Aðgangur að farþegaupplýsingum

Frá og með 28. júlí næstkomandi mun bandaríska Tolla- og Landamærastofnunin fá aðgang að farþegaupplýsingum úr bókunarkerfi Icelandair um farþega á leið til Bandaríkjanna. Samkvæmt bandarískri löggjöf eru öll flugfélög sem fljúga til Bandaríkjanna skyldug til að veita þessar upplýsingar.

Maðurinn alvarlega slasaður

Maðurinn, sem ekið var á í Ártúnsbrekkunni í nótt, er alvarlega slasaður og í öndunarvél á gjörgæsludeild Landspítala í Fossvogi. Komið var að honum meðvitundarlitlum á þriðja tímanum í nótt, en ökumaður bifreiðarinnar sem ók á hann, hafði stungið af. Lögregla fann bifreiðina skömmu síðar og handtók mann, sem er grunaður um að hafa ekið henni.

Stórfelldir gallar á upplýsingum

Stórfelldir gallar voru á upplýsingum bresku leyniþjónustunnar um gereyðingavopaneign Íraka og stjórnvöld tóku upplýsingar alvarlegar en tilefni var til. Þetta kemur fram í nýrri skýrslu Butlers lávarðar sem byrjað var að kynna fyrir hálftíma síðan. Butler hóf að kynna skýrslu sína klukkan hálf tólf í dag, um hvort innrás Breta í Írak hafi verið byggð á vafasömum upplýsingum.

Stolinn bíll finnst á hvolfi

Stolinn bíll fannst á hvolfi á Skálarvegi í Siglufirði í gærmorgun. Ekkert er vitað um ökumanninn. Bíllinn hafði verið skilinn eftir, með lyklunum í, á verkstæði neðar í bænum. Á þeim stað sem bíllinn valt er nýr vegur sem var lagður vegna snjóflóðavarna á Siglufirði. Svo virðist sem bílþjófurinn hafi farið út af nýja veginum og niður á þann gamla og oltið þar.

Tala látinna hækkar enn

Tala látinna vegna flóðanna í Suður Asíu hækkar enn. Þrjú hundruð hafa þegar látist og er búist við að ástandið versni enn frekar á næstu dögum. Brynja Þorgeirsdóttir. Þetta eru mestu rigningar og flóð á svæðinu í áratug.

Látlausir skjálftar

Látlausir jarðskjálftar hafa verið í Fagradalsfjalli, milli Grindavíkur og Krýsuvíkur, síðan á sunnudag. Veðurstofan segir að hrinan geti annað hvort fjarað út eða færst í aukana og skjálftarnir orðið stærri.

Hafði þrjá tíma til að fela byrði

Maðurinn sem grunaður er um að vera valdur að hvarfi indónesískrar barnsmóður sinnar, er talinn hafa haft þrjár klukkustundir til þess að koma byrðinni fyrir, eftir að til hans sást bera eitthvað þungt út úr íbúð sinni, á sunnudagsmorgun.

Breytir engu um afstöðu

Flestir hagsmunaaðilar sem koma fyrir allsherjarnefnd Alþingis í dag telja nýtt fjölmiðlafrumvarp engu breyta um afstöðu þeirra til laganna. Blaðamannafélag Íslands gagnrýnir yfirlýst áform ríkisstjórnarinnar um að hægt verði að kjósa um ný fjölmiðlalög í þingkosningum eftir 3 ár.

Fjölmargir lýstu andstöðu sinni

Enginn úr ráðherrasveit eða landstjórn Framsóknarflokksins kom á fjölmennnan fund Framsóknarfélagsins í Reykjavíkurkjördæmi suður, þar sem fjölmiðlafrumvarpið nýja var til umræðu. Fjölmargir félagsmenn lýstu yfir andstöðu við aðgerðir stjórnarflokkanna í málinu og sögðu forystusveit Framsóknarflokksins ekki samstíga almennum flokksmönnum.

Ungir Framsóknar menn klofnir

Ungir framsóknarmenn eru klofnir í afstöðu sinni til fjölmiðlafrumvarpsins. Félag ungra framsóknarmanna í Reykjavík suður styður forystu Framsóknarflokksins í málinu, en Samband ungra framsóknarmanna, á landsvísu, gerir það ekki.

