140 milljónir til viðbótar vegna eldgosanna

Ríkisstjórnin samþykkti á fundi sínum í dag 139 milljóna aukafjárframlög vegna brýnna verkefna á gossvæðum á Suðurlandi í kjölfar eldgosanna árin 2010 og 2011.

Ríkisstjórnin hefur því alls lagt til viðbótarfjárveitingar sem nema um 1,5 milljörðum króna frá því eldgosa- og hamfarahrinan hófst í maí árið 2010. V

iðbótarframlagið sem var samþykkt í morgun er tillaga samráðshóps ráðuneytisstjóra um viðbrögð við náttúruhamförum, en með hópnum starfa fulltrúar frá forsætisráðuneyti, fjármálaráðuneyti og almannavarnadeild Ríkislögreglustjóra.

Viðbótarframlagið, skiptist í þrennt:

Landgræðsla ríkisins fær 54 m.kr. vegna verkefna á gossvæðunum á þessu ári. Gert er ráð fyrir að stofnunin brúi til viðbótar 20. m.kr. kostnað af sínum fjárheimildum.

Vegagerð ríkisins fær 75 m.kr. aukafjárframlag til fyrirbyggjandi aðgerða við varnargarða en það nemur um ¾ af áætluðum kostnaði við verkefnið á þessu ári.

Skaftárhreppur fær 10 m.kr. styrk á þessu ári til að takast á við óvænt útgjöld sveitarfélagsins og verkefni í kjölfar Grímsvatnagossins