Sat fyrir for­seta Suður-Afríku með á­sökunum um þjóðar­morð á hvítum

Fundinum, sem var sýndur í beinni útsendingu, hefur þegar verið líkt við umsátur og umdeildan fund Trumps og Vólódímírs Selenskí, forseta Úkraínu.

Hér að neðan má sjá þegar Trump lét slökkva ljósin og spila myndbandið.

Trump veitti nýlega tæplega sextíu hvítum bændum frá Suður-Afríku hæli í Bandaríkjunum. Hann hefur nokkrum sinnum sagt að verið sé að fremja þjóðarmorð á þeim.

Yfirvöld í Suður-Afríku hafa viðurkennt að hvítir bændur hafi verið myrtir í landinu en ríkisstjórn Trumps skilji ekki af hverju, eins og fram kemur hjá AP fréttaveitunni.

Morðin eru sögð vera vegna mikillar glæpaöldu sem gengur yfir landið og hafa margir þeldökkir bændur einnig verið myrtir. Morðtíðni er mjög há í Suður-Afríku en samkvæmt frétt Reuters eru yfirgnæfandi meirihlutri myrtra þeldökkir.

Einnig mátti sjá á myndbandinu krossa frá Witkruis minnisvarðanum í Suður-Afríku. Trump hélt því fram að krossarnir táknuðu hvíta bændur sem hafa verið myrtir. Minnisvarðinn er þó einnig til að heiðra þeldökka bændur sem hafa verið myrtir af glæpamönnum.

Landbúnaðarráðherra Suður-Afríku, John Steenhuisen, sem er hvítur og tilheyrir öðrum stjórnmálaflokki en Ramaphosa, sagði í samtali við AP að ekki væri verið að leggja hald á land bænda og að ásakanir um þjóðarmorð á hvítum bændum væru rangar.

Á myndbandinu sem Trump sýndi í Hvíta húsinu, og hefur verið birt á samfélagsmiðlum Hvíta hússins, má meðal annars sjá meðlimi stjórnmálaflokks í Suður-Afríku hvetja til ódæða gegn hvítu fólki.

Meðlimir í sendinefndinni frá Suður-Afríku, eins og Steenhuisen, ítrekuðu að þessi stjórnmálaflokkur væri ekki í ríkisstjórn og ekki embættismenn, eins og Trump hélt fram. Margir flokkar væru virkir í landinu og fordæmdi Ramaphosa ummælin í myndbandinu.

Ramaphosa sagði Suður-Afríku lýðræðisríki og að þar væri málfrelsi. Hann sagði einnig að glæpir væru tíðir í Suður-Afríku og það væri ekki eingöngu verið að myrða hvítt fólk.

Reiddist blaðamanni vegna flugvélar

Tiltölulega snemma eftir að Trump sýndi myndbandið var hann spurður út í það að talsmaður varnarmálaráðuneytis Bandaríkjanna staðfesti í dag að búið væri að ákveða að taka við 747 einkaþotu sem konungsfjölskylda Katar vill gefa Bandaríkjunum, reiddist hann mjög og kallaði blaðamanninn sem spurði „asna“ og „fávita“.

Trump segist ætla að nota þotuna, sem lýst hefur verið sem höll í háloftunum, sem forsetaflugvél sína.

Flugvélagjöfin er mjög svo umdeild en einkaþotan er metin á 53 milljarða króna og þegar kjörtímabili Trumps lýkur stendur til að gefa hana til forsetabókasafns hans og gæti hann haft afnot af henni eftir það.

Þá hefur einnig vakið áhyggjur og meðal annars hjá þingmönnum Repúblikanaflokksins, hve dýrt það verði að breyta henni og tryggja öryggi hennar.

Sjá einnig: Breyttur tónn og reiður yfir gagn­rýni vegna flugvélagjafarinnar

Seinna eftir að Trump var spurður út í flugvélina var hann að tala um stöðuna í Suður-Afríku og byrjaði þá aftur að tala um flugvélina og „fávitann“ frá NBC.

Ramaphosa greip þá inn í og reyndi að snúa umræðunni aftur að Suður-Afríku og reyndi að leiðrétta Trump.

„Því miður á ég ekki flugvél til að gefa þér,“ sagði Ramaphosa.

„Ég vildi að svo væri. Ég myndi þiggja hana,“ svaraði Trump.

Barist um landtöku í dómsal

Eins og fram kemur í frétt BBC hafa yfirlýsingar um þjóðarmorð gegn hvítu fólki í Suður-Afríku lengi verið á kreiki á hægri væng stjórnmála á Vesturlöndum. Vissulega hafi hvítir bændur verið myrtir en upplýsingaóreiðan sé mikil í tengslum við þessi mál.

Dómari í Suður-Afríku sagði í febrúar að þjóðarmorð væri ekki að eiga sér stað. Þá bendir glæpatölfræði ekki til þess heldur.

Frá október og út desember í fyrra voru 6.953 morð framin í Suður-Afríku. Þar af voru tólf myrtir á sveitabæjum. Einn þeirra var bóndi en hinir bjuggu þar eða unnu og segir í grein BBC að flestir þeirra hafi líklega verið þeldökkir.

Þegar kemur að landtöku skrifaði Ramaphosa undir lög í janúar sem ætlað er að draga úr ójafnvægi í landinu þegar kemur að landareignum. Þar hafa hvítir íbúar mikið forskot eftir að hafa stýrt landinu um langt skeið.

Lýðræðisbandalagið, sem er annar flokkur í ríkisstjórn Ramaphosa, hefur fordæmt lögin á þeim grunni að þau brjóti gegn eignarétti fólks og standa yfir dómsmál vegna þeirra.

Yfirvöld í Suður-Afríku hafa einnig gripið til aðgerða sem ætlað er að auka vægi þeldökkra í atvinnulífinu. Hvít fólk situr í 62,1 prósenti stjórnendastaða í atvinnulífi Suður-Afríku en eru þó eingöngu 7,7 prósent af vinnuafli landsins.

Umdeildur en löglegur söngur

Þegar kemur að söng Julius Malema, sem sjá mátti á myndbandi Trumps, um að skjóta eigi hvítt fólk í Suður-Afríku, er það söngur sem naut fyrst vinsælda í baráttunni gegn aðskilnaðarstefnu Suður-Afríku á árum áður.

Malema var vikið úr ANC, flokki Ramaphosa, fyrir þó nokkrum árum.

Reynt hefur verið að gera sönginn ólöglegan en hæstiréttur landsins hefur komist að þeirri niðurstöðu að málfrelsi heimili Malema að syngja hann á kosningafundum.