Eyjaálfa, fyrir utan Nýja-Sjáland, styður Infantino

Knattspyrnusambönd Evrópu, Asíu og Norður- og Mið-Ameríku hafa dregið stuðning sinn við Infantino til baka eftir mislukkaða tilraun hans til að selja hlut í HM, og öðrum mótum á vegum FIFA, til einkafjárfesta.

Infantino nýtur þó enn stuðnings knattspyrnusambanda Afríku og Suður-Ameríku og nú hefur Eyjaálfa bæst í þann hóp.

Aðeins ellefu ríki eiga aðild að knattspyrnusambandi Eyjaálfu en það fjölmennasta og eina sem spilaði á HM í sumar, Nýja-Sjáland, styður ekki Infantino og kallar eftir óháðri úttekt á fyrirhuguðum hugmyndum hans um að selja innviði FIFA.

Knattspyrnusamband Eyjaálfu (OFC) kveðst ánægt með að Infantino hafi fallið frá fyrirætlunum sínum en styður enn við bakið á forsetanum umdeilda.

„Framkvæmdastjórn OFC fagnar ákvörðun FIFA um að draga til baka tillögu FFE (FIFA Forward Enterprise) og skuldbindingu þess um að endurskoða málefnin sem tengjast verkefninu,“ segir í yfirlýsingu OFC.

„OFC er meðvitað um þann árangur sem náðst hefur síðasta áratuginn við að efla fótboltaþróun í Eyjaálfu undir forystu FIFA og hvetur FIFA til að nota endurskoðunina sem tækifæri til að greina og innleiða allar breytingar sem kunna að vera nauðsynlegar.“

Kosið verður til forseta FIFA á ársþingi sambandsins í mars á næsta ári. Enn hefur enginn boðið sig fram gegn Infantino.