Tveir gistu fangageymslur á Akureyri

Tveir fengu að gista fangageymslur lögreglunnar á Akureyri í nótt en þar fór fram Akureyrarvaka um helgina. Hátíðin tókst með eindæmum vel að sögn lögreglu og eru þeir sáttir við helgina.

Farsími í rassvasa stöðvaði byssukúlu

Kona í Colarado Springs í Bandaríkjunum heldur því fram að farsíminn hennar, sem hún geymdi í rassvasanum, hafi bjargað lífi sínu samkvæmt fréttasíðunni Gazette.com.

Milljarða hagsmunir í húfi

Milljarðar sparast í gjaldeyri náist það markmið að draga úr innflutningi jarðefnaeldsneyta um tíu prósent árið 2020. Þá mun innlend framleiðsla skila umtalsverðu í framlegð. Orkuskipti draga úr útblæstri gróðurhúsalofttegunda.

20 ár frá staðfestingu á sjálfstæði

Ólafur Ragnar Grímsson, forseti Íslands, og Jón Gnarr, borgarstjóri í Reykjavík, buðu Daliu Grybauskaitë, forseta Litháens, í heimsókn í Höfða í gærmorgun. Þá voru tuttugu ár liðin frá því að viðurkenning Íslands á sjálfstæði Eystrasaltsþjóðanna þriggja var staðfest með athöfn í Höfða.

Lenti í Keflavík vegna reyks í flugstjórnarklefa

Mikill viðbúnaður var á Keflavíkurflugvelli í nótt eftir að tilkynnt hafði verið um reyk í flugstjórnarklefa farþegaþotu frá United Airlines sem var á leið frá Washington til London. Um borði voru 181 og var ákveðið að lenda í Keflavík. Samhæfingarmiðstöð Ríkislögreglustjóra var virkjuð og tiltækt slökkvi- og sjúkralið sett í viðbragðsstöðu. Vélin lenti síðan heilu og höldnu klukkan tuttugu mínútur yfir fimm í morgun og var hættustiginu þá aflétt.

Brotið gegn eignarrétti landeigenda

Brotið er gegn stjórnarskrárvörðum eignarrétti eigenda sjávarjarða verði kvótafrumvarp sjávarútvegsráðherra að lögum, að því er fram kemur í umsögn Samtaka eigenda sjávarjarða um frumvarpið.

Risahótel á Fjöllum á borð Kínastjórnar

Huang Nubo, eigandi Zhong Kun Investment Group, hefur samið um kaup af einkaaðilum á um sjötíu prósenta hlut af landi Grímsstaða á Fjöllum og mun eignast landið ef innanríkisráðuneytið veitir samþykki sitt.

Bylgjan verið í loftinu í 25 ár

„Ég hlustaði alltaf á Bylgjuna þegar hún byrjaði. Þá var ég sölumaður hjá Myllunni árið 1986 og ók með kökur og brauð um Suðurnesin á daginn. Á kvöldin var ég plötusnúður og lét mig dreyma um að verða útvarpsmaður á Bylgjunni,“ segir Ívar Guðmundsson, dagskrárstjóri Bylgjunnar.

Samningi við miðstöð bjargað

Ríkisstjórnin ákvað einróma á fundi sínum í gær að veita aukaframlag til Útlendingastofnunar vegna reksturs miðstöðvar fyrir hælisleitendur í Reykjanesbæ. Að óbreyttu hefði stofnunin þurft að segja upp samningi við Reykjanesbæ þar sem miðstöðin er starfrækt. Var þetta gert að tillögu innanríkisráðherra.

Íslenska hagkerfið útskrifað af meðferðarheimilinu

Stjórn Alþjóðagjaldeyrissjóðsins (AGS) samþykkti í gær sjöttu og síðustu endurskoðun efnahagsáætlunar Íslands. Þar með er formlegu samstarfi við sjóðinn lokið. Í fréttatilkynningu frá forsætisráðuneytinu segir að Ísland sé þar með fyrsta ríkið til að útskrifast frá AGS í yfirstandandifjármálakreppu.

