinn fékk að fara með hernum í loftið og fylgjast með því þegar F15 orrustuþota er fyllt af eldsneyti í 22 þúsund feta hæð.

140 milljónir til viðbótar vegna eldgosanna

Ríkisstjórnin samþykkti á fundi sínum í dag 139 milljóna aukafjárframlög vegna brýnna verkefna á gossvæðum á Suðurlandi í kjölfar eldgosanna árin 2010 og 2011.

Þessir tala í eldhúsdagsumræðunum

Eldhúsdagsumræður á Alþingi hefjast klukkan tíu mínútur i átta í kvöld. Umræðurnar verða sendar út í útvarpi og sjónvarpi. Umræðurnar fara þannig fram að hver þingflokkur fær 22 mínútur til umráða sem skiptast í þrjár umferðir, 10 mínútur í fyrstu umferð, 6 mínútur í annarri og 6 mínútur í síðustu umferð. Þingmenn utan flokka tala síðastir í hverri umferð og hafa 4 mínútur.

Jón Páll er 700 hestafla tryllitæki

Kraftmesti "rib“ bátur landsins fór í jómfrúarsiglingu sína á dögunum. Tryllitækið hlaut nafnið Jón Páll eftir sterkasta manni heims, og það var Sigmar sonur hans sem sigldi bátnum fyrstu metrana. Sigríður Elva og Gísli Berg fengu að fljóta með og herlegheitin verða sýnd í Íslandi í dag klukkan 18.55 í kvöld.

Steingrímur: Atvinnuleysið að ná niður í sex prósent

Steingrímur J. Sigfússon, efnahags- og viðskiptaráðherra og formaður VG, býst við því að atvinnuleysið fari niður í sex prósent núna í maí eða júní á sama tíma og íbúatala landsins fari upp í 320 þúsund. Þetta sagði Steingrímur við eldhúsdagsumræður í dag.

Ákærð fyrir að sparka í lögreglumenn

Kona á sextugsaldri var í dag ákærð fyrir að hafa ráðist á tvo lögreglumenn við skyldustörf sín í nóvember árið 2010 og sparkað í bringu annars en höfuð hins. Málið var þingfest fyrir Héraðsdómi Reykjavíkur fyrr í dag. Lögreglumennirnir höfðu handtekið konuna við íbúðarhús í Vesturbæ Reykjavíkur vegna eignaspjalla og flutt hana á lögreglustöðina við Hverfisgötu. Þegar þangað var komið snerist hún gegn lögreglumönnunum með fyrrgreindum hætti.

Bernskuvinirnir vitnuðu gegn Breivik

Bernskuvinir Anders Behring Breivik og þrír vinir hans síðan á unglingsárunum vitnuðu í dag gegn fjöldamorðingjanum í Osló. Geir Lippestad, verjandi Breiviks, segir að það hafi verið mjög erfitt fyrir hann að hlusta á vitnisburðinn.

Um sextíu teknir fyrir of hraðan akstur

Um sextíu ökumenn voru teknir fyrir hraðakstur víðsvegar á höfuðborgarsvæðinu um hvítasunnuhelgina en í grófustu brotunum var ekið á 50-60 km hraða umfram leyfðan hámarkshraða. Samkvæmt upplýsingum frá lögreglunni voru þrír þessara ökumanna ölvaðir eða undir áhrifum fíkniefna en alls voru nítján teknir fyrir ölvunarakstur í umdæminu og þrettán fyrir að aka undir áhrifum fíkniefna.

Líklega eldur í ræsinu - eldsupptök ókunn

Ekki reyndist nein hætta á ferð á Öldugötunni en allt tiltækt slökkvilið var kallað á vettvang um hálf fimm vegna gruns um eldsvoða á Öldugötu 58.

Sáttatillaga lögð fram í veiðigjaldamálinu

Sáttartillaga var lögð fram í morgun á fundi atvinnuveganefndar um frumvarp um veiðileyfagjald. Björn Valur Gíslason, þingflokksformaður VG, og fulltrúi í atvinnuveganefnd segir að um sé að ræða tillaga frá meirihluta atvinnuveganefndar sem meirihlutinn telji að geti náðst ágætis samstaða um.

Allt tiltækt slökkvilið kallað að Öldugötu

Allt tiltækt slökkvilið á höfuðborgarsvæðinu hefur verið kallað að húsi á Öldugötunni í miðborg Reykjavíkur vegna reyks. Samkvæmt upplýsingum frá lögreglunni á höfuðborgarsvæðinu sást reykur koma úr þakskeggi húss, en ekki er vitað nákvæmlega hvar eldurinn er þegar þetta er skrifað.

Hátt í 700 hjólum stolið á ári

Rúmlega 100 reiðhjól verða boðin upp hjá óskilamunadeild lögreglunnar á höfuðborgarsvæðinu á laugardag klukkan 13. Þetta eru reiðhjól sem hafa fundist í óskilum víða í umdæminu og enginn hefur hirt um að sækja. Uppboðið verður haldið í húsnæði Vöku í Skútuvogi 8 í Reykjavík.

