Það er vont, en það venst

Frumvarpi um málefni RUV ohf. hefur verið frestað á Alþingi og er nú ljóst að ekki verður af afgreiðslu þess fyrr en á vorþingi. Það er vont, en það venst, segir útvarpsstjóri um áframhaldandi óvissu varðandi málefni stofnunarinnar. Í morgun hófst á Alþingi önnur umræða um málefni Ríkisútvarpsins, en ákveðið hefur verið að fresta þriðju umræðu þessa umdeilda frumvarps þar til í janúar.

Múslimaráð Sómalíu hafnar þátttöku friðargæsluliða

Múslimaráðið sem ræður ríkjum í stórum hluta Sómalíu hefur hafnað því að Sameinuðu þjóðirnar sendi þangað friðargæslulið og segjast ætla að berjast gegn því af öllu afli ef til þess kemur.

Ólafur Ragnar og Al Gore í San Francisco

Forseti Íslands mun gera grein fyrir árangri Íslendinga í nýtingu jarðhita og hvernig sú kunnátta hefur stuðlað að samstarfsverkefnum víða um veröld, á samráðsfundi sem honum og Al Gore, fyrrverandi varaforseta Bandaríkjanna var sérstaklega boðið til, í San Francisco.

Mótmælendur fá skilorðsbundinn dóm

Héraðdsdómur Austurlands hefur dæmt sex breska ríkisborgara í tveggja mánaða skilorðsbundið fangelsi og tvo Breta í eins mánaðar fangelsi fyrir að hafa ruðst í heimildarleysi inn á skrifstofu verkfræðistofunnar Hönnunar á Reyðarfirði í sumar og gert þar tilraun til að svipta starfsmenn frelsi sínu.

Ísraelar hafa ekki áhyggjur af skýrslu Íraksnefndarinnar

Forsætisráðherra Ísraels, Ehud Olmert, útilokaði í dag viðræður við Sýrland í náinni framtíð og bjóst hann heldur ekki við því að verða var við aukinn þrýsting frá Bandaríkjunum þess efnis þrátt fyrir skýrslu Íraksnefndarinnar sem kom út í gær en hún bendir á að ef einhver árangur á að nást í friðarumleitunum í Mið-Austurlöndum verði að huga að málefnum Ísraels.

Mútuþægni mikið vandamál í þróunarlöndum

Obinberir starfsmenn sem þiggja mútur eru gríðarlegt vandamál í þróunarlöndunum og jafnvel nokkrum Evrópusambandslöndum samkvæmt nýrri könnun sem frjálsu félagasamtökin Transparency International stóð að.

Hinir stéttlausu mótmæltu í Mumbai

Hundruð þúsunda Dalíta, af lægstu stétt Hindúa, héldu í dag kröfugöngu í Mumbai, stærstu viðskiptaborg Indlands. Kröfugangan var haldin í dag í tilefni þess að 50 ár eru liðin síðan leiðtogi hinna stéttlausu, Dr. Ambedkar, lést. Fólkið mótmælti um leið hinni rótgrónu mismunun eftir stétt, sem viðgengst í Indlandi, á grunni hindúatrúar.

Heilagur Nikulás heimsótti börn á Vestfjörðum

Pólski jólasveinninn Mikotaj bankaði upp á á leikskólum á Suðureyri og Flateyri í dag, eftir því sem fram kemur á vefsíðu Bæjarins besta. Sveinninn talaði reyndar enga íslensku, enda frá Póllandi, en pólsk börn á leikskólunum gegndu lykilhlutverki túlka. Dagur heilags Nikulásar, sem talinn er vera forfaðir jólasveinanna, er haldinn hátíðlegur í dag.

Týndi lyklunum sem allir vildu eiga

Rheinbach-fangelsið í Þýskalandi var fært á hæsta öryggisstig í tvo daga eftir að yfirfangavörðurinn týndi masterlyklinum sem gengur að hverri einustu skrá í byggingunni. Verðirnir voru á sólarhringsvöktum og fangarnir lokaðir í klefum sínum þar til lykillinn fannst, - í sófanum inni í búningsherbergi fangavarðanna.

Ný fréttastöð, France 24, komin í loftið

Fyrsta alþjóðlega fréttastöðin sem sjónvarpar á frönsku og ensku fór í loftið í kvöld undir nafninu France 24. Stöðin keppir um markaðshlutdeild við BBC World og CNN. Stöðin hóf útsendingar á netinu í kvöld og sjónvarpsútsendingar um gervihnött og kapal hefjast á sama tíma annað kvöld.