Börnum fækkar á Nesinu

Sterkar vísbendingar eru um að börnum í leik- og grunnskólum Seltjarnarnesbæjar fari verulega fækkandi á næstu árum. Miðað við tölur frá Hagstofu Íslands sést að undanfarin 15 ár hefur fæðingum á Nesinu fækkað umtalsvert.

Vestnorræn handverkssýning

Vestnorrænu löndin, Ísland, Færeyjar og Grænland, standa í annað sinn fyrir fjölþjóðlegri handverkssýningu í Laugardalshöll. Sýningin verður haldin dagana 15. - 19. september. Handverkssýningin "Vestnorden Arts and Crafts" er liður í vestnorrænu samstarfi og var fyrst haldin árið 2002.

Helmingur vinnur hjá hinu opinbera

Nær helmingur vinnuafls á Grænlandi er í starfi hjá hinu opinbera. Þetta kemur fram í Hagtölum Grænlands sem grænlenska útvarpið (KNR) greindi frá. Samkvæmt tölunum, sem eru frá árinu 2002, starfa um 47,5 prósent Grænlendinga við opinbera stjórnsýslu og þjónustu.

Einokun á áfengi ekki réttmæt

Framkvæmdastjórn ESB hefur komist að þeirri niðurstöðu að einokun ríkisins í Svíþjóð á áfengissölu stríði gegn viðskiptafrelsi innan ESB. Framkvæmdastjórn ESB telur að ekki megi  koma í veg fyrir að Svíar geti keypt vörur frá öðru ESB ríki.

Ekki lengur velkominn í Palestínu

Æðsti sendifulltrúi Sameinuðu þjóðanna, í Miðausturlöndum, er ekki lengur velkominn á sjálfstjórnarsvæði Palestínumanna, eftir að hann gagnrýndi Yasser Arafat harkalega. Terje Roed-Larsen, sagði á mánaðarlegum upplýsingafundi sínum, í Öryggisráði Sameinuðu þjóðanna, að Yasser Arafat hefði dregið lappirnar í tilraunum Egypta til þess að endurbæta öryggissveitir Palestínumanna, til samræmis við kröfur alþjóðasamfélagsins.

Frakkar kjósa um nýja stjórnarskrá

Frakkar munu kjósa um nýja stjórnarskrá Evrópusambandsins að því er Jacques Chirac, forseti landsins, lýsti yfir í gær.

Ellefu létust í Bagdad

Ellefu létust og tugir særðust í öflugri sprengingu í miðborg Bagdad, höfuðborgar Íraks, í gær.

Varar við notkun netvafra

Bandaríska heimavarnaráðuneytið mælir ekki með því að fólk noti netvafrann Internet Explorer, frá Microsoft. Ástæðan er gloppur í varnarkerfi Microsoft, sem gerir tölvuþrjótum kleift að yfirtaka algerlega tölvuna.

Skipar nefnd um Evrópumál

Forsætisráðherra hefur skipað nefnd um Evrópumál. Helstu hlutverk hennar eru meðal annars að kanna framkvæmd EES-samningsins, hvort og þá hverskonar undanþágur séu veittar í aðildarsamningum að Evrópusambandinu, hvað aðild myndi kosta ríkisstjóð, til lengri og skemmri tíma, og hverjir séu kostir og gallar evrunnar fyrir Ísland.

Harmar ásakanir

Barnarverndarstofa harmar þær ásakanir sem rekstraraðilar meðferðarheimilisins að Torfastöðum hafa sett fram í fjölmiðlum undanfarið um ómálefnalega og óeðlilega meðferð mála er snerta heimilið. Þetta kemur fram í pistli á heimasíðu Barnaverndarstofu.

Hýrum ekki bannað að giftast

Öldungadeild Bandaríkjaþings hafnaði í dag tillögu um að breyta stjórnarskrá landsins þannig að samkynhneigðu fólki verði bannað að ganga í hjónaband. George Bush, forseti, studdi stjórnarskrárbreytinguna, en hún er nú líklega úr sögunni, á þessu kjörtímabili, að minnsta kosti.

Vilja banna hýr hjónabönd

Repúblikanar lofa því að ekki einu sinni bakslag í þinginu geti komið í veg fyrir að bann við giftingum samkynhneigðra verði leitt í lög.

Norðmenn telja sig í fullum rétti

Réttur Norðmanna til að setja reglur um fiskveiðar kringum Svalbarða er skýr og í fullu samræmi við alþjóðleg lög og reglur. Þetta er svar norska utanríkisráðuneytisins við fyrirspurnum Fréttablaðsins vegna deilu þeirrar er uppi er milli Noregs og Íslands um rétt til fiskveiða innan lögsögu Svalbarða.

