Spádómskýrin Glæta óviss um Icesave

Spádómskýrin Glæta hefur ekki gert upp hug sinn varðandi Icesave samninginn, segir eigandi hennar. Glæta, frá bænum Kotlaugum í Hrunamannahreppi reyndist margsinnis sannspá þegar hún var að spá fyrir um leiki íslenska handknattleiksliðsins.

Búið að losa sprengiefnið úr Goðafossi

Tveir gámar sem voru fullir af sprengiefni voru fluttir úr Goðafossi um tíuleytið í morgun að íslenskum tíma. Fram kemur á fréttavef Aftenposten að verkið hafi gengið mjög vel. Aftenposten segir jafnframt að í skipinu sé málningaþynnir og etanól sem gæti skapað eldhættu.

Stungið á tugi dekkja í Vesturbæ

Stungið var á dekk á hátt í 30 bifreiðum í Vesturbæ Reykjavíkur í nótt. Lögreglan hefur þegar fengið tilkynningar um 26 bifreiðar sem stungið var á og býst við því að þeim fari fjölgandi. Bifreiðarnar voru á Melunum, við Sundlaug Vesturbæjar og við Hofsvallagötu. Nú síðast barst svo tilkynning um að stungið hefði verði á dekk á bifreið við Sóleyjargötu.

Svandís leggst gegn álveri í Helguvík

Svandís Svavarsdóttir, umhverfisráðherra segir álver í Helguvík vera óraunhæft. Hægt sé að gera bæði umhverfisvænari og arðbærari verkefni fyrir atvinnulífið á Reykjanesi. Bæjarstóri Reykjanesbæjar, Árni Sigfússon, hefur lýst því yfir í fréttum að hann vilji nú í framhaldi af kísilveri í Helguvík að álversverkefni á sama stað gangi eftir. Það verkefni sé mun stærra og hafi víðtækari áhrif svo sem fyrir atvinnulífið.

Stjórnarþingmaður: Erfitt fyrir forsetann að synja ekki

"Mér finnst mjög erfitt fyrir forsetann að fara gegn því að senda þennan samning í þjóðaratkvæðagreiðslu þegar þessi fjöldi undirskriftasöfnunar er kominn,“ sagði Lilja Mósesdóttir, þingmaður VG, í þættinum Sprengisandi á Bylgjunni í dag. Þar tókst Lilja á við þær Ragnheiði Ríkharðsdóttur, þingmann Sjálfstæðisflokksins, og Ólínu Þorvarðardóttur, þingmann Samfylkingarinnar, um Icesave lögin sem samþykkt voru á Alþingi í síðustu viku.

Krónprinsparið býður 1900 manns í brúðkaupið sitt

Tilkynnt hefur verið að Vilhjálmur prins og Katrín verðandi eiginkona hans ætli að bjóða 1900 manns í brúðkaupsveislu sína þann 29.apríl næstkomandi. Það er Breska ríkisútvarpið sem greinir frá en engin nöfn hafa verið nefnd. Meira en helmingur gesta eru fjölskyldumeðlimir og vinir.

Forsetinn boðar til blaðamannafundar

Forseti Íslands Ólafur Ragnar Grímsson boðar til blaðamannafundar á Bessastöðum í dag klukkan þrjú. Gera má ráð fyrir að þar muni hann gera grein fyrir afstöðu sinni til Icesave laganna sem samþykkt voru í síðustu viku. Um 40 þúsund manns hafa skorað á forsetann að synja lögunum staðfestingar.

Sprengiefni fjarlægt af Goðafossi í dag

Gámar fullir af sprengiefni verða fjarlægðir úr Goðafossi í dag. Ólafur William Hand, upplýsingafulltrúi Eimskips, sagði í samtali við fréttastofu að sprengiefnið hefði forgang þegar byrjað væri að afferma skipið.

Lögreglan lokaði skemmtistað í borginni

Lögreglan á höfuðborgarsvæðinu lokaði skemmtistað á Grensásvegi um eittleytið í nótt. Inni á staðnum voru ungmenni að skemmta sér. Um 250 manns voru á staðnum og fæstir þeirra höfðu aldur til að vera inni á vínveitingastað. Ungmennin inni á staðnum voru allt niður í 16 ára að aldri. Þá voru sex einstaklingar handteknir í miðborginni í nótt með fíkniefni í fórum sínum.

