Níu ára drengur læstur í bíl föður síns í Frakk­landi frá árinu 2024

Nágranni tilkynnti lögreglu að hann hefði heyrt hljóð frá barni sem komu úr sendibíl í þorpinu Hagenbach, nálægt landamærum Sviss og Þýskalands, á mánudag. AP-fréttaveitan greinir frá þessu og hefur úr yfirlýsingu saksóknara sem birt var í dag.

Lögregla hafi brotið sér leið inn í sendibílinn og þar fundið barnið „liggjandi í fósturstellingu, nakið, undir teppi liggjandi ofan á ruslahaug og nálægt saur,“ segir saksóknari. Drengurinn hafi greinilega verið vannærður og ekki getað gengið lengur eftir að hafa verið svo lengi í sitjandi stöðu. Þá sagðist hann ekki hafa farið í sturtu frá árinu 2024.

Ætlað að vernda drenginn

Faðir drengsins sagði lögreglu að hann hefði sett barnið í bílinn í nóvember 2024 „til að vernda það“ þar sem sambýliskona hans vildi senda þá sjö ára gamlan drenginn á geðsjúkrahús, að sögn saksóknara.

Sá sagði að engar sjúkraskrár bentu til þess að drengurinn hefði átt við geðræn vandamál að stríða áður en hann hvarf og að hann hefði fengið góðar einkunnir í skóla.

Drengurinn tjáði lögreglu að hann hefði átt í „miklum erfiðleikum“ með sambýliskonu föður síns og talið að faðir hans „hefði ekki haft neitt annað val“ en að loka hann inni, að sögn saksóknara.

Faðirinn var ákærður meðal annars fyrir mannrán og úrskurðaður í gæsluvarðhald. Sambýliskona hans sagðist ekki hafa vitað að drengurinn væri í sendibílnum. Hún var ákærð, meðal annars fyrir að aðstoða ekki ólögráða einstakling í hættu, en var látin laus.

Tólf ára gömul systir drengsins og tíu ára gömul dóttir sambýliskonu föður hans eru komnar í umsjá barnaverndaryfirvalda.

Embætti saksóknara rannsakar nú hvort aðrir hafi vitað af innilokun drengsins, að sögn AP. Vinir og fjölskylda sögðu lögreglu að þau hafi talið að drengurinn væri á geðdeild. Þá var kennurum hans sagt að hann hefði skipt um skóla, að sögn saksóknaraembættisins.