Fjármögnuð með skattlagningu

Samtök iðnaðarins mótmæla harðlega hugmyndum um nýja skattlagningu til að fjármagna rekstur Lýðheilsustöðvar á vefsetri sínu, www.si.is. Á vefsíðu samtakanna kemur fram að þau hafi lýst yfir vilja til þess að eiga gott samstarf við Lýðheilsustöð um að stuðla að forvörnum og bættu heilsufari landsmanna.

DNA ákvarðar stefnu rannsóknar

Tæknideild lögreglu var enn að störfum í gær í íbúð mannsins sem er í gæsluvarðhaldi vegna hvarfs 33 ára indónesískrar konu í Reykjavík. Niðurstaðna erfðaefnisgreiningar blóðs sem fannst í íbúð og bíl mannsins er ekki að vænta fyrr en í vikulokin eða í byrjun næstu viku.

Jarðskjálftahrina enn í gangi

Jarðskjálftahrinan á Reykjanesskaga, sem hófst síðastliðinn sunnudagseftirmiðdag er enn í gangi. Upptök skjálftanna mælast norðan við Ísólfsskála á svæði sem nær frá Festarfjalli í suðri og norður í Fagradalsfjall og er um 8-10 km austnorðaustan af Grindavík.

Réðist á konu á heimili hennar

Maður á fimmtugsaldri var sakfelldur fyrir líkamsárás á konu á svipuðum aldri á heimili hennar sl. sumar og dæmdur í tveggja mánaða fangelsi fyrir Héraðsdómi Reykjavíkur. Dómurinn er skilorðsbundinn í tvö ár.

Raðmorðingi játar aðra glæpi

Franski raðmorðinginn Michel Fourniret segist hafa rænt og nauðgað ungri konu í norður Frakklandi árið 1998 til viðbótar við þær níu konur sem hann viðurkennir að hafa ráðið bana. </font />

Síbrotabræður í haldi lögreglu

Ungir bræður, 15 og 16 ára, voru handteknir í gærmorgun eftir að hafa brotist inn í íbúðarhús í Austurbæ Reykjavíkur. Bræðurnir, sem búsettir eru í Vesturbæ Reykjavíkur, hafa komið við sögu í fjölda innbrota, að sögn lögreglunnar í Reykjavík og verið marghandteknir fyrir.

Fékk yfir sig sperrur úr stæðu

Alefli ehf þarf að greiða manni tæplega 1,3 milljónir króna vegna vinnuslyss sem hann lenti í árið 1999. Maðurinn slasaðist þegar ysta röð úr timburstafla féll á bak hans og herðar þar sem hann vann við að færa sperrur á vinnusvæði Aleflis.

Blair réðst inn í góðri trú

Gögn bresku leyniþjónustunnar sem bentu til þess að Írakar byggju yfir efnavopnum fyrir innrásina í landið voru mjög gölluð og byggðu á óáreiðanlegum heimildum. Tony Blair forsætisráðherra er hins vegar ekki sekur um að hafa viljandi brenglað fyrirliggjandi gögn eða um vítaverða vanrækslu.

Nefnd um Evrópumál skipuð

Forsætisráðherra hefur skipað nefnd um Evrópumál, en hlutverk hennar er meðal annars að kanna framkvæmd EES-samningsins, hvort og þá hvers konar undanþágur séu veittar í aðildarsamningnum að Evrópusambandinu og hvað aðild myndi kosta ríkissjóð til lengri og skemmri tíma litið

Panta konur til að níðast á þeim

Á Norðurlöndum hafa komið upp vandamál þar sem karlar „flytja inn“ konur frá öðrum löndum gagngert til að beita þær ofbeldi. Þannig er þekkt að fjöldi kvenna þurfi að leita sér hjálpar vegna eins og sama ofbeldismannsins. Samkvæmt lögum hér hætta erlendar konur á að vera sendar úr landi fari þær frá ofbeldisfullum mönnum sínum.

Fagna ummælum ráðherra

Páll Skúlason, rektor Háskóla Íslands, og Jarþrúður Ásmundsdóttir, formaður Stúdentaráðs Háskóla Íslands, fagna bæði ummælum Þorgerðar Katrínar Gunnarsdóttur menntamálaráðherra um að ekki beri að innheimta skólagjöld í grunnnámi á háskólastigi.