Óttast um dýralíf vegna skipsstrandsins

Norskar stofnanir á sviði náttúru- og umhverfisverndar hafa rannsakað ströndina í nágrenni við staðinn þar sem Goðafoss sökk. Hingað til höfum við fundið tíu dauða fugla, en það eru mun fleiri fuglar sem hafa komist í tæri við olíu," segir Per Olav Pettersen, hjá IUA sem er norsk stofnun sem berst gegn umhverfismengun, í samtali við Aftenposten.

Þúsundir manna á Háskóladeginum

Haldið var upp á Háskóladaginn í dag og fjöldi fólks á öllum aldri nýtti tækfærið og kynnti sér starfsemi og námsframboð í íslenskum háskólum. Háskólinn í Reykjavík tók á móti gestum í húsakynnum sínum við Nauthólsvík, en það er í fyrsta sinn sem HR heldur upp á Háskóladaginn á eigin spýtur og í eigin húsnæði . Jóhann Hlíðar Harðarson, forstöðumaður almannatengsla við HR, var að vonum ánægður með afrakstur dagsins og sagði daginn hafi gengið vonum framar og að aldrei áður hafi tekist eins vel til og nú. Þúsundir manna sóttu HR-inga heim og kynntu sér starfsemina og tóku þátt í ýmsum viðburðum á vegum starfsmanna og nemenda skólans.

Losun skipsins verði lokið um miðja vikuna

Aðgerðarstjóri hjá norsku strandgæslunni, Johan Marius Ly, hefur efasemdir um það að hægt verði að að afferma Goðafoss alveg á næstunni. Í samtali við Aftenposten segist hann þó vita fyrir víst að björgunarlið muni gera áætlanir fyrir kvöldið um það hvernig að björguninni verði staðið.

Fjögurra ára stúlka stungin til bana

Fjögurra ára gömul stúlka lést af stungusárum á heimili sínu í Bury í Englandi. Stúlkan hét Chloe Burke og var látin þegar lögreglu bar að. Móðir stúlkunnar, Dawn Makin, 33, fannst við hlið dóttur sinnar, meðvitundarlaus og með skurði á úlnliðum. Hún dvelur nú á sjúkrahúsi og ástand hennar talið alvarlegt.

Mótmælendur endurheimta Perlutorg

Á fjórða tug brynvarðra bíla mátti sjá yfirgefa Perlutorg í Manama borg í Bahrain, nú á laugardag og er það þriðja bílalestin sem yfirgefur svæðið síðastliðinn sólarhring, en torgið hefur verið miðpunktur mótmælanna .

Framsóknarkonur skora á forsetann

"Íslenska þjóðin á að eiga síðasta orðið um Icesave samninginn sem ljóst er að felur í sér þungar en löglausar byrðar fyrir Íslendinga og komandi kynslóðir." Þetta segir framkvæmdastjórn Landssambands framsóknarkvenna í ályktun sem send var fjölmiðlum í gær.

Brátt byrjað að afferma Goðafoss

"Björgunarfélag hefur nú metið aðstæður og lagt fram nákvæma björgunaráætlun fyrir norsku strandgæsluna og sérfræðinga Eimskips sem unnið verður eftir,“ segir Ólafur William Hand, upplýsingafulltrúi Eimskips. "Spáð er áframhaldandi logni á strandsvæðinu sem mun auðvelda björgunaraðgerðir en verkefnið krefst nákvæmni og þolinmæði og ekki verður flanað að neinu,“ segir Ólafur jafnframt.

Óvíst hvenær byrjað verður að bjarga Goðafossi

Enn er alls óvíst hvenær byrjað verður að reyna að ná Goðafossi af strandstað, segir Ólafur William Hand, upplýsingafulltrúi Eimskips í samtali við fréttastofu. Menn á vegum rannsóknarnefndar sjóslysa í Noregi eru komnir um borð í Goðafoss, sem strandaði við Frederiksstadt í Noregi á fimmtudaginn. Þeir munu verja mestum hluta dagsins í að taka skýrslur af áhöfninni og skipstjóranum um hvað fór úrskeiðis og hvers vegna, eftir því sem fréttamaður TV 2 fréttastöðvarinnar fullyrðir.

