Mótmælendur endurheimta Perlutorg

Á fjórða tug brynvarðra bíla mátti sjá yfirgefa Perlutorg í Manama, höfuðborg Bahrain, nú á laugardag og er það þriðja bílalestin sem yfirgefur svæðið síðastliðinn sólarhring, en torgið hefur verið miðpunktur mótmælanna.

Herinn hverfur frá fyrir tilstilli konungsfjölskyldunnar í Bahrain, en með því vill konungsfjölskyldan verða við kröfum mótmælenda og er brotthvarf lögreglu og hermanna liður í því að draga úr þeim óróa sem umlykur mótmælin og í senn til að koma á samræðum milli stjórnvalda, stjórnarandstöðu og mótmælenda.

Lögregla var eftir á svæðinu enda höfðu mótmælendur lýst því yfir að mótmælin haldi áfram. Lögregla beitti táragasi á mótmælendur sem gengu inn á torgið en lögregla þurfti frá að hverfa að endingu þar sem íbúar Bahrain hafa flykkst í þúsundum á torgið þrátt fyrir að vegtálmar hafi verið settir upp í kringum Manamaborg til að sporna við því að enn fleiri mæti til mótmælanna.

Síðastliðinn föstudag skutu yfirvöld á mótmælendur og urðu minnst fjórum þeirra að bana, en það staðfesti sjúkraflutningamaður við CNN. Tala látinna í Bahrain er því orðin 10 síðan að mótmælin brutust út en að auki hefur fjöldi fólks hefur leitað til sjúkrahúsa í borginni með ýmsa áverka sem hlotist hafa af aðgerðum yfirvalda.

Abdul Latif Al Zayani, sérstakur sendiherra Bandaríkjanna í Bahrain, segir að aðeins hafi verið skotið yfir hópa í varúðarskyni og bætti því við að aðgerðir yfirvalda væru hvorki úr hófi né í bága við lög.

Rót mótmælanna

Stór fjöldi mótmælenda eru sjítar, enda eru þeir um 70% þjóðarinnar og hafa löngum verið óánægðir með stjórnvöld og konungsfjölskylduna, sem er sunnítar. Þá telja sjítar að þeim sé mismunað varðandi húsnæðismál og störf innan ríkisins og krefjast pólitískra- og efnahagslegra úrbóta. Kröfur mótmælanda hafa aukist eftir því sem mótmælin ílengjast og krefjast nú margir þess þingið verði leyst upp.

Prins Bahrain, Salman bin Hamad Al Khalifa, hét því að hygla ekki einum hópi á kostnað annars og hvatti til samstöðu og vill einblína á að þjóðina sem eina heild þar sem gagnkvæm virðing ríkir á meðal fólks. Það var prinsinn sem fyrirskipaði brotthvarf stórra hópa lögreglu- og hermanna og hefur konungurinn, Hamad bin Isa Al Khalifa tilkynnt að prinsinn mun leiða viðræður til að koma á sátt.

Obama fordæmir ofbeldi gagnvart mótmælendum

Barack Obama Bandaríkjaforseti hefur verið gagnrýninn á bandamenn sína í Bahrain og segist hafa þungar áhyggjur af frásögnum um það ofbeldi sem hefur átt sér stað. Segist hann fordæma beitingu valds gagnvart friðsælum mótmælum í Bahrain og víðar.