Brunnu inni í spilavíti í Mexíkó

Að minnsta kosti 52 eru látnir í Norður-Mexíkó eftir að kveikt var í spilavíti í borginni Monterrey um miðjan dag á fimmtudag. Vopnaðir menn réðust inn í spilavítið þar sem um 100 manns voru samankomnir, bæði starfsfólk og gestir. Samkvæmt sjónarvottum helltu þeir bensíni á gólf og sögðu fólki að koma sér út. Margir hræddir gestir og starfsmenn flúðu hins vegar lengra inn í bygginguna og urðu innlyksa þar. Mörg lík fundust meðal annars á salernum staðarins, þar sem fólk hafði læst sig inni til að forðast byssumennina. Fregnir hafa einnig hermt að neyðarútgangar hafi verið læstir.

Leikfélag Akureyrar leitar á náðir bæjarins

Tap á rekstri Leikfélags Akureyrar (LA) á síðasta ári nam 67 milljónum króna, samkvæmt bráðabirgðaniðurstöðum útreikninga. Bæjarráð Akureyrar samþykkti á fundi sínum á fimmtudag að greiða félaginu fyrir fram allt að 30 milljónir króna af væntanlegum framlögum næsta árs til að koma í veg fyrir að leikárið yrði stöðvað.

Efnahagsmál í brennidepli

Kosið verður til þings í Danmörku hinn 15. september næstkomandi. Lars Lökke Rasmussen forsætisráðherra boðaði til kosninga í gær og tók þannig af skarið eftir margra vikna vangaveltur, en reglubundnar kosningar hefðu átt að fara fram í nóvember.

Stjarna úr demanti

Ástralskir geimvísindamenn hafa komið auga á nýja stjörnu sem virðist gerð úr demanti. Stjarnan er í um 4000 ljósára fjarlægð nálægt miðju vetrarbrautarinnar. Þetta kemur fram í á vefmiðli The West Australian.

Jóhanna ræddi við forseta Litháen

Jóhanna Sigurðardóttir, forsætisráðherra, ræddi við forseta Litháen, Daliu Grybuskaité, um aðildarviðræður Íslands að ESB, efnahagsmál og samstarf ríkjanna tveggja yfir kvöldverðarborði á Þingvöllum í kvöld.

Undrameðal Berlusconi er jurtate

Hinn fjörmikli forsætisráðherra Ítala,Silvio Berlusconi, hefur ljóstrað upp leyndarmálinu á bak við krafta sína, jafnt pólitíska sem aðra. Undrameðalið er jurtate. Þetta tilkynnti hann eftir að hann horfði á fótboltalið sitt, AC Milan, vinna sigur á erkifjendunum í Juventus.

Búrhvalur syndir upp á strönd

Baðstrandargestir á Norður-Spáni áttu undarlegan morgun, en þegar þeir mættu á ströndina hafði 15 metra löngum búrhval skolað þar á land. Hann var enn á lífi þegar menn komu að honum, en var svo gríðarlega stór að dráttarbátur gat ekki komið honum aftur á flot. Hann dó fljótlega eftir að hann fannst.

Þrisvar kveikt í sama húsi

Þrisvar sinnum hefur verið kveikt í sömu nýbyggingu í miðborg Reykjavíkur á síðustu tveimur vikum. Slökkviliðsstjóri segir ástandið á byggingarreitum í miðbænum slæmt, skemmdarverk séu unnin og eldhætta sé mikil.

Loftárásir í fæðingabæ Gaddafi

Breskar orrustuþotur gerðu í nótt loftárásir á bæinn Sirte í Líbíu, sem er eitt síðasta vígi stuðningsmanna Gaddafís, einræðisherra. Uppreisnarmenn undirbúa nú allsherjar árás á bæinn.