Ströndinni verður breytt

Til stendur að gera breytingar á ströndinni, þar sem Goðafoss strandaði á fimmtudag, til þess að reyna að koma í veg fyrir að óhöpp af þessu tagi verði aftur. Það munu þó líða nokkur ár þangað til breytingarnar ganga í gegn, að því er fram kemur í Dagsavisen.

Kannabissali handtekinn á Selfossi

Lögreglan á Selfossi hafði afskipti af ungum manni inni á veitingastað á selfossi í gærkvöldi. Lögregluþjónar þóttust finna kannabislykt af manninum sem brást illa við afskiptum lögreglu og var hann að lokum handtekinn eftir smá átök. Á manninum fundust kannabisefni og vörur sem notaður eru til að búa kannabisefni undir sölu. Hann gisti fangageymslur og bíður skýrslutöku.

Þrír fréttamenn hjá 365 tilnefndir

Þrír fréttamenn hjá 365 miðlum eru tilnefndir til Blaðamannaverðlauna 2010, en tilnefningarnar voru opinberaðar á miðnætti. Annars vegar er um að ræða blaðamennina Stíg Helgason og Trausta Hafliðason, hjá Fréttablaðinu, sem fá tilnefningu í flokknum Rannsóknarblaðamennska ársins 2010 fyrir greinargóða og upplýsandi umfjöllun um málefni meðferðarheimilisins Árbótar. Í rökstuðningi segir að umfjöllunin hafi varpað nýju ljósi á umdeild vinnubrögð í stjórnmálum og stjórnsýslu.

Jónsi fékk Norrænu tónlistarverðlaunin

Tónlistarmaðurinn Jón Þór Birgisson hlaut í gær Norrænu tónlistarverðlaunin. Margir þekkja eflaust Jón Þór sem Jónsa úr hljómsveitinni Sigurrós en hann hlaut verðlaunin fyrir sólóplötu sína Go, sem kom út á síðasta ári. Þetta var í fyrsta skipti sem Norrænu tónlistarverðlaunin eru afhent. Auk Jónsa var tónlistarkonan Ólöf Arnalds tilnefnd til verðlaunanna. Jónsi var að vonum kátur með verðlaunum en hann var af tilviljun staddur í Osló í rómantískri helgarferð þegar verðlaunin voru afhent.

Í kappakstri á 130 kílómetra hraða

Tveir ökumenn voru teknir á 132 kílómetra hraða á Skutulsfjarðarbraut á Ísafirði um miðnættið í gær. Þar er hámarkshraði 60 kílómetrar á klukkustund. Mennirnir gáfu engar skýringar á athæfi sínu, en lögreglan á Vestfjörðum segir að það líti út fyrir að mennirnir hafi verið í kappakstri. Að sögn lögreglunnar mega mennirnir búast við því að verða sviptir ökuleyfi í þrjá mánuði, fá hundrað þúsund króna sekt og fjóra punkta í ökuferilsskrá.

Vilja tryggja hæfa dómara

Dómstólaráð gerir ráð fyrir aukafjárveitingu frá Alþingi til að standa undir kostnaði við tímabundna launahækkun dómara. Laun dómara við Héraðsdóm Reykjavíkur og laun hæstaréttardómara hækka um tæpar 102 þúsund krónur á mánuði til janúarloka 2013.

Hrinti sambýliskonu sinni fram af svölum

Ríkissaksóknari hefur ákært mann á fertugsaldri fyrir að halda konu nauðugri og misþyrma henni. Að því búnu sló hann hana svo hún féll niður af svölum. Hann er einnig ákærður fyrir hótun og tilraun til fjárkúgunar. Hann játaði að hafa haldið konunni nauðugri en neitaði að hafa misþyrmt henni. Þá tók hann ekki afstöðu til ákæru um hótun og tilraun til fjárkúgunar við þingfestingu.

Talaði aldrei fyrir dómstólaleiðinni

Formaður íslensku Icesave-samninganefndarinnar, Lee C. Buchheit, telur samþykkt Alþingis á Icesave-frumvarpinu vera farsæla lausn fyrir Ísland. Alþingi hafi unnið góða vinnu og komist að skynsamlegri niðurstöðu. Þá neitar Buchheit því að hafa mælt fyrir dómstólaleiðinni á fyrri stigum málsins.

60 þúsund veiktust af svínaflensu

Talið er að um 60 þúsund manns hafi veikst af svínainflúensu hérlendis. Um 170 voru lagðir inn á sjúkrahús vegna hennar haustið 2009. Af þeim þurfti að leggja 22 inn á gjörgæsludeild. Lágu margir í öndunarvélum vikum saman.