20 stiga hiti í Borgarfirði

Um og yfir tuttugu stiga hiti hefur mælst á veðurstöðvum í Borgarfirði og á Mýrum í dag. Hæstur hefur hitinn mælst á Hvanneyri, 20,5 gráður, en í Húsafelli og á Fíflholtum á Mýrum 20,1 gráða. Vestan- og norðvestanvert landið, sem og uppsveitir Suðurlands, hafa vinninginn í hitatölum dagsins.

Neyðarskilaboð klukkan 16 í dag

Klukkan fjögur í dag verður prófað viðvörunarkerfi almannavarna, sem sendir neyðar-sms-skilaboð í farsíma. Skilaboðin verða send á alla farsíma, bæði innlend og erlend númer, sem eru á þjónustusvæði símafyrirtækjanna í Vík í Mýrdal. Þau verða send úr númerinu 112 og verða á íslensku og ensku.

Al Thani málið dregst á langinn

Héraðsdómari veitti í dag verjendum sakborninga í svokölluðu al-Thani máli fresti til þess að skila greinargerðum í málinu til 1. október næstkomandi. Þeim hafði áður verið gefinn frestur til 12. júní.

Guðgeir sýndi engin svipbrigði - Skúli missti 50 lítra af blóði

Guðgeir Guðmundsson sýndi engin svipbrigði þegar fulltrúi ríkissaksóknara las yfir ákæruatriðin gegn honum í Héraðsdómi Reykjavíkur fyrir stundu. Guðgeir er ákærður fyrir tilraun til manndráps er hann stakk Skúla Eggert Sigurz fimm sinnum með hníf þegar hann réðist á hann á lögfræðistofunni Lagastoðum í mars síðastliðnum, þar af voru fjórar stungur lífshættulegar.

Lítil flugvél í vanda

Viðbúnaður var á Reykjavíkurflugvelli núna í hádeginu vegna eins hreyfils vélar sem var að koma inn til lendingar. Tveir menn voru í vélinni. Gangtruflanir voru í vélinni en hún lenti heilu og höldnu.

Viðbúnaður vegna varúðarlendingar

Töluverður viðbúnaður er á Reykjavíkurflugvelli vegna flugvélar sem er með gangtruflanir.

Fórnarlömbin í Houla voru flest tekin af lífi

Flestir hinna 108 sem fórust í Houla héraði í Sýrlandi á föstudaginn voru teknir af lífi. Þetta fullyrða eftirlitsmenn Sameinuðu þjóðanna sem hafa skoðað líkin. Vitni að morðunum fullyrða að vígamenn á vegum ríkisstjórnar Sýrlands hafi staðið að fjöldamorðunum. Þessi yfirlýsing Sameinuðu þjóðanna kemur á sama tíma og Kofi Annan erindreki samtakanna í landinu ræðir við Bashar al-Assad Sýrlandsforseta. Að sögn talsmanns SÞ lítur út fyrir að færri en tuttugu af fórnarlömbunum hafi fallið í loftárásum eða af völdum skriðdrekaskothríðar. Hinir verið teknir af lífi í tveimur aðskildum árásum á þorp á svæðinu. Fjöldi barna eru á meðal hinna látnu.

Viltu hvíla í grafhýsi Presleys?

Nú 35 árum eftir að Elvis Presley lést er hann ennþá að mala gull. Samkvæmt nýjustu fréttum getur heppinn aðdáandi hans, eða vellauðugur maður, keypt legstað í grafhýsi hans í Memphis í Tennesse fylki.

Flóttadrengir áfrýja

Máli drengjanna sem dæmdir voru í fangelsi fyrir að framvísa fölsuðum vegabréfum fyrir skömmu verður áfrýjað til Hæstaréttar. Ragnar Aðalsteinsson lögfræðingur sem fer með mál drengjanna segir óheppilegt að ákæruvaldið hafi sent tilkynningu um að drengirnir væru hugsanlega eldri en þeir segjast vera.

Tillögur að breyttum kvótafrumvörpum kynntar

Breytingartillögur við kvótafrumvörp ríkisstjórnarinnar verða kynntar á fundi atvinnuveganefndar nú rétt eftir hádegið. Forseti Alþingis ræðir í dag við formenn þingflokkanna um möguleg þinglok, og í kvöld eru eldhúsdagsumræður.

Íslendingar fara bjartsýnni inn í sumarið en í fyrra

Íslendingar fara mun bjartsýnni inn í sumarið nú en í fyrra, samkvæmt Væntingavísitölu Gallup og Capacent Gallup birti í morgun. Væntingar íslenskra neytenda jukust lítillega í maí en það er annar mánuðurinn sem væntingar landsmanna glæðast á milli mánaða.

Varúð - sterkt sólskin framundan á Íslandi

Sól og blíða er í veðurkortunum fyrir Ísland eins langt og spár ná.

Ísland myndi fagna aðild Bandaríkjanna

Ísland fullgilti, fyrst vestrænna ríkja, Hafréttarsamning Sameinuðu þjóðanna fyrir 27 árum. Bandaríkjastjórn leggur áherslu á að landið gerist aðili og tryggi með því hagsmuni sína. Bandaríkin eru eina stórþjóðin sem ekki hefur fullgilt samninginn.