Staðan hjá Kvikmyndaskólanum

33 milljónir vantar upp á tilboð ríkisins til Kvikmyndaskólans svo að hann geti haldið starfsemi sinni áfram í óbreyttri mynd. Margir nemendur við skólann munu lenda í vandræðum næstu mánaðarmót þar sem þeir fá ekki greidd námslán.

Ísland útskrifað frá AGS

Ísland er fyrsta ríkið til að útskrifast úr efnahagsáætlun Alþjóðagjaldeyrissjóðsins í yfirstandandi alþjóðafjármálakreppu. Forsætisráðherra segir viðsnúning efnahagslífsins kraftaverki líkast.

Opið hús í Þjóðleikhúsinu

Boðið verður uppá skoðunarferðir baksviðs, hestakerruferðir, barnasýningar á Stóra sviðinu, grillaðar pylsur, búningamátun og andlitsmálningu í Þjóðleikhúsinu á morgun, laugardag. Húsið verður opið frá 14:00 til 17:00 og forsetinn og prinsessan úr Ballinu á Bessastöðum taka á móti gestum með söng og skemmtilegheitum.

Nubo vill þakka fyrir lopapeysu

Áform kínverska auðmannsins Nubo, um tugmilljarða fjárfestingu í íslenskri ferðaþjónustu, þarfnast kyrfilegrar skoðunar, að mati Svandísar Svavarsdóttur umhverfisráðherra. Sjálfur segist Nubo vilja með þessu þakka fyrir íslenska lopapeysu sem honum var gefin fyrir þrjátíu árum og stefnir að því að gera Ísland að miðstöð kínverskra ferðamanna á leið til Norðurlanda.

Hagnaður hjá Byr

Byr hagnaðist um ellefu hundruð milljónir króna á síðasta ári. Hagnaður skýrist aðallega af endurmati á eignum. Ekki liggur fyrir hversu mikið ríkið fær endurgreitt af 900 milljóna króna fyrirgreiðslu til Byrs.

Laug Gaddafi um andlát dóttur sinnar?

Hingað til hefur verið fullyrt að kjördóttir Gaddafis, leiðtoga Líbíu, hafi farist í sprengjuárás árið 1986. En nú hafa fundist vísbendingar um að hún hafi alls ekki farist, heldur sé enn á lífi. Dóttirin heitir Hana og er sögð hafa týnt lífi í loftárás Bandaríkjamanna á Trípolí, höfuðborg Líbíu, árið 1986.

Níu milljóna afgangur af rekstri spítalans

Níu milljóna tekjuafgangur var af rekstri Landspítalans á fyrri helmingi ársins. Björn Zoëga, forstjóri Landspítalans, gerir þetta að umtalsefni í fjölmiðlapistli sínum.

Háskólalestin stoppar á morgun

Háskólalestin lýkur yfirferð sinni um landið með pompi og prakt og heimsækir tvö bæjarfélög með vísindi, fjör og fræði á morgun, laugardaginn 27. ágúst. Sandgerði og Seltjarnarnes eru áningarstaðirnir og þar verður boðið upp á góða skemmtun og fræðslu fyrir alla fjölskylduna.

Tímamóta minnst í Höfða

Forseti Litháens, dr. Dalia Grybauskaitë, heimsótti Höfða í morgun. Tilefnið var að í dag eru liðnir nákvæmlega tveir áratugir frá því að utanríkisráðherrar Íslands og Litháen staðfestu með undirritun að Íslendingar viðurkenndu fullt og óskorað sjálfstæði Litháa og annarra Eystrasaltsþjóða.

Bless, bless... AGS!

Atvinnuleysi er enn hátt en minnkar hraðar en búist var við og hefur ekki verið lægra frá hruni, segir í yfirlýsingu ríkisstjórnarinnar í tilefni af því að samstarfi íslenskra stjórnvalda og Alþjóðagjaldeyrissjóðsins er formlega lokið. Ríkisstjórnin segir að hið sama megi segja um kaupmátt launa sem sé nú að aukast á ný og hafi ekki verið meiri frá hruni.