Skipstjórinn viðurkenndi mistök

Skipstjórinn á Goðafossi hefur viðurkennt við yfirheyrslur hjá norsku lögreglunni að hafa tekið ranga stefnu þegar skipið strandaði, að sögn fréttavefs norska ríkissjónvarpsins. Fleiri úr áhöfn skipsins hafa verið yfirheyrðir.

Lýst eftir góðum verkum

Nú eru að verða síðustu forvöð fyrir lesendur að tilnefna til Samfélagsverðlauna Fréttablaðsins en tilnefningarfrestur rennur út á mánudag.

Yfir 500 námsleiðir kynntar

Háskóladagurinn verður haldinn í dag. Kynning verður á námsframboði næsta árs í háskólum á Íslandi, í Danmörku og Svíþjóð. Kynningarnar fara fram í Ráðhúsi Reykjavíkur, Háskóla Íslands og Háskólanum í Reykjavík. Kynntar verða yfir 500 mismunandi námsleiðir.

Vilja samhæfa viðbrögð allra

Svandís Svavarsdóttir umhverfisráðherra telur koma til greina að á vegum ráðuneytisins verði skipuð sérstök verkefnisstjórn vegna díoxínmengunar frá sorpbrennslum. Ólína Þorvarðardóttir, þingmaður Samfylkingarinnar, innti ráðherra eftir skoðun hennar á þessu í óundirbúnum fyrirspurnartíma á Alþingi í vikunni.

Tólf prósent nauðgunarmála árið 2008 enduðu með dómi

Í nýrri skýrslu embættis ríkislögreglustjóra og lögreglustjórans á höfuðborgarsvæðinu kemur fram að rannsókn lögreglu var hætt eða vísað frá í 63 prósent tilvika um nauðgun árið 2008. Í 25 prósent tilvika voru brotin felld niður hjá ríkissaksóknara en í 12 prósent þeirra féll dómur.

Tvö börn í bílnum sem ekki voru í bílbelti

Sjö ökumenn voru stöðvaðir í umdæmi lögreglunnar á Selfossi í dag fyrir að vera ekki í bílbelti. Einn ökumaðurinn var einnig með tvö 12 til 13 ára gömul börn í bílnum sem voru ekki í belti. Hann játaði brot sitt greiðlega og þarf að greiða 40 þúsund króna sekt auk þess að fá þrjá punkta á ökuskírteinið.

Femínistar leggjast gegn því að staðgöngumæðrun verði heimiluð

Femínistafélag Íslands leggst gegn því að staðgöngumæðrun verði heimiluð á Íslandi, hvort sem er í hagnaðarskyni eða velgjörðarskyni. Í ályktun kemur fram að félagið telji hættulegt að ganga út frá því að barneignir séu álitin sjálfsögð réttindi og að litið sé á að konur, og æxlunarfæri þeirra, sem verkfæri í þeim tilgangi að tryggja öðrum þessi réttindi.

Kafarar kanna skemmdir á Goðafossi

Undirbúningur er hafinn að því að dæla olíunni sem eftir er í Goðafossi úr skipinu. Eins og komið hefur fram hafa sérfræðingar náð að stöðva olíulekann úr skipinu sem strandaði nokkrar sjómílur út af Fredriksstad í Noregi. Kafarar eru þessa stundina að kanna skemmdir á skipinu en það situr fast á skeri um 100-200 metra frá landi.

Ný íslensk vefverðlaun kynnt til sögunnar

Farsímavefur Vísis er meðal þeirra vefja sem eru tilnefndir til Nexpo vefverðlaunanna, nýrra verðlauna sem verða veitt í fyrsta skipti á sýningunni Netið Expo í mars.

Auglýst eftir dómurum við Hæstarétt

Innanríkisráðuneytið hefur auglýst laus til umsóknar þrjú embætti dómara við Hæstarétt Íslands í samræmi við lög sett í fyrra þar sem meðal annars er veitt heimild til að fjölga dómurum tímabundið um þrjá. Þannig verði dómarar við Hæstarétt tólf talsins til að bregðast við því aukna álagi sem orðið hefur hjá dómstólum.

Ökumenn fara sparlega með stefnuljósin

Átak lögreglunnar á höfuðborgarsvæðinu í að fylgjast með stefnuljósanotkun er enn í fullum gangi.