Farþegavél snúið við vegna vindgangs

Flugvél American Airlines var lent í skyndi í flugvellinum í Nashville á miðri leið í dag vegna lyktar af brennisteini sem fannst í flugvélinni, eins og einhver hefði kveikt á eldspýtu. Við rannsókn játaði kona um borð í vélinni að hafa kveikt á eldspýtum til að reyna að hylma yfir vindgang sem hrjáði hana.

Hornfirðingar vilja göng undir Lónsheiði

Bæjarráð Hornafjarðar hvetur til að 200 milljónir sem ætlaðar eru til lagfæringar á veginum um Hvalnes- og Þvottárskriður verði frekar notaðar til að hefja undirbúning jarðganga undir Lónsheiði. Fréttavefurinn horn.is greinir frá þessu. Í bókun á bæjarráðsfundi frá í gær er sagt ljóst að ekki sé um framtíðarvegstæði að ræða í Skriðunum vegna grjóthruns og skriðufalla.

Talsverður reykur og erfið jólahreingerning framundan

Lítilsháttar eldur kviknaði í þvottavél í Torfufelli í Breiðholti klukkan hálfátta í kvöld en talsverður reykur gaus upp í íbúðinni. Kona sem var í íbúðinni var skoðuð á staðnum en ekki þótti ástæða til að flytja hana á sjúkrahús vegna reykeitrunar, að sögn lögreglu. Greiðlega gekk að slökkva og reykræsta en jólahreingerningin gæti orðið ærin á þessu heimili.

Þjóðarmorðsklerkur laus úr fangelsi

Rúöndskum presti á níræðisaldri var sleppt úr fangelsi eftir 10 ára fangavist fyrir þátt sinn í þjóðarmorði á Tútsum árið 1994. Elizaphan Ntakirutimana er fyrsti fanginn sem leystur er úr haldi, eftir að hafa setið af sér dóm Alþjóðlega glæpamannadómstólsins fyrir Rúanda.

10 hermenn látnir í Írak í dag

10 bandarískir hermenn hafa látist í Írak í dag í fjórum aðskildum árásum, að sögn bandaríska hersins. Talsmaður hersins, Christopher Garver, sagði nokkra hermannanna hafa látist í bílsprengjum en aðra í átökum við uppreisnarmenn.

2.000 tonna grettistak hrunið úr Klifinu

2.000 tonna bergblokk virðist vera stærsta bjargið sem hrunið í nýlegu berghruni í Klifinu í Heimaey. Forstöðumaður Náttúrustofu Suðurlands áætlar að von sé á meira hruni þarna á næstu dögum því bergstálið sé mjög sprungið. Stórfínar myndir eru inni á vef Náttúrustofu Suðurlands.

Mótmæltu meintu ofbeldi lögreglu í Reykjavík

Hátt á annan tug manna tók sér stöðu fyrir utan lögreglustöðina við Hverfisgötu með logandi kerti í kvöld og mótmæltu meintu ofbeldi lögreglumanna gegn fólki í varðhaldi. Tilefnið var að ungur maður lést um helgina eftir að hafa fengið hjartastopp í lögreglubíl viku fyrr. Því máli hefur verið vísað til ríkissaksóknara.

Nektardans er list

Norskur áfrýjunardómstóll hefur komist að þeirri niðurstöðu að nektardans sé listgrein og því eigi nektardansstaðir að vera undanþegnir virðisaukaskatti.

Andi liðinna jóla í Árbæjarsafnskirkju

Börn og fullorðnir geta drukkið í sig anda liðinna jóla í Árbæjarkirkju á sunnudaginn þar sem Kristinn Ágúst Friðfinnsson þjónar í aðventuguðsþjónustu. Drengjakór Þorgeirsbræðra mun syngja jólalög undir stjórn Signýjar Sæmundsdóttur en kirkjugestir fá einnig tækifæri til að taka undir í söng. Guðsþjónustan hefst klukkan 14:00 á sunnudag.

Farsímanotkun talin skaðlaus

Danskir vísindamenn hafa komist að þeirri niðurstöðu að ekkert bendi til þess að notkun farsíma geti valdið krabbameini þótt símarnir sendi frá sér öflugar rafsegulbylgjur.

Garðarshólmi rís á Húsavík til heiðurs landnámsmanni

Konungur Svíþjóðar og forseti Íslands verða verndarar verkefnis um Garðarshólma, alþjóðlegt fræðasetur sem komið verður á fót á Húsavík. Setrið mun rísa á bökkum Húsavíkurhafnar og hljóðar kostnaðaráætlun upp á 150 milljónir króna.