Polli er kominn heim til sín

Páfagaukurinn Polli, sem lýst var eftir hér á Vísi í vikunni, er kominn heim til sín. Þetta kemur fram í tölvupósti sem Auður Helgadóttir sendi Vísi. Eftir að Vísir auglýsti eftir gauknum hafði fólk samband við Auði og sagðist hafa séð gaukinn. Eigendunum tókst ekki að handsama hann og voru þeir búnir að telja hann af þegar þeir fengu símtal frá verkfræðingum á Höfða sem höfðu handsamað gaukinn og könnuðust við hann af Vísi. Gaukurinn er því kominn heim til sín í gott yfirlæti.

Að minnsta kosti sextán látnir í Abuja

Nú er ljóst að í það minnsta sextán eru látnir eftir að bílsprengja sprakk við höfuðstöðvar Sameinuðu þjóðanna í Abuja höfuðborg Nígeríu í morgun. Tugir eru sárir og margir þeirra sagðir í lífshættu. Sprengingin var gríðarlega öflug og lagði neðstu hæðir byggingarinnar í rúst.

Læknir Sigmundar rökstyðji ummæli sín eða dragi þau til baka

Steinar B. Aðalbjörnsson næringarfræðingur gerir verulegar athugasemdir við fullyrðingar sem Sigmundur Davíð Gunnlaugsson hefur sett fram opinberlega varðandi megrunarkúr sem hann hefur hafið.

Tíuþúsund gloss hafa selst

Tíuþúsund gloss hafa selst í söfnunarátaki „Á allra vörum þetta árið“. Aðstandendur söfnunarátaksins fagna árangrinum, sem von er. „Viðtökurnar hafa verið með hreinum ólíkindum og andinn og krafturinn í kringum þetta átak hefur sjaldan verið betri", segir Guðný Ó. Pálsdóttir ein forsvarskona Á allra vörum í fréttatilkynningu.

Metflugumferð yfir Ísland

Aldrei hafa fleiri flugvélar í millilandaflugi flogið um íslenska flugstjórnarsvæðið á einum mánuði eins og í síðasta mánuði. Alls flugu 12.439 vélar um svæðið en fyrra metið 12.114 var sett í júlí 2008. Flugumferðinni er stjórnað úr flugstjórnarmiðstöðinni í Reykjavík.

Forsetar kynntu sér starfsemina í Skógarhlíð

Dalia Grybauskait, forseti Litháens, og Ólafur Ragnar Grímsson, forseti Íslands, heimsóttu björgunarmiðstöðina í Skógarhlíð í morgun, en sá fyrrnefndi er hér í opinberri heimsókn. Á móti þeim tóku Haraldur Johannessen, ríkislögreglustjóri, Georg Lárusson, forstjóri Landhelgisgæslu Íslands, og Margrét Laxdal, varaformaður Slysavarnafélagsin Landsbjargar.

Neðanjarðarfljót streymir undir Amasón

Brasilískir vísindamenn hafa gert merka uppgötvun en svo virðist sem risastórt neðanjarðarfljót renni rúmum fjórum kílómetrum undir sjálfu Amasón, stærsta fljóti veraldar. Fljótið hefur verið nefnt Hamza, í höfuðið vísindamanninum sem fór fyrir rannsókninni en nýja fljótið er rúmir sex þúsund kílómetrar á lengd, eða svipað langt og fljótið fræga á yfirborðinu. Greint var frá uppgötvuninni í Ríó de Janeiro á fundi Brasilíska jarðfræðifélagsins.

Verður 115 ára í dag

Elsta kona í heimi, hin bandaríska Besse Cooper, heldur upp á 115 ára afmæli sitt í dag.

