Tala látinna hækkar enn

Tala látinna vegna flóðanna í Suður Asíu hækkar enn. Þrjú hundruð hafa þegar látist og er búist við að ástandið versni enn frekar á næstu dögum. Brynja Þorgeirsdóttir. Þetta eru mestu rigningar og flóð á svæðinu í áratug. Meira en tíu milljónir eiga um sárt að binda vegna hamfaranna. Nú hafa þrjú hundruð látist, flestir í Nepal og á Indlandi þar sem milljónir hafa yfirgefið heimili sín á meðan rigningarnar ganga yfir, og enn fleiri eru strandaglópar. Fjöldi þyrlna er nú notaður til að bjarga þúsundum manna sem komast hvorki lönd né strönd. Spáð er enn meiri rigningu á næstu dögum og því er búist við að ástandið versni enn frekar.