Gummi Ben fékk gull­merki Þórs af­hent á Spáni

Þór Akureyri hélt upp á 110 ára afmæli sitt í gær en Guðmundur var hins vegar staddur í golfferð á Spáni.

Linda Guðmundsdóttir, íþróttafulltrúi Þórs, var líka stödd á Spáni og afhenti Guðmundi gullmerkið. Hann hafði áður fengið silfurmerki félagsins. Hún telur að þetta sé mögulega fyrsta gullmerki Þórs sem er afhent utan Akureyrar.

Guðmundur hefur einnig verið sæmdur gullmerki KR.

Íþróttafélagið Þór veitir gullmerki fyrir vel unnin störf í þágu félagsins. Störf fyrir félagið skulu hafa varað í a.m.k. 15 ár og handhafi merkis ekki yngri en 40 ára. Gullmerki er gullhúðuð nál með merki félagsins á enda.

Guðmundur fór í gengum yngri flokka Þórs og spilaði sína fyrstu meistaraflokksleiki með félaginu sumarið 1990. Hann fór snemma út í atvinnumennsku en kom aftur heim i Þór og spilaði með liðinu sumarið 1994. Hann skipti yfir í KR eftir að Þórsliðið féll um haustið og er þekktastur fyrir tíma sinn þar.