Helmingur ökumanna í Skeiðarvogi yfir hámarkshraða

Brot 162 ökumanna voru mynduð í Skeiðarvogi í Reykjavík í gær. Fylgst var með ökutækjum sem var ekið Skeiðarvog í suðurátt, austan gatnamóta við Sólheima. Á einni klukkustund, eftir hádegi, fóru 314 ökutæki þessa akstursleið og því ók meirihluti ökumanna, eða 52%, of hratt eða yfir afskiptahraða. Meðalhraði hinna brotlegu var 44 km/klst en þarna er 30 km hámarkshraði. Nítján óku á 50 km hraða eða meira en sá sem hraðast ók mældist á 59. Eftirlit lögreglunnar var tilkomið vegna ábendinga um hraðakstur en við Skeiðarvog eru bæði Vogaskóli og Menntaskólinn við Sund.

BSRB átelur launahækkun dómara

BSRB átelur ákvörðun kjararáðs um sérstakt tímabundið álag á laun til hæstaréttardómara og dómara við Héraðsdóm Reykjavíkur.

Móðir hringdi í lögreglu vegna tölvunotkunar sonarins

Fyrr í vikunni var lögregla kölluð að heimili á höfuðborgarsvæðinu vegna ágreinings um tölvunotkun. Þar áttu mæðgin í útistöðum en þrætueplið var tölvunotkun sonarins. Móðirin vildi meina að tölvunotkunin bitnaði á náminu en pilturinn sá hlutina ekki sömu augum. Reynt var miðla málum og síðan farið af vettvangi. Ekki er vitað hvort viðvarandi lausn fannst á tölvunotkun unglingsins á þessu heimili en vandamálið er ekki með öllu óþekkt. Um það vitna önnur útköll lögreglu af sama tagi.

Lekinn úr Goðafossi hefur stöðvast

Svo virðist vera sem olíulekinn í Goðafossi hafi stöðvast. Þetta kom fram í máli stjórnanda björgunaraðgerðanna í dag en Goðafoss strandaði í Oslófirði í gærkvöldi. Olían sem lak úr skipinu hefur nú náð landi á tveimur stöðum, á Akeroya og á Vikertangen á Asmalöy. Norsku strandgæslunni hefur verið hrósað fyrir góðan viðbragðstíma, en olíugirðingar voru komnar umhverfis skipið sex tímum eftir strandið.

Siðanefnd BÍ vísar frá kæru Öryrkjabandalagsins

Siðanefnd Blaðamannafélags Íslands hefur vísað frá sér kæru sem Öryrkjabandalag Íslands lagði fram til nefndarinnar vegna fréttar Stöðvar 2 um málefni Freyju Dísar Númadóttir. Fréttin birtist þann 15. desember 2010 og var innlegg í umfjöllun um stöðu öryrkja á Íslandi. Í áliti Siðanefndarinnar segir að nefndin telji aðild kæranda ekki uppfylla skilyrði siðareglna Blaðamannafélagsins um hagsmunatengsl milli kæranda og kæruefnis. Af þessari ástæðu verður málið ekki tekið til efnislegrar umfjöllunar.

Attac samtökin krefjast þess að forsetinn vísi Icesave til þjóðarinnar

Attac samtökin á Íslandi krefjast þess að forseti Íslands vísi Icesave samningnum til þjóðarinnar og tryggi með því lágmarkslýðræði.

Fjölskyldan sátt við lokað þinghald yfir Þorvarði

Þinghald yfir Þorvarði Davíð Ólafssyni verður lokað. Dómari í Héraðsdómi Reykjavíkur úrskurðaði um þetta í morgun. Þorvarður Davíð er ákærður fyrir tilraun til manndráps þegar hann réðist á föður sinn, tónlistarmanninn Ólaf Þórðarson, í nóvember á síðasta ári.

Stóllinn Magni fer í Hörpu

Í ráðstefnusali Hörpunnar hefur verið valinn stóllinn Magni en hann er hannaður af Valdimar Harðarsyni arkitekt. Hann er framleiddur á Íslandi hjá Stáliðjunni í Kópavogi og Zenus bólstrun. Magni verður einnig í hvíldar og kaffirými listamanna. Samtals verða framleiddir 970 stólar af Magna fyrir Hörpu.