Engar viðræður við Íran

Fyrstu viðbrögð Hvíta hússins við skýrslu Íraksnefndar sem skilaði niðurstöðum sínum í dag eru á þá leið að útiloka viðræður við Írana nema þeir hafi fyrst hætt við kjarnorkuáætlun sína. Nefndin mælti með nánari samvinnu við Íran og Sýrland, grannríki Íraks, til lausnar borgarastríðinu í Írak.

Úrbætur í 79 liðum

Ráðgjafarnefnd Bandaríkjaforseta segir að ástandið í Írak sé grafalvarlegt og fari versnandi. Í skýrslu nefndarinnar segir að stefna forsetans sé ekki að skila árangri og lagt er til að umtalsverður hluti herliðsins í landinu verði kallaður heim á næstu misserum.

Ljósastýrð gatnamót nýtt eins lengi og kostur er

Samgönguráðherra telur eðlilegt að nýleg fjárfesting í ljósastýrðum gatnamótum Miklubrautar og Kringlumýrarbrautar verði nýtt eins lengi og kostur er, en segir að vinna sé hafin við undirbúning mislægra gatnamóta.

Fjárlög ársins 2007 samþykkt frá Alþingi

Fjárlög ríkisins fyrir næsta ár voru samþykkt frá Alþingi í dag með níu milljarða króna tekjuafgangi. Formaður fjárlaganefndar lýsti þeim sem velferðarfjárlögum en formaður Samfylkingarinnar sem kosningafjárlögum.

Kárahnjúkastífla síar aurinn úr vatninu og lekur nær ekkert

Landsvirkjunarmenn segja að Kárahnjúkastífla leki svo lítið að það teljist nánast á heimsmælikvarða. Stíflan hafi til þessa reynst betur en menn þorðu að vona. Svo þétt er stíflan að hún síar aurugasta vatn landsins nógu vel til að drekka má þá fáu lítra sem sleppa í gegn.

30 sjúklingar í einangrun vegna fjölónæmra bakteríusýkinga

Þrjátíu sjúklingar á Landsspítalanum í Fossvogi hafa verið settir í einangrun eftir að fjölónæm baktería greindist í sjúklingi. Bakterían er stórhættuleg og sýklalyf bíta illa eða ekki á henni.

Hisbollah hvetur til nýrra fjöldamótmæla

Forsprakkar mótmælaaðgerða Hisbollah og stuðningsmanna þeirra í miðborg Beirút í Líbanon hvöttu í dag til nýrra fjöldamótmæla á sunnudaginn næstkomandi. Þúsundir mótmælenda standa og sitja í sjötta daginn í röð fyrir utan stjórnarráðsskrifstofurnar í Beirút og krefjast afsagnar Siniora forsætisráðherra.

Pólonleifar í sendiráðinu

Breska utanríkisráðuneytið tilkynnti í dag að breskir rannsóknrarlögreglumenn hefðu fundið leifar geislavirka efnisins pólons 210 í breska sendiráðinu í Moskvu. Leyniþjónustan tilkynnti í kvöld að málið sé nú rannsakað sem morðmál.

HB Grandi segir upp 16 manna áhöfn á Vopnafirði

HB Grandi hefur sagt upp 16 manna áhöfn á ísfisktogaranum Brettingi sem gerður er út frá Vopnafirði. Skipið verður gert út fram í byrjun mars, meðan skipverjar vinna uppsagnarfrest sinn. Síðan verður skipinu lagt og fækkar þar með um eitt í flota fyrirtækisins því ekki er fyrirhugað að annað skip komi í staðinn.

Fálkaungi fékk sér dúfu á Lækjartorgi

Ungur fálki sat að snæðingi á Lækjartorgi þegar fjölmiðlamenn streymdu út úr Héraðsdómi Reykjavíkur í dag eftir dómsuppkvaðningu í fyrsta málinu tengdu verðsamráði olíufélaganna. Hann hafði náð sér í dúfu á torginu og sat sem fastast og reif hana í sig þrátt fyrir mikla athygli vegfarenda og ágang fréttamanna og blaðaljósmyndara.

Frumvarpi breytt til að draga úr skerðingu bóta

Árni Mathiesen, fjármálaráðherra, og Siv Friðleifsdóttir, heilbrigðis- og tryggingamálaráðherra kynntu í dag aðgerðir ríkisstjórnarinnar til að draga úr áhrifum tekna lífeyrisþega á bætur. Gert er ráð fyrir að frumvarp um almannatryggingar og málefni aldraðra verði breytt í þremur atriðum vegna þessa.

Dæmdur fyrir að hindra lögreglu að störfum

Karlmaður hefur verið dæmdur í tveggja mánaða skilorðsbundið fangelsi í Héraðsdómi Suðurlands fyrir að brot gegn valdstjórninni með því að hafa hindrað lögreglu að störfum.

