„Hluti af mér sem per­sónu að hafa smá skap“

Arnar var spurður að því á blaðamannafundinum í dag, þar sem hann var kynntur til leiks sem nýr landsliðsþjálfari til næstu þriggja ára hið minnsta, hvort að hann þyrfti að vanda sig betur við að anda ofan í kviðinn á hliðarlínunni í nýja starfinu:

„Ég þarf að gera það. Landsliðsþjálfari þarf að hafa sterkt „presence“ á hliðarlínunni. Ég tel mig hafa það. Einn af mínum kostum sem þjálfari. Missti ég mig aðeins of mikið? Já, klárlega. En mér til varnar gerði ég mig aldrei að fífli nema kannski 1-2 sinnum í viðtölum eftir leiki. Ég var fljótur niður. Ég tel að VAR-umhverfið hjálpi mér klárlega, eins og sést í Evrópuleikjum Víkings þar sem ég fékk varla tiltal,“ sagði Arnar.

„Ég hef því ekki áhyggjur af því í landsliðsumhverfinu – ætla samt ekki að lofa neinu – að skapofsi minn muni verða til þess að ég geri mig að fífli fyrir hönd þjóðarinnar. Þetta er hluti af mér sem persónu, að hafa smá skap, en þetta er klárlega þáttur sem mig langar að bæta. Ég get þó ekki lofað því,“ sagði Arnar.

Arnar fór yfir víðan völl á blaðamannafundinum í dag. Hann lofaði meðal annars að halda í þá hefð sem skapaðist á gullaldarskeiðinu undir stjórn Heimis Hallgrímssonar og Lars Lagerbäck, um að mæta á Ölver fyrir heimaleiki Íslands, tilkynna þar byrjunarliðið og ræða við stuðningsmenn.

Eins og fyrr segir gildir samningur hans við KSÍ til ársins 2028 en þá fer EM fram í Bretlandi og Írlandi, og ljóst að Arnar stefnir þangað. Hann stefnir raunar fyrst á HM 2026 í Ameríku og segir möguleika Íslands klárlega til staðar í undankeppninni næsta haust. Fyrst á dagskrá eru þó leikirnir tveir við Kósovó í mars, í umspili um sæti í B-deild Þjóðadeildarinnar.

„Vonast eftir því að vera hérna mjög lengi“

Arnar, sem er 51 árs gamall, segist helst vilja vera landsliðsþjálfari mjög lengi:

„Já, vonandi. Ég geri mér grein fyrir því að það eru allir spenntir núna en að það er fljótt að fara ef að úrslitin ganga ekki eftir. En vonandi verð ég hérna lengi. Þetta er draumastarf fyrir alla þjálfara. Ég hafði vonast eftir því, í hinum fullkomna heimi, að þetta kæmi í lok ferilsins en tíminn er núna fullkominn fyrir mig og maður velur ekki hvenær maður tekur við draumastarfinu. Ég vonast eftir því að vera hérna mjög lengi,“ sagði Arnar en fundinn í dag má sjá í heild hér að neðan.

Finnur fyrir góðu „væbi“ í samfélaginu

„Ég er gríðarlega stoltur af þessu tækifæri. Þetta er draumastarf íslenskra þjálfara. Þú færð ekki stærra starf í þessum geira. Að sama skapi eru blendnar tilfinningar. Víkingar hafa verið mín fjölskylda síðustu sex ár og ég hef upplifað ótrúlegt samstarf og ævintýri í Víkinni. En ég er fullur sjálfstrausts og vonandi eigum við eftir að standa okkur vel.

Ég finn fyrir góðu „væbi“. Það er samstaða innan stjórnar KSÍ og ég finn líka fyrir góðu „væbi“ úti í samfélaginu. En ég veit að það er fljótt að fara ef að leikurinn við Kósovó tapast 5-0. Það er bara eðli leiksins. En hingað til finnst mér eins og allir séu mjög ánægðir með þessa ráðningu, sem er mér mjög mikilvægt. Að það sé komin góð samstaða strax í byrjun. Vonandi heldur sú jákvæðni áfram,“ sagði Arnar.

„Skil vel að það eru 380.000 landsliðsþjálfarar“

Arnar verður með Davíð Snorra Jónasson sem aðstoðarþjálfara og heldur sig að langmestu leyti við sama teymi og Åge Hareide forveri hans var með. Hins vegar er ljóst að Sölvi Geir Ottesen, sem er að taka við af Arnari hjá Víkingi eftir að hafa verið aðstoðarmaður hans, mun ekki sjá um föstu leikatriðin hjá landsliðinu lengur.

En hver er sýn Arnars með íslenska liðið? Hann segist ekki vilja binda sig við neina stefnu í þeim efnum:

„Eftir öll þessi ævintýri hjá Víkingi langar mig bara að Ísland verði gott í öllum þáttum leiksins. Að leikmenn skilji hvað þarf til að ná árangri á alþjóða vettvangi. Við erum núna með gríðarlega mikið magn af „potential“ frábærum leikmönnum, leikmönnum sem eru þegar orðnir góðir og spila í stórum deildum, svo ég hef ekki áhyggjur af að þeir skilji ekki umfang verkefnisins. Ég vil ekki skilgreina okkar landslið út frá einhverri sérstakri tegund af fótbolta. Við gerum hvað sem er til að ná í úrslit. Vonandi með góðum fótbolta, rómantískum í bland við pragmatískan, og leggjumst á eitt við að fá fólkið með okkur til baka.

Ég skynja það að síðustu ár hafi verið mjög jákvæð. Ég tek við mjög góðu búi af Åge Hareide og er mjög þakklátur. Það þarf ekki mikið til þess að komast aftur á þann stað sem við vorum á fyrir nokkrum árum síðan, en það þurfa allir að standa saman. Ég skil vel að það eru 380.000 landsliðsþjálfarar, allir hafa sína skoðun og það er frábært. En um leið og hópurinn er tilkynntur þá vonast ég í minni barnslegu einlægni til þess að þá sé bara búið að ákveða hópinn og að við stöndum þá saman til að vinna þann ákveðna leik.“