Upp­gjörið: KA - Þór 0-0 | Stein­dauður norðanslagur

KA og Þór gerðu markalaust jafntefli í Akureyrarslagnum í 16. umferð Bestu deildar karla. Leikurinn fór fram á nýjum velli KA manna sem er enn í byggingu en var gerður tilbúinn í þennan eina leik áður en framkvæmdir halda áfram fram á næsta sumar.

KA menn byrjuðu leikinn af miklum krafti á meðan Þórsarar áttu í erfiðleikum. Strax á fyrstu mínútu slapp Jakob Héðinn Róbertsson í gegn en tók ranga ákvörðun þegar hann reyndi fyrirgjöf í stað þess að skjóta og sóknin rann út í sandinn.

KA liðið fór mikið upp völlinn hægra megin þar sem Adam Ægir Pálsson spilaði og náði hann ófáum fyrirgjöfum sem vantaði að reka endahnútinn á.

Besta færi leiksins kom á 37. mínútu en Hallgrímur Mar Steingrímsson átti þá fyrirgjöf sem rataði á Jakob Héðinn en Aron Birkir Stefánsson í marki Þórs varði vel.

Þórsarar náðu aðeins betri tökum eftir því sem leið á hálfleikinn en án þess þó að skapa sér nein dauðafæri og var staðan markalaus í hálfleik.

Þórsarar mættu beittari til leiks í síðari hálfleik og úr varð mikið jafnari seinni hálfleikur.

KA menn héldu boltanum áfram meira en Þórsarar náðu góðum köflum þar sem boltinn gekk vel manna á milli og fínar sóknir urðu til.

Það var í raun ekkert alvöru færi sem varð til fyrr en á þriðju mínútu uppbótartíma en þá komst Valdimar Logi Sævarsson inn á teig Þórsara og gerði frábærlega í að plata nokkra varnarmenn áður en hann læt vaða á markið en varnarmaður komst fyrir skotið á síðustu stundu og eyðilagði drauma augnablikið sem Valdimar var eflaust farinn að sjá fyrir sér í hyllingum.

Leiknum lauk því með markalausu jafntefli og fara allir hálf svekktir heim.

Atvik leiksins

Þegar Valdimar Logi Sævarsson var næstum búinn að skora sigurmarkið í lokið. Uppalinn KA strákur sem hefði notið þess augnabliks svakalega að skora sigurmarkið í uppbótartíma gegn erkifjendunum en allt kom fyrir ekki.

Stjörnur og skúrkar

Ívar Arnbro Þórhallsson stóð pliktina vel í marki KA og er góður í löppunum eins og nútíma markmanni sæmir.

Hans Viktor Guðmundsonn var öflugur í vörinni og Adam Ægir Pálsson átti fínan fyrri hálfleik en dalaði mikið í þeim seinni.

Hjá Þórsurum átti Aron Birkir Stefánsson enn eina góðu frammistöðuna og varði frábærlega dauðafæri í eitt skipti.

Gyrðir Hrafn Guðbrandsson er frábær leikmaður fyrir Þór sem gefur ekki tommu eftir og hefur gott auga fyrir spili og átti góðan leik í dag.

Atli Sigurjónsson sýndi snilli sína fljótlega eftir að hafa komið inn á sem varamaður og verður frábært fyrir Þórsara þegar hann verður kominn í toppstand aftur eftir meiðsli.

Dómarinn

Hún var skrítin línan sem dómari leiksins, Þórður Þorsteinn Þórðarson, fylgdi í dag. Stundum var flautað mjög mikið og virtist þá litlu skipta hversu smávægileg snertingin var en svo á öðrum köflum leiksins leyfði hann ýmislegt sem mátti ekki augnabliki áður.

Stemning og umgjörð

Algjörlega frábær stemning sem myndaðist á nýja vellinum hjá KA mönnum sem gerðu vel í að hafa völlinn tilbúinn sérstaklega í þennan leik.

Það á enginn leikur roð í KA – Þór þegar kemur að stemningu og skemmtanagildi stuðningsmanna.