Skrímslið í Austurríki barnaði ekki dætur sínar

Saksóknari í Austurríki, sem rannsakar nú ásakanir þess efnis að áttræður maður hafi misnotað tvær þroskaheftar dætur sínar síðustu fjörutíu ár, segir að konurnar hafi ekki getið manninum börn. Málið hefur vakið gríðarlega athygli enda þykir margt líkt með því og máli Josefs Fritzl, sem einnig er austurrískur. Fritzl hélt dóttur sinni fanginni í 24 ár og eignaðist hún sjö börn á meðan hún var í prísundinni.

Segir gagnrýni á efnahagsbrotadeild snúa að yfirstjórn RLS

Efnahagsbrotadeild ríkislögreglustjóra skorti faglega yfirstjórn og metnað. Þá döguðu of mörg mál þar uppi þótt rannsókn þeirra hefði tekið langan tíma. Þetta kemur fram í minnisblaði ríkissaksóknara til innanríkisráðherra. Helgi Magnús Gunnarsson, fyrrverandi saksóknari efnahagsbrotadeildar, segist hafa fengið þau svör hjá Valtý Sigurðssyni, fyrrverandi ríkissaksóknara, að gagnrýni hans beindist að yfirstjórn RLS, og þar með Haraldi Johannessen.

Stofna furstadæmi til að sleppa við niðurskurðinn á Ítalíu

Þorpsbúar í ítölsku fjallahéraði hafa fundið upp á nýstárlegri leið til þess að sleppa við boðaðar niðurskurðaraðgerðir ríkisstjórnarinnar. Þeir hafa stungið upp á því að þorpinu Filettino verði breytt í furstadæmi og hafa þegar haft samband við Prins Emanúel Filiberto, afkomanda fyrrverandi konungs á Ítalíuskaga, og beðið hann um að gerast þjóðhöfðingi.

Útlendingastofnun fær aukapening fyrir hælisleitendur

Ríkisstjórnin ákvað í morgun, að tillögu innanríkisráðherra, að veita aukaframlag til Útlendingastofnunar vegna reksturs miðstöðvar fyrir hælisleitendur. Að óbreyttu hefði stofnunin þurft að segja upp samningi við Reykjanesbæ þar sem miðstöðin er starfrækt.

Þríburar meðal 29 arnarunga sem komust á legg

Arnarvarp gekk vonum framar þetta sumarið og komust alls 29 ungar á legg, þrátt fyrir afleitt tíðarfar í vor. Aðeins sjö sinnum áður hafa komist upp fleiri arnarungar á síðustu fimmtíu árum.

Mikil sprenging í húsnæði Sameinuðu þjóðanna

Sprenging varð í byggingu Sameinuðu þjóðanna í borginni Abuja í Nígeríu í morgun. Fréttamaður BBC fréttastöðvarinnar heyrði hátt sprengihljóð og lögregluþyrla sveimar nú yfir bygginguna. Talsmaður Sameinuðu þjóðanna segir að sprengingin hafi orðið vegna sprengju sem sprakk í húsinu. Töluverðan reyk leggur frá byggingunni. BBC segir að óstaðfestar fréttir hermi að fjöldi fólks hafi særst í sprengingunni. Stór bílasprengja sprakk í höfuðstöðvum lögreglunnar í Abuja í júní.

Kosið í Danmörku um miðjan september

Lars Løkke Rasmussen, forsætisráðherra Danmerkur, hefur boðað til kosninga í landinu þann 15. september næstkomandi.

Ungir sjálfstæðismenn sammála Bjarna

Stjórn Sambands ungra sjálfstæðismanna lýsir yfir stuðningi við ummæli Bjarna Benediktssonar, formanns Sjálfstæðisflokksins, þess efnis að draga beri aðildarumsókn Íslands að Evrópusambandinu til baka. Bjarni lét ummælin falla í útvarpsþættinum Sprengisandi á Bylgjunni á dögunum og í yfirlýsingu frá stjórn SUS segir að þau séu í takt við yfirlýsingar sambandsins í gegnum tíðina.