Ánægður með viðsnúning

Björgvin G. Sigurðsson, þingmaður Samfylkingarinnar og fulltrúi í menntamálanefnd Alþingis, er ánægður með að Þorgerður Katrín Gunnarsdóttir menntamálaráðherra hafi lýst afráttarlausri skoðun á upptöku skólagjalda í Háskóla Íslands en hún varar við upptöku skólagjalda í grunnnámi á háskólastigi.

Myrtu héraðsstjóra Mósúl

Írakskir skæruliðar myrtu í dag héraðsstjóra Mósúl, þar sem hann var á leið sinni til Bagdad. Á sama tíma sprakk öflug bílsprengja í Bagdad, með þeim afleiðingum að ellefu létust og tugir særðust. Talið er að þetta hafi verið sjálfsmorðsárás og er hún sú mannskæðasta síðan Írakar tóku við stjórnartaumunum í landinu í lok júní. Hershöfðingjar tengja árásina við handtöku meira en 500 grunaðra hryðjuverkamanna fyrr í vikunni.

Uppbygging á Reyðarfirði

Trésmiður frá Akureyri gleðst yfir uppbyggingunni á Reyðarfirði vegna álvers. Hann tryggði sér byggingalóðir á svæðinu átta mánuðum áður en skrifað var undir samninga við Alcoa.

Leitað að lífi á Mars

Lofttegundir sem fundist hafa á plánetunni Mars benda til að þar gæti fundist líf. Sérfræðingur frá NASA geimferðarstofnuninni segir að niðurstöður rannsókna sem fari þar fram, eigi ekki eftir að valda fólki vonbrigðum.

Uppsagnir hjá Eimskip

Fækkað var um 40 til 50 stöðugildi hjá Eimskipafélagi Íslands í dag vegna skipulagsbreytinga. Trúnaðarmaður starfsmanna segir að þeim sé brugðið en er feginn að óvissu vegna boðaðra breytinga hafi verið eytt.

Engin skólagjöld í grunnnámi

Menntamálaráðherra telur ekki rétt að taka skólagjöld af nemum í grunnnámi við Háskóla Íslands. Öðru máli gegni hins vegar um gjöld fyrir framhaldsnám. Rektor Háskólans fagnar ummælum ráðherra, en segir að Háskólinn þurfi eftir sem áður meira fé frá hinu opinbera.

Blair sleppur með skrekkinn

Leiðtogi breska íhaldsflokksins segir Blair rúinn trausti og kröfum um afsögn hans er haldið á lofti. Stjórnmálaskýrendur telja þó að Blair sleppi með skrekkinn.Meðan Butler lávarður las niðurstöður sínar fóru fram hávær mótmæli fyrir utan gegn innrásinni í Írak og því sem mótmælendur kölluðu "hvítþvott" Butlers á ríkisstjórninni.

Fer óbreytt úr allsherjarnefnd

Fjölmiðlafrumvarpið verður væntanlega afgreitt óbreytt úr allsherjarnefnd, segir Bjarni Benediktsson, formaður nefndarinnar. Stjórnarandstaðan segir að umfjöllun um málið sé lokið í nefndinni og vill leggja fram álit í kvöld, en meirihluti nefndarinnar hefur boðað Samkeppnisstofnun á fund í fyrramálið.

Framsókn fer fram á viðræður

Forysta Framsóknarflokksins ætlar að fara fram á viðræður við forystu Sjálfstæðisflokksins um að fjölmiðlafrumvarpið verði dregið til baka. Líklegast er að óskað verði eftir að nýtt frumvarp verði lagt fram sem felli fjölmiðlalögin úr gildi, en að öðrum kosti verði þjóðaratkvæðagreiðsla.

Kærir Davíð fyrir stríðsglæpi

Elías Davíðsson tónskáld hefur lagt fram kæru á hendur Davíð Oddssyni og Halldóri Ásgrímssyni fyrir stríðsglæpi.

Útiloka ekki breytingar

Flokksmenn sjálfstæðisflokks í allsherjarnefnd útiloka ekki að breytingar verði gerðar á nýju fjölmiðlafrumvarpi. Þeir hafa óskað eftir áliti Samkeppnisstofnunnar um ný fjölmiðlalög og verður hún eini gestur nefndarinnar í dag.