Vinicius hetjan eftir rautt spjald og líf­legan granna­slag

Real Madrid fagnaði sigri í bráðfjörugum grannaslag gegn grönnum sínum í Atlético Madrid, í höfuðborgarslagnum í spænsku 1. deildinni í fótbolta í kvöld, þrátt fyrir að hafa lent undir og misst mann af velli með rautt spjald.

Ademola Lookman skoraði eina mark fyrri hálfleiks, fyrir Atlético, og var staðan 1-0 fram á 52. mínútu þegar Vinicius jafnaði metin úr vítaspyrnu. Federico Valverde kom Real svo yfir þremur mínútum síðar en Nahuel Molina jafnaði metin fyrir gestina. Það var svo Vinicius sem skoraði sigurmarkið á 72. mínútu, með góðu skoti í fjærhornið.

Real missti þó Valverde af velli með rautt spjald þegar enn var korter eftir, fyrir brot á Alex Baena, en Real-menn voru vægast sagt ósáttir við dóminn. Atlético náði hins vegar ekki að nýta liðsmuninn og Real fagnaði sigri.

Þar með eu Barcelona og Real alein í titilbaráttunni nú þegar níu umferðir eru eftir en Börsungar, sem unnu Rayo Vallecano naumlega 1-0 í dag, eru enn með fjögurra stiga forskot á toppnum. Atlético er í 4. sæti með 57 stig, tólf stigum á eftir Real en aðeins stigi á eftir Villarreal.