Kostnaðurinn gæti orðið meira en þúsund milljarðar Bandaríkjadala

Lee Hamilton, annar formanna rannsóknarnefndar um Írak, sagðist í dag búast við því að kostnaðurinn við Íraksstríðið gæti vel flogið upp fyrir þúsund milljarða Bandaríkjadala, sem er jafnvirði um 69.000.000.000.000 íslenskra króna. Hinn formaðurinn, John Baker segir stefnubreytingar þörf.

Jafnræðisákvæði vantar í frumvarp um heilbrigðisþjónustu

Talsmaður neytenda telur þörf á jafnræðisákvæði í lögum um heilbrigðisþjónustu en frumvarp þar að lútandi er nú fyrir Alþingi.

Seselj má ekki svelta í hel

Serbneski öfgaþjóðernissinninn Vojislav Seselj, sem réttað hefur verið yfir við Stríðsglæpadómstól Sameinuðu þjóðanna í Haag, vill ekki þiggja neina læknisaðstoð og er staðráðinn í að svelta til dauða. Stríðsglæpadómstóllinn í Haag hefur hins vegar krafist þess af hollenskum yfirvöldum að þau komi í veg fyrir þá ætlun sakborningsins.

140 milljónir þarf til að framfylgja aðgerðaáætlun gegn ofbeldi

140 milljónir þarf til að framfylgja aðgerðaáætlun stjórnvalda vegna ofbeldis á heimilum og kynferðisofbeldis á árunum 2007-2011. Þetta kom fram á kynningarfundi Magnúsar Stefánssonar félagsmálaráðherra á áætluninni í Þjóðmenningarhúsinu í dag.

Ker sýknað af skaðabótakröfu tengdri samráði

Héraðsdómur Reykjavíkur sýknaði í dag Ker af kröfu Sigurðar Hreinssonar frá Húsavík um bætur vegna þess skaða sem hann taldi sig hafa orðið fyrir vegna samráðs stóru olíufélaganna. Þetta er fyrsti dómur sem fellur í máli tengdu samráði olíufélaganna.

Starfsfólk S.þ. flutt frá höfuðborg Darfurs

Sameinuðu þjóðirnar hafa dregið allt starfsfólk sitt sem ekki er lífsnauðsynlegt velferð innfæddra frá Al Fasher, höfuðborg Norður-Darfurs. Sameinuðu þjóðirnar segja þetta tímabundinn brottflutning þar til ástandið í héraðinu róast.

Lögregla kölluð í heimahús vegna deilna um tölvunotkun

Lögreglan í Reykjavík var kölluð út nokkrum sinnum í gær vegna heimiliserja. Ágreiningurinn var af ýmsum toga en í einu tilfelli var rifist um tölvunotkun unglingsins á heimilinu. Þar hafði ástandið farið úr böndunum en lögregla segir ekki um einsdæmi að ræða.

Félagi eldri borgara í Reykjavík ekki heimilt að fara í framboð

Félag eldri borgara í Reykjavík fer ekki í þingframboð í vor þar sem það er ekki heimilt samkvæmt lögum félagins. Þetta kemur fram í tilkynningu frá félaginu.

Tvennt líflátið í Sádi-Arabíu

Í dag tóku stjórnvöld í Sádi-Arabíu pakistanskan karl og konu af lífi vegna fíkniefnasmygls og hafa þá alls 31 verið tekin af lífi í landinu það sem af er ári. Parið var tekið af lífi í borginni Mecca en öllum dauðadómum er framfylgt opinberlega. Ströng sharíalög, eða íslömsk lög, gilda í konungsdæminu.

Vitnaleiðslur geti tekið hátt í mánuð í Baugsmáli

Búast má við að vitnaleiðslur í tenglsum við þá 18 ákæruliði Baugsmálsins sem eftir eru fyrir héraðsdómi taki á bilinu 20-28 daga en þær hefjast 12. febrúar. Þetta kom fram við fyrirtöku málsins í Héraðsdómi Reykjavíkur eftir hádegi í dag.

Á þriðja hundrað barna bíður eftir greiningu

71 barn á leikskólaaldri og 124 börn á grunnskólaaldri bíða eftir greiningu hjá Greiningar- og ráðgjafastöð ríkisins samkvæmt svari sem Magnús Stefánsson gaf á Alþingi í dag við fyrirspurn Ástu Ragnheiðar Jóhannesdóttur, þingmanns Samfylkingarinnar.

Fjölskylduhjálp fær tvær milljónir

Fjölskylduhjálp Íslands fékk klukkan tvö í dag afhenta ávísun upp á tvær milljónir króna en það er sölugróði af geisladisk sem seldur var til styrktar henni.